ଶ୍ରୀନଗର,୩୧।୫ : ଜମ୍ମୁ-କଶ୍ମୀରର ପୁଞ୍ଚ ଜିଲା ଅନ୍ତର୍ଗତ ଏଲଓସି ନିକଟରେ ଅସ୍ତ୍ରଶସ୍ତ୍ର ତଥା ଡ୍ରଗ୍ସ ଚୋରା ଚାଲାଣର ଏକ ବଡ ଅନୁପ୍ରବେଶ ଉଦ୍ୟମ ପଣ୍ଡ ହୋଇଛି। ଏହି ଘଟଣାରେ ତିନି ଜଣଙ୍କୁ ଭାରତୀୟ ଯବାନ ଗିରଫ କରିଛି। ଅଧିକାରୀମାନେ ଏହି ସୂଚନା ପ୍ରଦାନ କରିଛନ୍ତି। ଗୁଲପୁର ସେକ୍ଟରର କରମାରା ଗ୍ରାମରେ ସକାଳେ ଗୁଳି ବିନିମୟରେ ଜଣେ ସେନା ଯବାନ ଅନୁପ୍ରବେଶକାରୀଙ୍କ ଗୁଳିମାଡ଼ରେ ଆହତ ହୋଇଛନ୍ତି। ସେହିପରି ଯବାନଙ୍କ ପାଲଟା ଗୁଳି ଚାଳନାରେ ଜଣେ ଅନୁପ୍ରବେଶକାରୀ ଆହତ ହୋଇଥିବା ଅଧିକାରୀ କହିଛନ୍ତି।
ସୀମାରେ ନିୟୋଜିତ ଯବାନମାନେ ଅନୁପ୍ରବେଶକାରୀଙ୍କୁ ସନ୍ଦେହଜନକ କାର୍ଯ୍ୟକଳାପକୁ ଅଟକାଇବାକୁ ଚେଷ୍ଟା କରିଥିଲେ। ଏନେଇ ସତର୍କ ସୂଚନା ଜାରି କରାଯାଇଥିଲା। ତେବେ ଅନୁପ୍ରବେଶକାରୀ ଏହାକୁ ନ ମାନି ଯବାନଙ୍କ ଉପରକୁ ପ୍ରଥମେ ଗୁଳି ଚାଳନା କରିଥିଲେ। ଏହାର ଜବାବରେ ଯବାନଙ୍କ ପକ୍ଷରୁ ପାଲଟା ଗୁଳି ଚାଳନା କରାଯାଇଥିଲା।
ଅଧିକାରୀ କହିଛନ୍ତି, ସମଗ୍ର ଅଞ୍ଚଳକୁ ତୁରନ୍ତ କର୍ଡନ କରାଯାଇଥିଲା ଏବଂ ତିନି ଜଣଙ୍କୁ ଗିରଫ କରାଯାଇଥିଲା। ସେମାନଙ୍କ ମଧ୍ୟରୁ ଜଣେ ଆହତ ହୋଇଛନ୍ତି। ସେମାନଙ୍କଠାରୁ ଡ୍ରଗ୍ସ ଏବଂ ଅସ୍ତ୍ରଶସ୍ତ୍ରର ଜବତ କରାଯାଇଛି। ଗିରଫ ଅନୁପ୍ରବେଶକାରୀଙ୍କୁ ମୋହର ଫାରୁକ, ମୋହମଦ ରିଆଜ ଏବଂ କରିମାରା ଗାଁର ମୋହମଦ ଜୁବେର ବୋଲି ଚିହ୍ନଟ କରାଯାଇଛି। ମହମ୍ମଦ ଫାରୁକଙ୍କ ଗୋଡରେ ଗୁଳି ବାଜିଛି।
ସେମାନେ ସୀମା ଆରପାର୍ଶ୍ୱରୁ ଆସିଥିବା ଅସ୍ତ୍ରଶସ୍ତ୍ର ଏବଂ ଡ୍ରଗ୍ସକୁ ଚୋରା ଚାଲାଣ କରିବାକୁ ଚାହୁଁଥିଲେ। ସେମାନଙ୍କ ପାଖରୁ ଗୋଟିଏ ଏକେ-୪୭ ରାଇଫଲ, ଦୁଇଟି ପିସ୍ତଲ, ୬ଟି ଗ୍ରେନେଡ, ଏକ ଆଇଡି (ଇମ୍ପ୍ରୋଭାଇଜଡ ବିସ୍ଫୋରକ ଉପକରଣ) ଏବଂ ହେରୋଇନର ୨୦ ପ୍ୟାକେଟ ଜବତ କରାଯାଇଛି। ଅଧିକାରୀମାନେ କହିଛନ୍ତି ସର୍ବଶେଷ ରିପୋର୍ଟ ନ ପାଇବା ପର୍ଯ୍ୟନ୍ତ ସର୍ଚ୍ଚ ଅପରେଶନ ଚାଲିଛି।
