ଶ୍ରୀନଗର, ୩।୧ : ଜମ୍ମୁ-କଶ୍ମୀରର ଅର୍ନିଆ ସେକ୍ଟରରେ ପାକିସ୍ତାନ ପଟୁୁ ଭାରତରେ ଅନୁପ୍ରବେଶ ଊଦ୍ୟମକୁ ବିଏସ୍ଏଫ୍ ଯବାନ ପଣ୍ଡ କରିଛନ୍ତି। ଯବାନଙ୍କ ଗୁଳିରେ ପାକିସ୍ତାନୀ ଅନୁପ୍ରବେଶକାରୀଙ୍କ ମୃତ୍ୟୁ ଘଟିଛି। ଗତ ୩ ଦିନ ମଧ୍ୟରେ ଦ୍ୱିତୀୟ ଥର ପାଇଁ ଏଲ୍ଓସିରେ ଏଭଳି ଅନୁପ୍ରବେଶ ଘଟଣା ଘଟିଛି। ସେ ଭାରତୀୟ ସୀମାରେ ପ୍ରବେଶ ପାଇଁ ଉଦ୍ୟମ କରୁଥିଲେ। ଏନେଇ ବିଏସ୍ଏଫ୍ ଯବାନଙ୍କ ପକ୍ଷରୁ ସତର୍କ ସୂଚନା ଜାରି କରାଯାଇଥିଲା। ମାତ୍ର ସେ ଏହାକୁ ଅଣଦେଖା କରିବାରୁ ଯବାନଙ୍କ ପକ୍ଷରୁ ଗୁଳି ଚାଳନା କରାଯାଇଥିଲା।
ଏହା ପୂର୍ବରୁ କୁପଓ୍ବାରା ଜିଲାର କେରନ୍ ସେକ୍ଟରରେ ଶନିବାର ପାକିସ୍ତାନୀ ସ୍ଥଳସୈନ୍ୟ ବାହିନୀର ବ୍ୟାଟ୍ ଟିମ୍ର ଅନୁପ୍ରବେଶ ଷଡ଼ଯନ୍ତ୍ରକୁ ପଣ୍ଡ କରାଯାଇଥିଲା। ଏଥିରେ ମୃତ୍ୟୁ ଘଟିଥିବା ପାକିସ୍ତାନୀଙ୍କୁ ମହମ୍ମଦ ଶବିର ଭାବେ କରାଯାଇଥିଲା। ଭାରତୀୟ ସେନା ପକ୍ଷରୁ ପାକିସ୍ଥାନ ସୈନ୍ୟଙ୍କ ସହିତ ହଟ୍ଲାଇନ୍ରେ ଯୋଗାଯୋଗ କରାଯାଇ ମୃତଦେହ ନେବାକୁ ଖବର ଦିଆଯାଇଛି। ମୃତ ଶବିରଙ୍କଠାରୁ ଗୋଟିଏ ଏକେ-୪୭, ୭ଟି ଗ୍ରେନେଡ୍ ଏବଂ ଅନ୍ୟ ଅସ୍ତ୍ରଶସ୍ତ୍ର ଜବତ ହୋଇଥିଲା।
ଏଲ୍ଓସି ଅଞ୍ଚଳରେ ଶୀତଦିନ ଯୋଗୁ ପ୍ରବଳ ଥଣ୍ଡାରେ ତୁଷାରପାତ ହେବା ସହିତ ଖରାପ ପାଗ ଲାଗି ରହିଛି। ଫଳରେ ସର୍ଚ୍ଚ ଅପରେଶନକୁ ଏବେ ବନ୍ଦ କରି ଦିଆଯାଇଛି। ରବିବାର ଭାରତୀୟ ସେନାର ବଜ୍ର ଫୋର୍ସର ମେଜର ଜେନେରାଲ ଅଭିଜିତ୍ ପେଣ୍ଡାରକର ଏକ ଗଣମାଧ୍ୟମ ସମ୍ମିଳନୀରେ କହିଛନ୍ତି ଯେ ଶନିବାର କିରାନ ସେକ୍ଟରରେ ପାକିସ୍ତାନୀ ବ୍ୟାଟ୍ ଟିମ୍ ପକ୍ଷରୁ ଦୁଇଦେଶ ମଧ୍ୟରେ ହୋଇଥିବା ଅସ୍ତ୍ରବିରତି ଚୁକ୍ତିନାମାକୁ ସମ୍ପୂର୍ଣ୍ଣ ଉଲ୍ଲଂଘନ କରାଯାଇଛି। ସେକ୍ଟର ବର୍ଡର ଆକ୍ସନ ଟିମ ପକ୍ଷରୁ ପ୍ରତିରୋଧ କରିବାକୁ ଏକ ପ୍ରୟାସ କରାଯାଇଥିଲା। ଅପରାହ୍ନ ୩ଟା ବେଳେ ପାକିସ୍ତାନ ପକ୍ଷରୁ ସନ୍ଦେହଜନକ ଗତିବିଧି ପରିଲକ୍ଷିତ ହୋଇଥିଲା।
ଏହା ପରେ ଭାରତୀୟ ଯବାନମାନଙ୍କ ଦ୍ରୁତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଅପରାହ୍ନ ୪ଟାରେ ଅନୁପ୍ରବେଶ ଉଦ୍ୟମକୁ ପଣ୍ଡ କରାଯିବା ସହିତ ସମ୍ପୃକ୍ତ ପାକିସ୍ତାନୀ ଆତଙ୍କବାଦୀଙ୍କୁ ଗୁଳି କରାଯାଇଥିଲା। ନିହତ ଆତଙ୍କବାଦୀଙ୍କଠାରୁ ପାକିସ୍ତାନୀ ମୁଦ୍ରା, ଟିକାକରଣର ପାକିସ୍ତାନୀ ପ୍ରମାଣପତ୍ର ମଧ୍ୟ ମିଳିଛି। ଆତଙ୍କବାଦୀଙ୍କୁ ଗୁଳି କରାଯାଇଥିବା ସ୍ଥାନ ପାକିସ୍ତାନ ପାର୍ଶ୍ୱରେ ଅବସ୍ଥିତ ବୋଲି ଭାରତୀୟ ସେନା ପକ୍ଷରୁ ସୂଚନା ପ୍ରଦାନ କରାଯାଇଛି।
