ମୁମ୍ବାଇ,୧୩।୪: ଇଣ୍ଡିଆନ ପ୍ରିମିୟର ଲିଗ ୨୦୨୧ (ଆଇପିଏଲ)ରେ ସୋମବାର ରାଜସ୍ଥାନ ରୟାଲ୍ସ ଏବଂ ପଞ୍ଜାବ କିଙ୍ଗସ ମଧ୍ୟରେ ଟକ୍କର ହୋଇଥିଲା। ଏହି ମ୍ୟାଚରେ କିଙ୍ଗ୍ସ ଏକାଦଶ ପଞ୍ଜାମ ଶେଷ ବଲରେ ରାଜସ୍ଥାନ ରୟାଲ୍ସକୁ ପରାସ୍ତ କରିଛି। ବାମହାତୀ ଦ୍ରୁତ ବୋଲର ଚେତନ ସକରିଆ ଏହି ମ୍ୟାଚରେ ରାଜସ୍ଥାନ ରୟାଲ୍ସ ପାଇଁ ଡେବ୍ୟୁ କରିଥିଲେ। ଚେତନ ସକରିଆର ବେସ୍ ପ୍ରାଇସ୍ ଥିଲା ୨୦ ଲକ୍ଷ ଟଙ୍କା । କିନ୍ତୁ ରାଜସ୍ଥାନ ତାଙ୍କୁ ୧.୨ କୋଟି ଟଙ୍କାରେ କିଣିଛି। ଡେବ୍ୟୁ ମ୍ୟାଚରେ ସକାରିଆ ଚମତ୍କାର ବୋଲିଂ କରି ଚାରି ଓଭରରେ ୩୧ ରନ ଦେଇ ୩ ଉଇକେଟ ନେଇଥିଲେ। ମ୍ୟାଚ୍ ପରେ ପୂର୍ବତନ ବିସ୍ଫୋରକ କ୍ରିକେଟର୍ ବୀରେନ୍ଦ୍ର ସେହ୍ବାଗ କେବଳ ଚେତନ ସକରିଆଙ୍କୁ ପ୍ରଶଂସା କରିନାହାଁନ୍ତି, ବରଂ ତାଙ୍କ ପାଇଁ ଏକ ଭାବପ୍ରବଣ ଟୁଇଟ୍ ମଧ୍ୟ କରିଛନ୍ତି। ଚେତନ ସକରିଆଙ୍କ ମା’ଙ୍କ ଏକ ସାକ୍ଷାତକାର ନିଜ ଅଫିସିଆଲ ଟୁଇଟର ହ୍ୟାଣ୍ଡେଲ ଶେୟାର କରିଛନ୍ତି ସେହ୍ବାଗ। ଏହି ଟୁଇଟ ଶେୟାର କରି ସେହ୍ବାଗ କ୍ୟାପସନ ଦେଇଛନ୍ତି, ଚେତନ ସକରିଆଙ୍କ ଭାଇ କିଛି ମାସ ପୂର୍ବରୁ ଆତ୍ମହତ୍ୟା କରିଥିଲେ। ସେ ସୟଦ ମୁସ୍ତାକ ଅଲି ଟ୍ରଫିରେ ଖେଳୁଥିବାରୁ ତାଙ୍କ ମାତାପିତା ୧୦ଦିନ ପର୍ଯ୍ୟନ୍ତ ଚେତନଙ୍କୁ କିଛି କହି ନଥିଲେ। ଯେତେବେଳେ ସକରିଆ ଜାଣିବାକୁ ପାଇଲେ ଯେ ତାଙ୍କ ଭାଇ ଆତ୍ମହତ୍ୟା କରିଛନ୍ତି, ସେ ଏକ ସପ୍ତାହ ପର୍ଯ୍ୟନ୍ତ କାହା ସହ କଥା ହୋଇ ନ ଥିଲେ କି କିଛି ଖାଇ ମଧ୍ୟ ନ ଥିଲେ। ଆଇପିଏଲରେ ପୁଅ ସ୍ଥାନ ପାଇବାପରେ ଏକ ସାକ୍ଷାତକାରରେ ଚେତନଙ୍କ ମା’ କହିଥିଲେ ଯେ ତାଙ୍କ ପୁଅ ସଂଘର୍ଷ କରି ଏହି ସ୍ଥିତିରେ ପହଞ୍ଚିଛି।
ଆଇପିଏଲ ଲିଗ ପୂର୍ବରୁ ଚେତନ ସକରିଆ କହିଥିଲେ, ମୋ ଭାଇ ରାହୁଲ ଜାନୁଆରୀରେ ଆତ୍ମହତ୍ୟା କରିଥିଲେ। ମୁଁ ସେତେବେଳେ ଟି -୨୦ ସୟଦ ମୁସ୍ତାକ ଅଲି ଟ୍ରଫିରେ ଖେଳୁଥିଲି। ମୁଁ ଘରକୁ ମଧ୍ୟ ଫେରିବା ପୂର୍ବରୁ ତାଙ୍କର ମୃତ୍ୟୁ ହୋଇଥିବାର ମୁଁ ଜାଣିଲି। ଟୁର୍ନାମେଣ୍ଟ ଭିତରେ ଯେତେବେଳେ ବି ମୁଁ ମୋର ପରିବାର ସଦସ୍ୟଙ୍କୁ ରାହୁଲ(ସାନ ଭାଇ)ଙ୍କ ସହ କଥା ହେବାକୁ କହିଥିଲି, ସେ ବାହାନା କରି ଏହାକୁ ଏଡାଇ ଦେଇଥିଲେ। ଆଜି ମୁଁ ତାଙ୍କୁ ଅଧିକ ମିସ୍ କରୁଛି। ଯଦି ସେ ଆଜି ବଞ୍ଚିଥାନ୍ତେ ତେବେ ସେ ମୋ ଅପେକ୍ଷା ଅଧିକ ଖୁସି ହୋଇଥାନ୍ତେ।
ଚେତନ କହିଥିଲେ ଯେ ତାଙ୍କ ପିତା ଏକ ଟ୍ରକ ଚଳାଉଥିଲେ ଏବଂ ସମସ୍ତ ଅସୁବିଧା ଅତିକ୍ରମ କରିବା ପରେ ସେ ଏଠାରେ ପହଞ୍ଚିଥିଲେ। ସେ କହିଛନ୍ତି, ଏପରି ଏକ ସମୟ ଥିଲା ଯେତେବେଳେ ମୋ ବାପା ଟ୍ରକ ଡ୍ରାଇଭର ଥିଲେ, ପରେ ସେ ଅଟୋ ଚଳାଇବା ଆରମ୍ଭ କରିଥିଲେ। ଏହିପରି ଖେଳିବାକୁ ପର୍ଯ୍ୟାପ୍ତ ଜିନିଷ ନଥିଲା, ତେବେ ଅନ୍ୟ ଖେଳାଳିମାନେ ମୋତେ ସାହାଯ୍ୟ କଲେ। ପରିବାରକୁ ଆର୍ଥିକ ସହାୟତା କରିବା ପାଇଁ ତାଙ୍କୁ ଏକ ଷ୍ଟେସନାରୀ ଦୋକାନରେ କାମ କରିବାକୁ ପଡିଥିଲା।
