ସେଞ୍ଚୁରିଆନ,୨୯।୧୨: ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟରେ ଚତୁର୍ଥ ଦିନ ଶେଷ ଆଡ଼କୁ ଟିମ୍ ଇଣ୍ଡିଆକୁ ଡବଲ ବ୍ରେକ୍ ଥ୍ରୁ ଆଣି ଦେଇଛନ୍ତି ଯଶପ୍ରୀତ ବୁମରା। ଫଳରେ ୩୦୫ ରନ୍ର ବିଜୟ ଲକ୍ଷ୍ୟର ପିଛା କରୁଥିବା ଘରୋଇ ଦଳ ଏବେ ୪ ଉଇକେଟ ହରାଇ ୯୪ ରନ୍ କରିଛି। ଦଳକୁ ବିଜୟ ପାଇଁ ବଳକା ୬ ଉଇକେଟରେ ୨୧୧ ରନ୍ ଦରକାର। ଏଭଳି ପରିସ୍ଥିତି ସତ୍ତ୍ୱେ ଭାରତୀୟ ଦଳକୁ ମ୍ୟାଚ୍ ଜିତିବା ଲାଗି ଭାଗ୍ୟ ଉପରେ ନିର୍ଭର କରିବାକୁ ପଡ଼ିବ। କାରଣ ସେଞ୍ଚୁରିଆନରେ ଗୁରୁବାର ବର୍ଷା ହେବାର ସମ୍ଭାବନା ଥିବା ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ବର୍ଷା ବ୍ୟତୀତ କ୍ରିଜରେ ସେଟ୍ ଥିବା ଅଧିନାୟକ ଡିନ ଏଲଗାର (୫୨) ଭାରତୀୟ ଦଳର ବିଜୟରେ ବାଧା ଦେବେ ନିଶ୍ଚିତ।
ପ୍ରଥମ ଇନିଂସରେ ଭାରତ ୩୨୭ ରନ୍ କରିଥିବା ବେଳେ ୧୯୭ ରନ୍ରେ ସୀମିତ ରହିଥିଲା ଦକ୍ଷିଣ ଆଫ୍ରିକା। ୧୩୦ ରନ୍ରେ ଆଗୁଆ ଥିବା ଟିମ୍ ଇଣ୍ଡିଆର ଦ୍ୱିତୀୟ ଇନିଂସ ୧୭୪ ରନ୍ରେ ଅଟକି ଯାଇଥିଲା। ଫଳରେ ଘରୋଇ ଦଳ ଆଗରେ ଛିଡ଼ା ହୋଇଛି ୩୦୫ ରନ୍ର ବିଜୟଲକ୍ଷ୍ୟ। ମଙ୍ଗଳବାର ଭଳି ବୁଧବାର ମଧ୍ୟ ଉଇକେଟ ପତନ ଘଟିଥିଲା। ତୃତୀୟ ଦିନରେ ୧୮ ଉଇକେଟ ପଡ଼ିଥିବା ବେଳେ ଚତୁର୍ଥ ଦିନ ୧୩ ଉଇକେଟ ପଡ଼ିଛି। ଏଲଗାରଙ୍କ ଅପରାଜିତ ଅର୍ଦ୍ଧଶତକ ଯୋଗୁ ଦକ୍ଷିଣ ଆଫ୍ରିକା ୯୪ ରନ କରିଛି। ଭାରତୀୟ ଦଳ ପାଇଁ ବୁମରା ୨ ଉଇକେଟ ନେଇଥିବା ବେଳେ ମହମ୍ମଦ ଶାମି ଓ ସିରାଜ ଗୋଟିଏ ଲେଖାଏ ସଫଳତା ପାଇଛନ୍ତି।
