ନୂଆଦିଲ୍ଲୀ,୭।୨: ଦ୍ୱିତୀୟ କୋଭିଡ୍ ଲହର ଶୀର୍ଷରେ ଥିବାବେଳେ ଗଙ୍ଗା ନଦୀରେ କେତେ ସଂଖ୍ୟାରେ ମୃତଦେହ ମିଳିଥିଲା? ଏ ସମ୍ପର୍କୀତ କୌଣସି ତଥ୍ୟ ଉପଲବ୍ଧ ନ ଥିବା ରାଜ୍ୟସଭାରେ ସୋମବାର କେନ୍ଦ୍ର ସରକାର କହିଛନ୍ତି।
ଗଙ୍ଗ ନଦୀରୁ କେତେ କୋଭିଡ୍-୧୯ ଆକ୍ରାନ୍ତଙ୍କ ମୃତଦେହ ମିଳିଥିଲା ଏବଂ ସେହି ମୃତଦେହର ସଂସ୍କାର ପାଇଁ କ’ଣ କ’ଣ ପଦକ୍ଷେପ ନିଆଯାଇଥିଲା ବୋଲି ପ୍ରଶ୍ନ କରିଥିଲେ ତୃଣମୂଳ କଂଗ୍ରେସ ଏମ୍ପି ଡେରେକ ଓ’ବ୍ରେନ।
ଉତ୍ତରରେ ଜୁନିୟର ଜଳ ଶକ୍ତି ମନ୍ତ୍ରୀ ବିଶ୍ୱେସ୍ବର ଟୁଡୁ କହିଥିଲେ, ଗଙ୍ଗ ନଦୀରୁ କେତେ କୋଭିଡ୍-୧୯ ଆକ୍ରାନ୍ତଙ୍କ ମୃତଦେହ ମିଳିଥିଲା, ତାହାର କୌଣସି ତଥ୍ୟ କେନ୍ଦ୍ର ସରକାରଙ୍କ ପାଖରେ ନାହିଁ। ନଦୀ ଓ ଏହାର କୂଳରୁ ମିଳିଥିବା କିଛି ମୃତଦେହକୁ କେହି ଦାବି କରି ନ ଥିଲେ। କିଛି ମୃତଦେହର ପରିଚୟ ମିଳି ନ ଥିଲା। ପୂରା ପୋଡ଼ି ଯାଇଥିବା ମୃତଦେହ ମଧ୍ୟ ମିଳିଥିଲା। ସ୍ବଚ୍ଛ ଗଙ୍ଗା ଜାତୀୟ ମିଶନ ଜରିଆରେ ମନ୍ତ୍ରଣାଳୟ ପକ୍ଷରୁ ବିଭିନ୍ନ ରାଜ୍ୟ ସରକାରଙ୍କଠାରୁ ମୃତଦେହ ସଂସ୍କାର ଲାଗି କେଉଁ ପଦକ୍ଷେପ ନିଆଯାଇଛି, ତା’ର ବିସ୍ତୃତ ରିପୋର୍ଟ ମଗାଯାଇଛି। ଉଲ୍ଲେକଯୋଗ୍ୟ, କୋଭିଡ୍-୧୯ ଦ୍ୱିତୀୟ ଲହର ଶୀର୍ଷରେ ଥିବା ବେଳେ ଗଙ୍ଗା ନଦୀରେ ଶହ ଶହ ମୃତଦେହ ଭାଷୁଥିବା ଉତ୍ତରପ୍ରଦେଶ ଓ ବିହାରରେ ଦେଖିବାକୁ ମିଳିଥିଲା।
