ଭୁବନେଶ୍ୱର, ୨୯ା୧୦(ସ୍ପୋଟର୍ସବ୍ୟୁରୋ): ଭୁବନେଶ୍ୱର ସ୍ଥିତ କଳିଙ୍ଗ ଷ୍ଟାଡିୟମରେ ଶୁକ୍ରବାର ପ୍ରୋ ହକି ଲିଗର ଉଦ୍ଘାଟନୀ ମୁକାବିଲାରେ ବିଜୟୀ ହୋଇଛି ଭାରତ। ଅନ୍ତିମ କ୍ୱାର୍ଟରରେ ଷ୍ଟ୍ରାଇକର ମନଦୀପ୍ ସିଂଙ୍କ ଡବଲ ଗୋଲ ବଳରେ ଭାରତ ୪-୩ରେ ନ୍ୟୁଜିଲାଣ୍ଡକୁ ପରାସ୍ତ କରିଛି। ଭାରତ ୩-୨ରେ ପଛଆ ରହିଥିବା ବେଳେ ମନଦୀପ(୫୧ ଓ ୫୬ ମିନିଟ) ଦୁଇଟି ଗୋଲ ସ୍କୋର କରି ଭାରତକୁ ବିଜୟୀ କରିଥିଲେ। ପ୍ରଥମ ଦୁଇ କ୍ୱାର୍ଟରରେ ଭାରତ ଏବଂ ନ୍ୟୁଜିଲାଣ୍ଡ ପରସ୍ପରକୁ ଗୋଟିଏ ଲେଖାଏ ଗୋଲ ଦେଇଥିଲେ। ତେବେ ତୃତୀୟ କ୍ୱାର୍ଟରରେ ୨-୧ର ଅଗ୍ରଣୀ ସହିତ ନ୍ୟୁଜିଲାଣ୍ଡ ଭାରତୀୟ ଶିବିରରେ ଭୀତି ସଞ୍ଚାର କରିଥିଲା। ଅନ୍ତିମ କ୍ୱାର୍ଟରରେ ଭାରତୀୟ ଡିଫେନ୍ସ ଭଲ ପ୍ରଦର୍ଶନ କରିଥିବା ବେଳେ ମନଦୀପ୍ଙ୍କ ଡବଲ ଗୋଲ ବଳରେ ଭାରତ ମ୍ୟାଚ ଜିତି ନେଇଥିଲା। ଭାରତ ୪ ଗୋଲ ମଧ୍ୟରୁ ୩ଟି ଫିଲ୍ଡ ଗୋଲ ଏବଂ ଗୋଟିଏ ପେନାଲ୍ଟି ଷ୍ଟ୍ରୋକରୁ ଆସିଥିଲା। ଅନ୍ୟ ପକ୍ଷରେ ନ୍ୟୁଜିଲାଣ୍ଡ ଗୋଟିଏ ଲେଖାଏ ଫିଲ୍ଠ ଗୋଲ, ପେନାଲ୍ଟି ଷ୍ଟ୍ରୋକ୍ ଓ ପେନାଲ୍ଟି କର୍ନରରୁ ଗୋଲ କରିଥିଲା।
ଭାରତ ଓ ନ୍ୟୁଜିଲାଣ୍ଡ ଆରମ୍ଭରୁ ସତର୍କତାର ସହିତ ଖେଳ ଆରମ୍ଭ କରିଥିଲେ। ଭାରତ ପକ୍ଷରୁ ମନଦୀପ୍ ମୋର୍ ପ୍ରଥମ ଗୋଲ୍ ସ୍କୋର କରିଥିଲେ। ଫିଲ୍ଡ ଗୋଲରୁ ମନଦୀପ୍ ସ୍କୋର କରିବା ସହିତ ଭାରତକୁ ୧-୦ରେ ଅଗ୍ରଣୀ ପ୍ରଦାନ କରିଥିଲେ। ପ୍ରଥମ କ୍ୱାର୍ଟରରେ ପଛୁଆ ରହିବା ପରେ ୨୨ତମ ମିନିଟରେ ଗୋଲ ପରିଶୋଧ କରିଥିଲା ନ୍ୟୁଜିଲାଣ୍ଡ। ପେନାଲ୍ଟି ଷ୍ଟ୍ରୋକରୁ ଲେନ୍ ସାମ୍ ଏହି ଗୋଲଟି ସ୍କୋର କରିଥିଲେ। ଦ୍ୱିତୀୟ କ୍ୱାର୍ଟର ଶେଷ ସୁଦ୍ଧା ଉଭୟ ଦଳ ୧-୧ରେ ରହିଥିଲେ। ତେବେ ତୃତୀୟ କ୍ୱାର୍ଟରରେ ଦୁଇଟି ଗୋଲ ସହିତ ନ୍ୟୁଜିଲାଣ୍ଡ ଅଗ୍ରଣୀ ହାସଲ କରିଥିଲା। ତୃତୀୟ କ୍ୱାର୍ଟରରେ ମାତ୍ର ୨ ମିନିଟ ମଧ୍ୟରେ ଦୁଇ ଗୋଲ ସ୍କୋର କରିଥିଲା ନ୍ୟୁଜିଲାଣ୍ଡ। ସ୍ମିଥ୍ ଜେକ୍(୩୪) ଓ ଲେନ୍ ସାମ୍(୩୫) ନ୍ୟୁଜିଲାଣ୍ଡ ପକ୍ଷରୁ ଗୋଲ ସ୍କୋର କରିଥିଲେ। ତୃତୀୟ କ୍ୱାର୍ଟରରେ ଅଧିନାୟକ ହରମନପ୍ରୀତ୍ ସିଂ ଗୋଟିଏ ଗୋଲ ପରିଶୋଧ କରିଥିଲେ। ତେବେ ମନଦୀପ୍ ସିଂଙ୍କ ଡବଲ ଗୋଲ ବଳରେ ଭାରତ ୪-୩ରେ ଏହି ମ୍ୟାଚକୁ ଜିତି ନେଇଥିଲା। ଉଦ୍ଘାଟନୀ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ୫ଟି ସଚିବ ଭି.କେ ପାଣ୍ଡିଆନ୍ ଓ ହକି ଇଣ୍ଡିଆ ସଭାପତି ଦିଲ୍ଲୀପ ତୀର୍କି ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
