ନୂଆଦିଲ୍ଲୀ,୧୯।୧: ଭାରତୀୟ ଟେନିସ ଷ୍ଟାର ସାନିଆ ମିର୍ଜା ଚଳିତ ସିଜନ ପରେ ଅନ୍ତର୍ଜାତୀୟ ଟେନିସରୁ ସନ୍ନ୍ୟାସ ନେବେ। ଚଳିତ ଅଷ୍ଟ୍ରେଲିଆନ ଓପନର ମହିଳା ଡବଲ୍ସ ବର୍ଗରେ ପ୍ରଥମ ରାଉଣ୍ଡରେ ପରାଜୟ ସହ ବିଦାୟ ନେବା ପରେ ଏଭଳି ଘୋଷଣା କରିଛନ୍ତି ପୂର୍ବତନ ନଂ୧ ଡବଲ୍ସ ମହିଳା ଖେଳାଳି। ଟୁର୍ନାମେଣ୍ଟରେ ୟୁକ୍ରେନର ନାଡିଆ କିଚେନୋକଙ୍କୁ ସାଥି କରି ଖେଳିଥିଲେ ସାନିଆ। ଏହି ଯୋଡ଼ିକୁ ସିଧାସଳଖ ସେଟ୍ରେ ୪-୬, ୬-୭ ବ୍ୟବଧାନରେ ସ୍ଲୋଭେନିଆର କାଜା ଜୁଭାନ ଓ ତାମାରା ଜିଡାନସେକ ହରାଇ ଦେଇଛନ୍ତି।
“ଏଭଳି ନିଷ୍ପତ୍ତି ପଛରେ ଅନେକ କାରଣ ରହିଛି। ମୋତେ ଆହତ ସମସ୍ୟାରୁ ମୁକୁଳିବା ପାଇଁ ଅପେକ୍ଷାକୃତ ଅଧିକ ସମୟ ଲାଗୁଛି। ସର୍ବଦା ଟ୍ରାଭେଲିଂ ବେଳେ ମୋର ୩ ବର୍ଷୀୟ ପୁଅକୁ ମଧ୍ୟ ବିପଦରେ ପକାଉଛି। ଏହାକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନେଇଛି। ମୋତେ ଲାଗୁଛି ମୋ ଶରୀର ପୂର୍ବଭଳି ଫିଟ୍ ନାହିଁ। ମୋ ଆଣ୍ଠୁରେ ଆଜି ଆଘାତ ଲାଗିଛି। ଏହା ଆମ ପରାଜୟର କାରଣ ବୋଲି ମୁଁ କହୁନାହିଁ। କିନ୍ତୁ ବୟସ ବଢ଼ୁଥିବାରୁ ଆହତ ସମସ୍ୟାରୁ ମୁକୁଳିବାକୁ ସମୟ ଲାଗୁଛି” ବୋଲି ମିର୍ଜା କହିଛନ୍ତି।
କ୍ୟାରିୟରର ୬ଥର ଗ୍ରାଣ୍ଡସ୍ଲାମ ଟାଇଟଲ ଜିତିଥିବା ସାନିଆ ଚଳିତ ସିଜନ ଶେଷ ପର୍ଯ୍ୟନ୍ତ ଖେଳ ଜାରି ରଖିବାକୁ କହିଛନ୍ତି।
