ନୂଆଦିଲ୍ଲୀ, ୩୦।୩ : ସାତୋଟି ଦେଶ ଦ୍ୱାରା ଆୟୋଜିତ ବିମ୍ସଟେକ୍ (ବିଆଇଏମଏସଟିଇସି)(ବହୁକ୍ଷେତ୍ରୀୟ ବୈଷୟିକ ଏବଂ ଅର୍ଥନୈତିକ ସହଯୋଗ ନିମିତ୍ତ ବଙ୍ଗୋପସାଗରୀୟ ପ୍ରୟାସ) ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭର୍ଚୁଆଲ ମାଧ୍ୟମରେ ବୁଧବାର ଯୋଗ ଦେଇଛନ୍ତି। ବିମ୍ସଟେକ୍ ହେଉଛି ପାକିସ୍ତାନ ବିନା ସାତୋଟି ଦେଶର ଏକ ଆଞ୍ଚଳିକ ଗୋଷ୍ଠୀ। ଏଥିରେ ଭାରତ ବ୍ୟତୀତ ଶ୍ରୀଲଙ୍କା, ବାଂଲାଦେଶ, ମ୍ୟାନ୍ମାର, ଥାଇଲାଣ୍ଡ, ନେପାଳ ଏବଂ ଭୁଟାନ ଅନ୍ତର୍ଭୁକ୍ତ। ଏଥର ଶ୍ରୀଲଙ୍କା ଅଧ୍ୟକ୍ଷ ଭାବରେ ବିମ୍ସଟେକ୍ ଶିଖର ସମ୍ମିଳନୀ ଆୟୋଜନ କରୁଛି।
ବିମ୍ସଟେକ୍ ଶିଖର ସମ୍ମିଳନୀକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ବିମ୍ସଟେକ୍ ପାଣିପାଗ କେନ୍ଦ୍ରକୁ ସକ୍ରିୟ କରିବା ପାଇଁ ଭାରତ ୩୦ ଲକ୍ଷ ଡଲାର ଖର୍ଚ୍ଚ କରିବାକୁ ପ୍ରସ୍ତୁତ। ଏଥିପାଇଁ ସମସ୍ତଙ୍କର ସହଯୋଗ ଆବଶ୍ୟକ। ପଞ୍ଚମ ବିମ୍ସଟେକ୍ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ମୋଦତ କହିଛନ୍ତି, ଏହା ହେଉଛି ବିମ୍ସଟେକ୍ ପ୍ରତିଷ୍ଠା ହେବାର ୨୫ ତମ ବର୍ଷ। ସେଥିପାଇଁ ମୁଁ ଆଜିର ଶିଖର ସମ୍ମିଳନୀକୁ ବିଶେଷ ଗୁରୁତ୍ୱପୂର୍ଣ୍ଣ ମନେ କରୁଛି। ଏହି ଲ୍ୟାଣ୍ଡମାର୍କ ଶିଖର ସମ୍ମିଳନୀର ଇତିହାସରେ ଏକ ସୁବର୍ଣ୍ଣ ଅଧ୍ୟାୟ ଲେଖିବ।
କୃଷିଜାତ ଦ୍ରବ୍ୟ ପାଇଁ ଏକ ଆଞ୍ଚଳିକ ସହଯୋଗ ନେଟୱାର୍କ ସୃଷ୍ଟି କରିବାର ଏକ ସମ୍ଭାବନା ମଧ୍ୟ ଅଛି । ଅପରାଧିକ ମାମଲାରେ ମଧ୍ୟ ଆମେ ସହଯୋଗର ଏକ ନୂତନ ଢାଞ୍ଚା ସୃଷ୍ଟି କରିଛୁ ଏବଂ ଏଥିପାଇଁ ଆମେ ଏକ ନୂତନ ଚୁକ୍ତି କରିଛୁ । ପ୍ରଧାନମନ୍ତ୍ରୀ ମୋଦି କହିଛନ୍ତି, ୟୁରୋପରେ ସାମ୍ପ୍ରତିକ ଘଟଣା ଅନ୍ତର୍ଜାତୀୟ ବ୍ୟବସ୍ଥାର ସ୍ଥିରତା ଉପରେ ପ୍ରଶ୍ନ ଉଠାଇଛି।
ଏହି ପରିପ୍ରେକ୍ଷୀରେ ଆଞ୍ଚଳିକ ସହଯୋଗ ଏକ ପ୍ରମୁଖ ପ୍ରାଥମିକତା ପାଲଟିଛି। ଏପରିସ୍ଥଳେ ବିମ୍ସଟେକ୍ ପାରସ୍ପାରିକ ସହଯୋଗ ମାଧ୍ୟମରେ ସ୍ଥିତିର ମୁକାବିଲା ଲାଗି ଅଣ୍ଟା ଭିଡ଼ିବାର ଆବଶ୍ୟକତା ରହିଛି।
