ଭୁବନେଶ୍ୱର, ୯।୧୨ (ବ୍ୟୁରୋ):ବହୁଚର୍ଚ୍ଚିତ ବ୍ଲାକ୍ମେଲର୍ ଅର୍ଚ୍ଚନା ନାଗଙ୍କୁ ମଙ୍ଗଳବାରଠାରୁ ୭ ଦିନିଆ ରିମାଣ୍ଡରେ ନେଇ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମାରାଥନ୍ ଜେରା କରୁଛି। ତେବେ ଜେରାବେଳେ ବହୁ ଚାଞ୍ଚଲ୍ୟକର ତଥା ଇଡି ପାଇଥିବା ଜଣାପଡିଛି। ଗୁରୁବାର ରିମାଣ୍ଡର ତୃତୀୟ ଦିନରେ ଇଡି ଅଧିକାରୀମାନେ ତାଙ୍କୁ ଗୁଡ଼ାଇତୁଡ଼ାଇ ଅନେକ ପ୍ରଶ୍ନ ପଚାରି ନୂଆ ତଥ୍ୟ ପାଇବାକୁ ଚେଷ୍ଟା କରିଛନ୍ତି। ଅପରପକ୍ଷରେ ଅର୍ଚ୍ଚନାଙ୍କ ସତ୍ୟବିହାରସ୍ଥିତ ଆଲିସାନ୍ ଘର ତିଆରି କରିଥିବା ଠିକାଦାର ପବିତ୍ର ପାତ୍ର ଦ୍ୱିତୀୟଥର ପାଇଁ ଇଡିରେ ହାଜର ହୋଇଥିଲେ। ଗତ ସୋମବାର ପବିତ୍ରଙ୍କୁ ପ୍ରଥମେ ୧୩ ଘଣ୍ଟା ଜେରା କରାଯାଇଥିଲା। ବାକି ଥିବା ଆଉକିଛି ତଥ୍ୟ ଜାଣିବାକୁ ଇଡି ଦ୍ୱିତୀୟ ଜେରାରେ ଚେଷ୍ଟା କରିଛି। ପୂର୍ବାହ୍ନରେ ପବିତ୍ର ହାଜର ହେବା ପରେ ଅର୍ଚ୍ଚନାଙ୍କ ସହ ତାଙ୍କର ୪୦ ଲକ୍ଷ ଟଙ୍କା କାରବାର ସଂକ୍ରାନ୍ତରେ ମଧ୍ୟ ପ୍ରଶ୍ନ ପଚରାଯାଇଥିଲା। ଏପରିକି ୨ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଅର୍ଚ୍ଚନା ଓ ତାଙ୍କୁ ମୁହାଁମୁହିଁ ଜେରା କରାଯାଇଥିବା ମଧ୍ୟ ସୂଚନା ମିଳିଛି। ଏପଟେ ଅର୍ଚ୍ଚନାଙ୍କଠାରୁ ଜବତ ହୋଇଥିବା ଡିଜିଟାଲ ପ୍ରମାଣପତ୍ର ଦାଖଲ ପାଇଁ ଷ୍ଟେଟ୍ ଫୋରେନ୍ସିକ୍ ଲାବ୍ ଓ କମିଶନରେଟ ପୋଲିସକୁ କୋର୍ଟ ନିର୍ଦ୍ଦେଶ ଦେଇଛନ୍ତି ବୋଲି ସୂଚନା ମିଳିଛି। ଗିରଫ ବେଳେ ଅର୍ଚ୍ଚନାଙ୍କ ଘରୁ ୪ ମୋବାଇଲ, ୨ ଟାବ୍ଲେଟ୍, ଗୋଟିଏ ପେନ୍ ଡ୍ରାଇଭ୍ ପୋଲିସ ଜବତ କରିଥଲା। ପ୍ରମାଣ ପାଇବାକୁ ସେଗୁଡ଼ିକୁ ପୋଲିସ ଫୋରେନ୍ସିକ୍ ଲାବକୁ ପଠାଇଥିଲା। ତେବେ ସେସବୁଥିରେ ଆର୍ଥିକ କାରବାର ନେଇ ଗୁରୁତ୍ୱପୂର୍ଣ୍ଣ ତଥ୍ୟ ରହିଥିବା ଇଡି ଆଶା ରଖିଛି। ହେଲେ ଉକ୍ତ ଡିଜିଟାଲ ଦସ୍ତାବିଜରେ ଥିବା ପ୍ରମାଣର ସ୍ଥିତିକୁ ନେଇ ମଧ୍ୟ ସନ୍ଦେହ ସୃଷ୍ଟି ହୋଇଛି। ତେବେ ରିମାଣ୍ଡ ଅବଧି ଆଉ ୪ ଦିନ ବାକି ଥିବାବେଳେ ଏହି ସମୟ ମଧ୍ୟରେ ଅର୍ଚ୍ଚନାଙ୍କୁ ଜେରା କରି ଆର୍ଥିକ କାରବାର ନେଇ ନୂଆ ଗୁମର ଖୋଲିବାକୁ ଇଡି ଲାଗି ପଡିଛି। ସେପଟେ ଜେଲରେ ଥିବା ଜଗବନ୍ଧୁଙ୍କୁ ଆସନ୍ତା ଡିସେମ୍ବର ୧୩ରେ କୋର୍ଟରେ ହାଜର କରାଯିବ। ଏହି ସମୟରେ ଇଡି ତାଙ୍କୁ ରିମାଣ୍ଡରେ ଆଣିବାକୁ ଆବେଦନ କରିପାରେ। ତେବେ ଇଡି କେବଳ ଜେରା କରୁଥିଲେ ମଧ୍ୟ ଏଯାଏ ବଡ଼ବଡ଼ିଆଙ୍କ ଲିଙ୍କ୍ ସମ୍ପର୍କରେ କିଛି ବି ଗଣମାଧ୍ୟମକୁ ତଥ୍ୟ ଦେଇନାହିଁ। ଏପରି ଆଉ କେତେଦିନ ଜେରା ଚାଲିବ ଓ ଏହି ଚର୍ଚ୍ଚିତ ମାମଲାରେ କାହା ବିରୋଧରେ ଇଡି କି କାର୍ଯ୍ୟାନୁଷ୍ଠାନ ନେବ ତାହାକୁ ନେଇ ଚର୍ଚ୍ଚା ଲାଗି ରହିଛି।
