ନୂଆଦିଲ୍ଲୀ, ୨୩।୧ : ଦେଶରେ କରୋନାର ତୃତୀୟ ଲହର ଜାରି ରହିଛି। ତୃତୀୟ ଲହର ଆଉ ୧୪ ଦିନ ମଧ୍ୟରେ ଶୀର୍ଷ ଛୁଇଁବାର ଆଶଙ୍କା ରହିଛି ବୋଲି ଆଇଆଇଟି ମାଡ୍ରାସ୍ର ଗବେଷକଙ୍କ ପ୍ରାଥମିକ ବିଶ୍ଳେଷଣରୁ ଏସମ୍ପର୍କରେ ସୂଚନା ମିଳିଛି। ଆସନ୍ତା ୨ ସପ୍ତାହ ମଧ୍ୟରେ ଫେବୃଆରୀ ୬ ସୁଦ୍ଧା ଦେଶରେ କରୋନା ସଂକ୍ରମଣ ଶୀର୍ଷରେ ପହଞ୍ଚିବ। ଏହା ପୂର୍ବରୁ ପୂର୍ବାନୁମାନ କରାଯାଇଥିଲା ଯେ ଫେବୃଆରୀ ୧ରୁ ଫେବୃଆରୀ ୧୫ ମଧ୍ୟରେ ତୃତୀୟ ଲହରର ଶୀର୍ଷସ୍ଥିତି ଆସିବ।
ତେବେ ସଂକ୍ରମଣ ହାରକୁ ଦୃଷ୍ଟିରେ ରଖି ଶୀର୍ଷ ଶୀଘ୍ର ଆସିବାର ଆଶଙ୍କା ଥିବା ଗବେଷକ ଦଳର ନେତୃତ୍ୱ ନେଉଥିବା ପ୍ରଫେସର ଡ. ଜୟନ୍ତ ଝା କହିଛନ୍ତି। ଆର୍-ଭାଲ୍ୟୁ ଜାନୁୟାରୀ ୧୪ ରୁ ଜାନୁୟାରୀ ୨୧ ମଧ୍ୟରେ ୧.୫୭ ପ୍ରତିଶତ କୁ ହ୍ରାସ ପାଇଛି। ଜଣେ ବ୍ୟକ୍ତି କେତେ ଲୋକଙ୍କୁ ସଂକ୍ରମିତ କରିପାରନ୍ତି ତାହାକୁ ଆର୍-ଭାଲ୍ୟୁ କୁହାଯାଇଥାଏ। ଯଦି ଏହି ହାର ୧ରୁ ତଳକୁ ଖସିଯାଏ, ତେବେ ମହାମାରୀ ସମାପ୍ତ ହୋଇଛି ବୋଲି ବିବେଚନା କରାଯାଏ।
ଆଇଆଇଟି ମାଡ୍ରାସ ସର୍ଭେ ରିପୋର୍ଟ ଅନୁସାରେ ଜାନୁଆରୀ ୧୪ରୁ ଜାନୁୟାରୀ ୨୧ମଧ୍ୟରେ ଏହା ୨.୨, ଜାନୁୟାରୀ ୭ ରୁ ୧୩ ମଧ୍ୟରେ ୨.୨, ଜାନୁଆରୀ ୧ ରୁ ୬ ମଧ୍ୟରେ ଏବଂ ଡିସେମ୍ବର ୨୫ ରୁ ୩୧ ମଧ୍ୟରେ ଏହା ୨.୯ ରହିଥିଲା। ଆଇଆଇଟି ମାଡ୍ରାସର ଗଣିତ ବିଭାଗ ଏବଂ ସେଣ୍ଟର ଅଫ ଏକ୍ସଲେନ୍ସ, ପ୍ରଫେସର ନୀଲେଶ ଏସ ଉପାଧ୍ୟାୟ ଏବଂ ପ୍ରଫେସର ଏସ ସୁନ୍ଦରଙ୍କ ନେତୃତ୍ୱରେ ଗଣନାକାରୀ ମଡେଲିଂ ମାଧ୍ୟମରେ ଶୀର୍ଷ କେବେ ଆସିବ ତାହାର ପ୍ରାଥମିକ ବିଶ୍ଳେଷଣ କରାଯାଇଛି। ମୁମ୍ବାଇ ଏବଂ କୋଲକାତାରେ ମହାମାରୀ ଶୀର୍ଷରେ ପହଞ୍ଚିସାରିଥିବା ରିପୋର୍ଟରେ ଦର୍ଶାଯାଇଛି।
ତଥ୍ୟ ଅନୁଯାୟୀ, ମୁମ୍ବାଇର ଆର୍-ଭାଲ୍ୟୁ ୦.୬୭ , ଦିଲ୍ଲୀର ୦.୯୮, ଚେନ୍ନାଇର ୧.୨ ଏବଂ କୋଲକାତାର ଆର୍-ଭାଲ୍ୟୁ ୦.୫୬ ରହିଛି। ମୁମ୍ବାଇ ଏବଂ କୋଲକାତାର ଆର୍-ଭାଲ୍ୟୁ ସୂଚାଇ ଦେଉଛି ଯେ ମହାମାରୀର ଶୀର୍ଷ ସେଠାରେ ଶେଷ ହୋଇଛି। ଯେତେବେଳେ କି ଦିଲ୍ଲୀ ଏବଂ ଚେନ୍ନାଇରେ ଏହା ପାଖାପାଖି ରହିଛି।
