ବରଗଡ଼ ଅଫିସ,୧୧।୬: ବରଗଡ଼ ସହରରେ ବାରମ୍ବାର ବିଦ୍ୟୁତ୍ ସେବା ବ୍ୟାହତ ହେଉଛି। ବରଗଡ଼ ୱାର୍ଡ ନଂ-୧ ନିଗମାନନ୍ଦ ବିହାର ପଡ଼ାବାସୀ ବିଦ୍ୟୁତ୍ ସମସ୍ୟା ନେଇ ବରଗଡ଼ ବିଧାୟକ ଦେବେଶ ଆଚାର୍ଯ୍ୟଙ୍କ ଦୃଷ୍ଟି ଆକର୍ଷଣ କରିଥିଲେ।
ପଡାର ଆବଶ୍ୟକତାକୁ ଦୃଷ୍ଟିରେ ରଖି ଆଉ ଏକ ଟ୍ରାନ୍ସଫର୍ମର ବସାଇବା ଓ ସମସ୍ତ ପୁରୁଣା କେବୁଲ ପରିବର୍ତ୍ତନ କରି ନୂତନ କେବୁଲ ଟାଣିବା ପାଇଁ ନିଗମାନନ୍ଦ ବିହାର ଉନ୍ନୟନ କମିଟି ଦାବି ଜଣାଇଥିଲା। ବିଧାୟକ ପଡ଼ାବାସୀଙ୍କ ସମସ୍ୟାକୁ ହୃଦୟଙ୍ଗମ କରି ବିଦ୍ୟୁତ୍ ବିଭାଗ କାର୍ଯ୍ୟନିର୍ବାହୀ ଅଧିକାରୀଙ୍କୁ ତୁରନ୍ତ କେବୁଲ ପରିବର୍ତ୍ତନ ସହିତ ଏକ ନୂତନ ଟ୍ରାନ୍ସଫର୍ମର ସ୍ଥାପନ ପାଇଁ ବିହିତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି। ଉନ୍ନୟନ କମିଟିର ସମ୍ପାଦକ ଟିକେଲାଲ ନାଏକ, ବରିଷ୍ଠ ସଦସ୍ୟ ବାଙ୍କବିହାରୀ ସାହୁଙ୍କ ସମେତ ବହୁ ପଡ଼ାବାସୀ ଦାବିପତ୍ର ପ୍ରଦାନ କରିଥିଲେ।
