ଅଙ୍କାରା/ନୂଆଦିଲ୍ଲୀ,୧୨ ।୨: ତୁର୍କୀରେ ଫେବୃୟାରୀ ୬ରେ ଆସିଥିବା ବିନାଶକାରୀ ଭୂକମ୍ପରେ ନିଖୋଜ ଥିବା ଭାରତୀୟଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ସେ ଯେଉଁ ହୋଟେଲରେ ରହୁଥିଲେ ସେହିଠାରେ ହିଁ ଚାପି ହୋଇଯାଇ ତାଙ୍କର ମୃତ୍ୟୁ ହୋଇଥିବା କୁହାଯାଉଛି । ଉତ୍ତରାଖଣ୍ଡର ପୌଡି ଜିଲାର ବାସିନ୍ଦା ବିଜୟ କୁମାର ଗୌଡ ବେଙ୍ଗାଲୁରୁର ଏକ କମ୍ପାନୀ ପାଇଁ କାମ କରୁଥିଲେ । ସେ ସେହି କମ୍ପାନୀ କାମରେ ହିଁ ତୁର୍କୀ ଯାଇଥିଲେ । ଭାରତୀୟ ଦୂତାବାସର ସୂଚନା ଅନୁଯାୟୀ ବିଜୟଙ୍କୁ ଚିହ୍ନିବା କଷ୍ଟକର ଥିଲା । କାରଣ ତାଙ୍କ ଶରୀର ସମ୍ପୂର୍ଣ୍ଣ ଭାବେ ଚାପି ହୋଇଯାଇଥିଲା । ହେଲେ ତାଙ୍କ ହାତରେ ଥିବା ‘ଓମ’ ଟାଟୁକୁ ଦେଖି ତାଙ୍କୁ ଚିହ୍ନଟ କରାଯାଇଥିଲା ।
ସୂଚନାଯୋଗ୍ୟ,ବିଜୟ କୁମାର ଗୌଡ ପୌଡି ଜିଲାର କୋଟଦ୍ୱାରର ପଦମପୁର ଅଞ୍ଚଳର ବାସିନ୍ଦା । ତୁର୍କୀରେ ଧୂଳିସାତ୍ ହୋଇଯାଇଥିବା ହୋଟେଲର ଭଗ୍ନାବଶେଷ ମଧ୍ୟରୁ ଶୁକ୍ରବାର ତାଙ୍କର କପଡା ମିଳିଥିଲା । ଏହାପରେ ଶନିବାର ତୁର୍କୀରେ ଥିବା ଭାରତୀୟ ଦୂତାବାସ ଟୁଇଟ କରିଥିଲା କି, ଆମେ ଦୁଃଖର ସହ କହୁଛୁ ଯେ, ୬ ଫେବୃୟାରୀର ଭୂକମ୍ପ ପରେ ତୁର୍କୀରେ ନିଖୋଜ ଥିବା ଭାରତୀୟ ନାଗରିକ ବିଜୟ କୁମାରଙ୍କ ଶରୀରର କିଛି ଅଂଶ ମିଳିଛି । ତୁର୍କୀର ମଲତ୍ୟାରେ ଏକ ହୋଟେଲର ଭଙ୍ଗା ଅଂଶର ମଝିରୁ ତାଙ୍କ ମୃତ ଦେହକୁ ବାହାର କରାଯାଇଛି । ସେଠାକୁ ସେ ଏକ ବିଜନେସ ଟ୍ରିପରେ ଯାଇଥିଲେ ।
