ରାଜନଗର,୪ା୮ (ଭାସ୍କର ରାଉତରାୟ): ବିଶ୍ୱପ୍ରସିଦ୍ଧ ଭିତରକନିକା ଜାତୀୟଉଦ୍ୟାନକୁ ଦେଶ ବିଦେଶର ପର୍ଯ୍ୟଟକଙ୍କ ପାଇଁ ଗତ ମଙ୍ଗଳବାର ଖୋଲିଛି। ୩ ମାସ ଧରି ଭିତରକନିକା କୁମ୍ଭୀର ପ୍ରଜନନ ନିମନ୍ତେ ବନ୍ଦ ରହିବା ପରେ ଖୋଲି ଥିବାରୁ ଉତ୍ସାହର ସହ ପର୍ଯ୍ୟଟକମାନେ ଭିତରକନିକା ପରିଭ୍ରମଣରେ ଆସୁଛନ୍ତି। ମାତ୍ର ଭିତରକନିକା ଜାତୀୟଉଦ୍ୟାନକୁ ଆସିବାକୁ ଥିବା ଏକମାତ୍ର ସ୍ଥଳପଥ ରାସ୍ତା ଏବେ ମରଣଯନ୍ତା ପାଲଟିଛି। ଏହି ରାସ୍ତା ନିର୍ମାଣ କାମ ଆରମ୍ଭ କରି ଦେଇ ଅଧାପନ୍ତରିଆ ଭାବେ ରାସ୍ତା ଛାଡି ଠିକାଦାରପଳାଇ ଯାଇଛନ୍ତି।
ସୂଚନା ମୁତାବକ, ଦେଶ ବିଦେଶର ପର୍ଯ୍ୟଟକ ଭିତରକନିକା ଆସିବାକୁ ହେଲେ ଏକମାତ୍ର ସ୍ଥଳପଥରେ ରାସ୍ତା ରହିଛି। ରାଜନଗରରୁ ଡାଙ୍ଗମାଳ ଭାୟା ନଳିତାପାଟିଆ ଦେଇ ପର୍ଯ୍ୟଟକମାନେ ଭିତରକନିକାକୁ ଆସିଥାନ୍ତି। ଏହି ରାସ୍ତାର ଖୋଳାରୁ ଡାଙ୍ଗମାଳ ଭାୟା ନଳିତାପାଟିଆ ୧୦ କିମି ରାସ୍ତାର ଉନ୍ନତୀକରଣ ନିମନ୍ତେ ୧୩ କୋଟି ୩୩ ଲକ୍ଷ ଟଙ୍କା ବ୍ୟୟରେ ରାସ୍ତା ଚଉଡା ସହ ପିଚୁ ଓ ଢଳେଇ ରାସ୍ତା କରିବାକୁ ଠିକାଦାର ନିଯୁକ୍ତି କରାଯାଇଛି। ୩୧ ମାର୍ଚ୍ଚ ୨୦୨୪ ସୁଦ୍ଧା ଏହି କାମ ଶେଷ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି। ୪ ମାସ ତଳୁ ଠିକାଦାର ଭିତରକନିକା ଜାତୀୟ ଉଦ୍ୟାନର ଫାଟକଠାରୁ ମା’ଜୟଦୁର୍ଗାଙ୍କ ମୁଖ୍ୟ ଫାଟକ ଯାଏଁ ରାସ୍ତାର ଢଳେଇ କାମ ଆରମ୍ଭ କରିଥିଲେ। ଏହି ଅଧ କିଲୋମିଟର ରାସ୍ତାର ୨ ପାର୍ଶ୍ୱରେ ୩ ଫୁଟ ଲେଖାଏ ପ୍ରଶସ୍ତିକରଣ ସହିତ ରାସ୍ତା ଢଳେଇ କରିବାକୁ ଏଷ୍ଟିମେଣ୍ଟରେ ବ୍ୟୟ ବରାଦ ରହିଛି। ୪ମାସ ତଳେ ଠିକାଦାର ଜାତୀୟ ଉଦ୍ୟାନର ମୁଖ୍ୟ ଫାଟକ ନିକଟରୁ କାମ ଆରମ୍ଭ କରିଥିଲେ। ଏହି ୫ ଶହ ମିଟର ରାସ୍ତା ମଧ୍ୟରୁ ମାତ୍ର ୪୦ ପ୍ରତିଶତ କାମ କରି ଢଳେଇ ରାସ୍ତାରେ ରଡ଼ ବାହାରି ଥିବା ଅବସ୍ଥାରେ କାମ ଅଧା କରି ଠିକାଦାର ଛୁ’ ମାରିଛନ୍ତି। ଦୀର୍ଘ ଅଢେଇମାସ ହେଲା ଏହି ରାସ୍ତାକାମ ବନ୍ଦ ରହିଛି। ଏହି ରାସ୍ତା ଉପରେ ନିର୍ଭର କରୁଥିବା ଡାଙ୍ଗମାଳ ପଞ୍ଚାୟତବାସୀ ହୀନସ୍ତା ହେଉଥିବା ବେଳେ ଏବେ ପର୍ଯ୍ୟଟକମାନେ ନାହିଁ ନ ଥିବା ହୀନସ୍ତାର ଶିକାର ହେଉଛନ୍ତି। ଠିକାଦାର କେଉଁଠି ରାସ୍ତା ଖୋଳି ଦେଇଛନ୍ତି ତ, ଆଉ କେଉଁଠି ଗୋଟିଏ ପାର୍ଶ୍ୱରେ ଢଳେଇ କରି ଆର ପାର୍ଶ୍ୱକୁ ଖାଲୁଆ କରି ଛାଡ଼ି ଦେଇଛନ୍ତି। ପରିସ୍ଥିତି ଏପରି ହୋଇଛି, ମୁଖ୍ୟ ଫାଟକ ଯାଏଁ ପର୍ଯ୍ୟଟକଙ୍କ ଗାଡ଼ି ଯାଇପାରୁନି। କେବଳ ସେତିକି ନୁହେଁ, ଖୋଳାରୁ ଡାଙ୍ଗମାଳ ରାସ୍ତାରେ ଏବେ ଯାତାୟାତ କରିହେଉନି। ଖାଲ ଢିପରେ ଏହି ରାସ୍ତା ଭରି ଯାଇଥିଲେ ମଧ୍ୟ ଠିକାଦାର କାମ ନ କରି ପଳାଇ ଯିବାରୁ ରାଜନଗରବାସୀ ହୀନସ୍ତା ଭୋଗୁଛନ୍ତି। ଏହି ରାସ୍ତା ଉପରେ ଖମାରସାହି, ଈଶ୍ୱରପୁର, ଡାଙ୍ଗମାଳ, କୃଷ୍ଣନଗର, ତାଳଚୁଆ, ବାଘମାରି, କେରୁଅଁାପାଳ ଓ ରଙ୍ଗଣୀ ପଞ୍ଚାୟତବାସୀ ନିର୍ଭରଶୀଳ। ୮ ପଞ୍ଚାୟତବାସୀଙ୍କ ଏହା ବ୍ଲକ ମୁଖ୍ୟାଳୟକୁ ଯୋଗାଯୋଗ କରିବାର ଏକମାତ୍ର ରାସ୍ତା। ଏ ସମ୍ପର୍କରେ ରାସ୍ତା ନିର୍ମାଣ ଦାୟିତ୍ୱରେ ଥିବା ରାସ୍ତା ଓ କୋଠାବାଡି ସବ୍ଡିଭିଜନର ସହକାରୀ ନିର୍ବାହୀଯନ୍ତ୍ରୀ ନଟବର ପ୍ରଧାନଙ୍କୁ ପଚାରିବାରୁ ଠିକାଦାର କାମ ଅଧା କରି ପଳାଇଛନ୍ତି। ଠିକାଦାରଙ୍କୁ ଚିଠି ଦେଲେ ମଧ୍ୟ ସେ ଚିଠି ରିସିଭ କରୁନାହାନ୍ତି। ଏ ନେଇ ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି।
