ବରପାଲି,୨୪।୬(ଡି.ଏନ.ଏ): ବରଗଡ଼ ଜିଲା ବରପାଲି ଥାନା ପୋଲିସ ଏକ ଆନ୍ତଃଜିଲା ଡକାୟତ ଗ୍ୟାଙ୍ଗକୁ ଧରିଛି। ଗିରଫ ଅଭିଯୁକ୍ତମାନେ ହେଲେ ବରପାଲି ଥାନା ବନ୍ଧପାଲି ଗ୍ରାମର ଅକ୍ଷୟ ମହାନନ୍ଦ(୨୨), ଗୁପେ ଓରଫ ପୂର୍ଣ୍ଣଚନ୍ଦ୍ର ସାହୁ(୨୨) ଏବଂ ବିଶ୍ୱନାଥ ମହାନନ୍ଦ(୧୯)। ସେମାନଙ୍କ ବିରୋଧରେ ବରପାଲି ଥାନାରେ ଦଫା ୩୯୫ ଆଇପିସିରେ ଏକ ମାମଲା(୧୯୫/୨୨) ରୁଜୁ ହୋଇଛି। ଏହି ଗ୍ୟାଙ୍ଗର ଅନ୍ୟ ୩ ଅଭିଯୁକ୍ତ ଫେରାର୍ ଥିବା ଯୋଗୁ ସେମାନଙ୍କୁ ଗିରଫ ପାଇଁ ତନାଘନା ଚାଲିଥିବା ପୋଲିସ ସୂଚନା ଦେଇଛି।
ଶୁକ୍ରବାର ବରପାଲି ଥାନାରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ବରଗଡ଼ ଏସଡ଼ିପିଓ ଦୀପକ କୁମାର ଗୋଚ୍ଛାୟତ ସୂଚନା ଦେଇ କହିଛନ୍ତି ଯେ, ଗତ ୨୦ତାରିଖ ସନ୍ଧ୍ୟା ପ୍ରାୟ ୭ଟାରେ ମେଲଛାମୁଣ୍ଡା ଥାନା ଗୁଦେରପାଲି ଗ୍ରାମର ଯୋଗେଶ୍ୱର ପଟେଲ ଏକ ବାଇକ(ନଂ-ଓଡ଼ି୧୭ଜେ ୬୮୭୬) ଯୋଗେ ସୁବର୍ଣ୍ଣପୁର ଜିଲା ରାମପୁରରୁ ନିଜ ଘରକୁ ଫେରୁଥିଲେ। ବାଟରେ ବନ୍ଧପାଲି ବ୍ରିଜ ନିକଟରେ ଗିରଫ ୩ ଅଭିଯୁକ୍ତଙ୍କ ସମେତ ଅନ୍ୟ ୩ଜଣ ତାଙ୍କୁ ଛୁରି ଦେଖାଇ ଭୟଭୀତ କରିଥିଲେ। ପରେ ତାଙ୍କ ବାଇକ ଏବଂ ମୋବାଇଲ ନେଇ ଫେରାର୍ ହୋଇଯାଇଥିଲେ। ଏ ନେଇ ଯୋଗେଶ୍ୱର ବରପାଲି ଥାନାରେ ଏତଲା ଦେବା ପରେ ପୋଲିସ ଉପରୋକ୍ତ ମାମଲା ରୁଜୁ କରି ତଦନ୍ତ ଚଳାଇଥିଲା। ଗୁରୁବାର ଅଭିଯୁକ୍ତ ଅକ୍ଷୟ ଏବଂ ଗୁପେଙ୍କଠାରୁ ବାଇକ୍ ଜବତ କରିବା ସହିତ ସେମାନଙ୍କୁ ଗିରଫ କରାଯାଇଥିଲା। ଶୁକ୍ରବାର ଅନ୍ୟ ଅଭିଯୁକ୍ତ ବିଶ୍ୱନାଥଙ୍କୁ ଗିରଫ କରାଯାଇଥିଲା। ଫେରାର୍ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ଉଦ୍ୟମ ଚାଲିଛି ବୋଲି ଏସଡ଼ିପିଓ ଗୋଚ୍ଛାୟତ କହିଥିଲେ। ତେବେ ଗିରଫ ଅକ୍ଷୟ ଜଣେ ପେଶାଦାର ଅପରାଧୀ ଏବଂ ତାଙ୍କ ବିରୋଧରେ ବିଜେପୁର ଥାନାରେ ଗୋଟିଏ ଲୁଟ୍ ଏବଂ ରାମପୁର ଥାନାରେ ୩ଟି ଡକାୟତି ମାମଲା ରହିଥିବା ଏସଡ଼ିପିଓ ସୂଚନା ଦେଇଥିଲେ। ଖବରଦାତା ସମ୍ମିଳନୀରେ ବରପାଲି ଥାନା ଆଇଆଇସି ରୋଜାଲିନ ପଟେଲ ଉପସ୍ଥିତ ଥିଲେ।
