ନୂଆଦିଲ୍ଲୀ,୧ା୧- ବାଧ୍ୟତାମୂଳକ କ୍ୱାରାଣ୍ଟାଇନ ପିରିୟଡ୍ ଶେଷ କରିଥିବା ରୋହିତ ଶର୍ମାଙ୍କୁ ଅଷ୍ଟ୍ରେଲିଆ ବିପକ୍ଷ ଅନ୍ତିମ ଦୁଇ ଟେଷ୍ଟ ମ୍ୟାଚ୍ରେ ବଡ଼ ଦାୟିତ୍ତ୍ୱ ତୁଲାଇବେ। ଚେତେଶ୍ୱର ପୂଜାରାଙ୍କ ବଦଳରେ ରୋହିତଙ୍କୁ ଉପଅଧିନାୟକ ପଦ ଦିଆଯାଇଛି। ନିୟମିତ ଅଧିନାୟକ ବିରାଟ କୋହଲି ବର୍ତ୍ତମାନ ଅନୁପସ୍ଥିତ ଥିବାରୁ ଉପ ଅଧିନାୟକ ଅଜିଙ୍କ୍ୟ ରାହାନେ ଟିମ୍ ଇଣ୍ଡିଆର ନେତୃତ୍ୱ ଭାର ସମ୍ଭାଳୁଛନ୍ତି।
ପ୍ରଥମ ଦୁଇ ଟେଷ୍ଟ ମ୍ୟାଚ୍ରୁ ବାଦ୍ ପଡ଼ିଥିବା ବିସ୍ଫୋରକ ଓପନର ରୋହିତ ଅନ୍ତିମ ଦୁଇ ମ୍ୟାଚ୍ ପାଇଁ ଉପଲବ୍ଧ ହୋଇଛନ୍ତି। କ୍ୱାରାଣ୍ଟାଇନ ନିୟମ ଯୋଗୁ ସେ ମେଲବୋର୍ନ ଟେଷ୍ଟରେ ଖେଳିପାରି ନ ଥିଲେ। ଏହା ବ୍ୟତୀତ ଆହତ ସମସ୍ୟା ଯୋଗୁ ବଳକା ସିରିଜ୍ରୁ ବାଦ୍ ପଡ଼ିଥିବା ଉମେଶ ଯାଦବଙ୍କ ବଦଳରେ ଉଦୀୟମାନ ପେସର ଟି. ନଟରାଜନ ସିଡ୍ନୀ ଟେଷ୍ଟରେ ପଦାର୍ପଣ କରିବେ ବୋଲି ବିସିସିଆଇ ପକ୍ଷରୁ ସୂଚନା ଦିଆଯାଇଛି।
