ଚେନ୍ନାଇ,୨୫।୩(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ୧୪ତମ ସଂସ୍କରଣ ପାଇଁ ୩ଥର ଟାଇଟଲ ଜିତିଥିବା ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ତା’ର ନୂଆ ଜର୍ସି ଉନ୍ମୋଚନ କରିଛି। ଦେଶର ସେନାବାହିନୀକୁ ଉତ୍ସର୍ଗ କରି ନୂଆ ରୂପରେ ବୁଧବାର ଏହି ଜର୍ସି ଉନ୍ମୋଚିତ କରାଯାଇଛି। ଏପ୍ରିଲ ୯ ତାରିଖରୁ ଆଇପିଏଲ୍ ଆରମ୍ଭ ହେବାକୁ ଯାଉଛି। ଚେନ୍ନାଇ ୨୦୧୦, ୨୦୧୧ ଓ ୨୦୧୮ରେ ୩ଥର ଆଇପିଏଲ ଚାମ୍ପିୟନ ହେବାର ଗୌରବ ଅର୍ଜନ କରିଥିବାରୁ ଏହି ନୂଆ ଜର୍ସିର ଉପରେ ଥିବା ଫ୍ରାଞ୍ଚାଇଜ୍ ଲୋଗର ଠିକ୍ ଉପରେ ୩ଟି ତାରକା ଚିହ୍ନିତ କରାଯାଇଛି। ଏଥିସହିତ ଭାରତୀୟ ସଶସ୍ତ୍ର ସେନାବାହିନୀର ସମ୍ମାନ ପାଇଁ ଜର୍ସିରେ ବିଭିନ୍ନ ରଙ୍ଗର କୃତ୍ରିମ ଆବରଣ ରଖାଯାଇଛି। ଦେଶର ଯବାନମାନେ ହିଁ ପ୍ରକୃତ ହିରୋ। ତେଣୁ ସେମାନଙ୍କ ସମ୍ମାନ ଉଦ୍ଦେଶ୍ୟରେ ଜର୍ସିରେ ଆମେ ଏଭଳି ଆବରଣ ରଖିଛୁ ବୋଲି ସିଏସ୍କେ ମୁଖ୍ୟ କାର୍ଯ୍ୟନିର୍ବାହୀ କେ.ଏସ. ବିଶ୍ୱନାଥନ କହିଛନ୍ତି। ଟୁଇଟରରେ ସିଏସ୍କେ ଏ ନେଇ ଏକ ଭିଡିଓ ରିଲିଜ କରିଛି। ଏଥିରେ ଅଧିନାୟକ ମହେନ୍ଦ୍ର ସିଂ ଧୋନୀ ନୂଆ ଜର୍ସି ଲଞ୍ଚ୍ କରୁଥିବାର ଦେଖାଯାଇଛି। ୨୦୦୮ରେ ଆଇପିଏଲ ଆରମ୍ଭ ହେବା ପରେ ପ୍ରଥମଥର ପାଇଁ ଚେନ୍ନାଇ ତା’ର ଜର୍ସିକୁ ପରିବର୍ତ୍ତନ କରି ନୂଆ ରୂପ ଓ ରଙ୍ଗ ଦେଇଛି।
ସେନାବାହିନୀ ପ୍ରତି ସିଏସ୍କେର ସ୍ବତନ୍ତ୍ର ସମ୍ମାନ ପୂର୍ବରୁ ରହିଆସିଛି। ୨୦୧୯ ଆଇପିଏଲ୍ ସେସନ ପୂର୍ବରୁ ସେନାକୁ ୨ କୋଟି ଟଙ୍କାର ଚେକ୍ ପ୍ରଦାନ କରିଥିଲା। ଧୋନୀ ମଧ୍ୟ ଟେରିଟୋରିଆଲ ଆର୍ମିରେ ସମ୍ମାନଜନକ ଲ୍ୟୁଟ୍ନାଣ୍ଟ କଲୋନେଲ ପଦ ହାସଲ କରିଛନ୍ତି। ସେ ମଧ୍ୟ ୨୦୧୯ରେ ପାରାଶୁଟ ରେଜିମେଣ୍ଟରେ ଟ୍ରେନିଂ ନେଇଥିଲେ। ଗତ ୧୧ଟି ସେସନରେ ସିଏସ୍କେ ୬ ଥର ଆଇପିଏଲ୍ ଫେୟାର ପ୍ଲେ ପୁରସ୍କାର ହାସଲ କରିଛି। ଏଥିସହିତ ସିଏସ୍କେର ପ୍ରାୟୋଜକ ରହିଥିବା ମନ୍ତ୍ରା, ଇଣ୍ଡିଆ ସିମେଣ୍ଟ୍ସ ଲିମିଟେଡ, ଗଲ୍ଫ, ନିପ୍ପୋନ ପେଣ୍ଟ, ଏସ୍ଏସ୍ଜେ ଓ ଅଷ୍ଟ୍ରାଲ ପାଇପ୍ସର ଲୋଗଗୁଡ଼ିକ ମଧ୍ୟ ଜର୍ସିରେ ଚିହ୍ନିତ ହୋଇଛି। ସିଏସ୍କେ ଆପ୍ କିମ୍ବା ଓ୍ବେବ୍ସାଇଟ୍ରୁ ପ୍ରଶଂସକମାନେ ଏହି ଜର୍ସିର ଅବିକଳ ନକଲ ମଗାଇବାର ସୁବିଧା ରହିଛି।
