ନୂଆଦିଲ୍ଲୀ,୨୩।୭(ପି.ଟି.): ବିଶ୍ୱ ନିଶା ନିବାରଣ ସଂସ୍ଥା (ଓ୍ବାଡା) ଦେଶର ନ୍ୟାଶନାଲ ଡୋପ୍ ଟେଷ୍ଟିଂ ଲାବରେଟୋରି (ଏନ୍ଡିଟିଏଲ୍) ଉପରେ ଜାରି କରିଥିବା ବାସନ୍ଦାଦେଶକୁ ଆଉ ୬ ମାସକୁ ବୃଦ୍ଧି କରିଛନ୍ତି। ଏନ୍ଡିଟିଏଲ୍ ଅନ୍ତଃରାଷ୍ଟ୍ରୀୟ ସ୍ତରର ଅନୁରୂପ ହୋଇ ନ ଥିବାରୁ ଓ୍ବାଡା ଏହି କଡ଼ା ନିଷ୍ପତ୍ତି ନେଇଛି ବୋଲି କହିଛି। ଫଳରେ ଭାରତୀୟ କ୍ରୀଡ଼ାକୁ ଜବରଦସ୍ତ ଝଟ୍କା ଲାଗିଛି। ଏହାଦ୍ୱାରା ଭାରତର ଅଲିମ୍ପିକ୍ସ ପ୍ରସ୍ତୁତି ପ୍ରଭାବିତ ହେବ ବୋଲି ଆଶଙ୍କା ପ୍ରକାଶ ପାଇଛି।
ଓ୍ବାଡା ଗତବର୍ଷ ଅଗଷ୍ଟକୁ ଏନ୍ଡିଟିଏଲ୍କୁ ୬ ମାସ ପାଇଁ ସସ୍ପେଣ୍ଡ କରିଥିଲା। ପୁଣି ଥରେ ଓ୍ବାଡା ତରଫରୁ ଏକ ନୂଆ ପର୍ଯ୍ୟାୟର ଯାଞ୍ଚ କରାଯାଇଥିଲା। ତେବେ ଅନ୍ତଃରାଷ୍ଟ୍ରୀୟସ୍ତରର କୌଣସି ମାପଦଣ୍ଡକୁ ପୂରଣ କରଯାଇ ନ ଥିବା ଏହି ଯାଞ୍ଚ୍ରୁ ଜାଣିବାକୁ ମିଳିଥିଲା। ଫଳରେ ନୂଆଦିଲ୍ଲୀସ୍ଥିତ ଏନ୍ଡିଟିଏଲ୍ର ମାନ୍ୟତାକୁ ଦ୍ୱିତୀୟ ଥର ପାଇଁ ଆଉ ୬ ମାସ ଲାଗି ସସ୍ପେଣ୍ଡ କରାଗଲା ବୋଲି ଓ୍ବାଡା ତରଫରୁ କୁହାଯାଇଛି। ବାସନ୍ଦ ହେବା ଦ୍ୱାରା ଏବେ ଏନ୍ଡିଟିଏ୍ ରକ୍ତ ଓ ମୂତ୍ର ନେଇ କୌଣସି ପରୀକ୍ଷା କରି ପାରିବ ନାହିଁ। ଏନ୍ଡିଟିଏଲ୍ର ପରୀକ୍ଷାଗାରରେ ଅନ୍ତଃରାଷ୍ଟ୍ରୀୟସ୍ତରର ସୁବିଧା ସୁଯୋଗ ନାହିଁ ବୋଲି ଓ୍ବାଡା ହୃଦୟଙ୍ଗମ କରିଛି। ଏନ୍ଡିଟିଏଲ୍ ଲାବରେଟୋରିରେ ଆଇସୋଟପ୍ ରେସିଓ ମାସ୍ ସ୍ପେଟ୍ରୋମେଟ୍ରି ମଧ୍ୟ ଅନ୍ତଃରାଷ୍ଟ୍ରୀସ୍ତରର ନୁହେଁ ଓ୍ବାଡା ଜାଣିବାକୁ ପାଇଛି।
ଏବେ ଯେଉଁ ମୂତ୍ର ନମୁନା ସଂଗ୍ରହ କାରାଯାଉଛି ସେଗୁଡିକୁ ଦୋହାସ୍ଥିତ ଓ୍ବାଡ଼ା ସ୍ବୀକୃତିପ୍ରାପ୍ତ ଲାବରେଟୋରିକୁ ପଠାଯାଉଛି। ଟୋକିଓ ଅଲିମ୍ପିକ୍ସ ପୂର୍ବରୁ ଏନ୍ଡିଟିଏଲ୍ କୌଣସି ପରୀକ୍ଷା କରିପାରିବ ନାହିଁ କୁହାଯାଇଛି। ଯଦି ଏନ୍ଡିଟିଏଲ୍ର ସ୍ଥିତିରେ ସୁଧାର ନ ଆସେ ତା’ହେଲେ ଓ୍ବାଡା ଆଉ ୬ ମାସ ବାସନ୍ଦାଦେଶ ବଢାଇବ। ଇତିମଧ୍ୟରେ କୋଭିଡ୍-୧୯ ଲକ୍ଡାଉନ୍ ମଧ୍ୟରେ ଏନ୍ଡିଟିଏଲ୍ କୌଣସି ରକ୍ତ ନମୁନା ସଂଗ୍ରହ କରୁନାହିଁ ବୋଲି ଜାତୀୟ ନିଶା ନିବାରଣ ସଂସ୍ଥା (ନାଡା) ଡିଜି ନବୀନ ଅଗ୍ରଓ୍ବାଲ କହିଛନ୍ତି। ପୂର୍ବରୁ ଗତ ଅଗଷ୍ଟରେ ଏନ୍ଡିଟିଏଲ୍ ଓ କ୍ରୀଡ଼ା ମନ୍ତ୍ରଣାଳୟ ଓ୍ବାଡାର ବାସନ୍ଦାଦେଶ ବିରୋଧରେ କୋର୍ଟ ଅଫ୍ ଆର୍ବିଟ୍ରେଶନ ଫର ସ୍ପୋଟର୍ସ (କାସ୍) ଅପିଲ କରି ନ ଥିଲା। କିନ୍ତୁ ଏଥର ଅପିଲ କରାଯାଉଛି କି ନା ତାହା ଦେଖିବାକୁ ବାକି ରହିଲା।
