ନୂଆଦିଲ୍ଲୀ,୧୭।୭: କରୋନା ଟିକାକରଣରେ ଭାରତ ବଡ଼ ସଫଳତା ହାସଲ କରିଛି। ଟିକାକରଣରେ ବର୍ତ୍ତମାନ ଭାରତ ୨୦୦ କୋଟି ଅତିକ୍ରମ କରିଛି। ଏନେଇ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିୟ ରବିବାର ସୂଚନା ଦେଇଛନ୍ତି।
ସ୍ବାସ୍ଥ୍ୟ ମନ୍ତ୍ରଣାଳୟର ତଥ୍ୟ ଅନୁଯାୟୀ, ପାୟ ୯୮% ବୟସ୍କ ଲୋକ ଗୋଟିଏ ଡୋଜ୍ ଟିକା ନେଇଥିବାବେଳେ ୯୦% ସଂପୂର୍ଣ୍ଣ ଟିକାକରଣ କରିଛନ୍ତି। ସେହିପରି ବିଶ୍ୱ ତଥ୍ୟ ଅନୁଯାୟୀ, ବିଶ୍ୱରେ ୬୨.୧ ପ୍ରତିଶତ ଲୋକ ସଂପୂର୍ଣ୍ଣ ଟିକାକରଣ କରିସାରିଛନ୍ତି। ସେହିପରି ୭୧% ଟିକାକରଣ ଗ୍ରାମାଞ୍ଚଳରେ କରାଯାଇଥିବା ବେଳେ ୨୯% ସହରାଞ୍ଚଳରେ କରାଯାଇଛି। ତେବେ ଟିକାକରଣର ମୋଟ୍ ୪୮.୯ ପ୍ରତିଶତ ମହିଳାଙ୍କୁ ଏବଂ ୫୧.୫ ପ୍ରତିଶତ ପୁରୁଷଙ୍କୁ ଦିଆଯାଇଥିବା ନେଇ ସ୍ବାସ୍ଥ୍ୟ ମନ୍ତ୍ରଣାଳୟର ଅଧିକାରୀମାନେ କହିଛନ୍ତି।
ସୂଚନାଯୋଗ୍ୟ, ଟିକାକରଣରେ ୧୦୦ କୋଟି ଅତିକ୍ରମ କରିବାକୁ ୨୭୭ ଦିନ ଲାଗିଥିଲା। ଗତ ବର୍ଷ ସେପ୍ଟେମ୍ବର ୧୭ ତାରିଖରେ ୨.୫ କୋଟି ଟିକାକରଣ କରାଯାଇଥିଲା, ଯାହା ଏ ପର୍ଯ୍ୟନ୍ତ ସର୍ବାଧିକ। ଅନ୍ୟପଟେ, କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ୧୮ରୁ ୫୯ ବୟସ୍କଙ୍କ ପାଇଁ ମାଗଣାରେ ବୁଷ୍ଟର ଡୋଜ୍ ଦିଆଯାଉଛି। ଏହି ମାଗଣା ଟିକାକରଣ ୭୫ ଦିନ ପର୍ଯ୍ୟନ୍ତ ଚାଲିବ।
