ନୂଆଦିଲ୍ଲୀ,୧୨।୩: ଦେଶରେ ନାଗରିକତ୍ୱ ସଂଶୋଧନ ଅଧିନିୟମ (ସିଏଏ)କୁ କେନ୍ଦ୍ର ସରକାର କାର୍ଯ୍ୟକାରୀ କରିଛନ୍ତି। ସରକାରଙ୍କ ଏହି ନିଷ୍ପତ୍ତିକୁ ମୁସଲିମ୍ ରାଷ୍ଟ୍ରୀୟ ମଞ୍ଚ ସ୍ବାଗତ କରିଛନ୍ତି। ଫୋରମ୍ର ଜାତୀୟ ମୁଖପାତ୍ର ଶାହିଦ ସଇଦ କହିଛନ୍ତି ଯେ ବିଶ୍ୱର ଅନେକ ଦେଶରେ ନାଗରିକତ୍ୱ ସଂଶୋଧନ ଆଇନ କାର୍ଯ୍ୟକାରୀ ହୋଇସାରିଛି। ଦେଶର ପ୍ରଗତି ଏବଂ ଶାନ୍ତି ପାଇଁ ଏହି ନିୟମ ଆବଶ୍ୟକ।
ଗତ ବର୍ଷ ଜୁନ ୬ ରୁ ଜୁନ ୧୦ ପର୍ଯ୍ୟନ୍ତ ମୁଖ୍ୟ ପୃଷ୍ଠପୋଷକ ଇନ୍ଦ୍ରେଶ କୁମାରଙ୍କ ଅଧ୍ୟକ୍ଷତାରେ ଭୋପାଳରେ ଅନୁଷ୍ଠିତ ଚାରି ଦିନିଆ କର୍ମଶାଳାରେ ଫୋରମ ୟୁନିଫର୍ମ ସିଭିଲ କୋଡ (ୟୁସିସି) ସମେତ ୧୧ ଟି ପ୍ରସଙ୍ଗରେ ଧ୍ୱନୀମତ ଦେଇ ପ୍ରସ୍ତାବ ପାରିତ କରିଥିଲା। ଏଥିରେ ନାଗରିକତ୍ୱ ସଂଶୋଧନ ଅଧିନିୟମ (ସିଏଏ) ମଧ୍ୟ ଅନ୍ତର୍ଭୁକ୍ତ ଥିଲା ବୋଲି ଶାହିଦ ସଇଦ କହିଛନ୍ତି।
ସେହିଭଳି ରାଷ୍ଟ୍ରୀୟ କନଭେନର ମହମ୍ମଦ ଅଫଜାଲ କହିଛନ୍ତି ସିଏଏ ଲୋକଙ୍କୁ ନାଗରିକତ୍ୱ ଦେଇଥାଏ । ନାକରିକତ୍ୱ ଛଡ଼ାଇ ନେଇ ନ ଥାଏ। ମୁସଲମାନମାନଙ୍କର ଏହା ସହିତ କୌଣସି ସମ୍ପର୍କ ନାହିଁ। ତେଣୁ, ଯଦି ଇସଲାମ ତଥା ମୁସଲମାନମାନଙ୍କର ତଥାକଥିତ ନେତା ତଥା ଧାର୍ମିକ ଠିକାଦାରମାନେ ଘୃଣା, ହିଂସା ଏବଂ ଉତ୍ତେଜନାରେ ଲିପ୍ତ ରହନ୍ତି, ତେବେ ଦେଶର ମୁସଲମାନମାନେ ଏପରି ଅପରାଧୀଙ୍କ ପ୍ରତି ଧ୍ୟାନ ଦେବା ଉଚିତ ନୁହେଁ। କିଛି ରାଜନୈତିକ ଦଳ ଜାତୀୟ ସ୍ବାର୍ଥ ଏବଂ ନିରାପତ୍ତାକୁ ନଷ୍ଟ କରି ରାଜନୀତି କରୁଛନ୍ତି। ନିରୀହ ଲୋକଙ୍କୁ ଉତ୍ତେଜିତ କରିବାକୁ ଚେଷ୍ଟା କରି ଦେଶର ପରିବେଶକୁ ଖରାପ କରିବାକୁ ଚେଷ୍ଟା କରାଯାଉଛି। ଏହା ସାଂଘାତିକ ଏବଂ ଦେଶର ବିକାଶ ପାଇଁ ଚିନ୍ତାଜନକ ବୋଲି ସେ କହିଛନ୍ତି।
ଗୋଟିଏ ପଟେ ମୁସଲିମ୍ ରାଷ୍ଟ୍ରିୟ ମଞ୍ଚ ସିଏଏ ଲାଗୁ କରିବାକୁ ନିଷ୍ପତ୍ତିକୁ ସ୍ବାଗତ କରିଥିବାବେଳେ ଅନ୍ୟ ପଟେ କିଛି ରାଜନୈତିକ ଦଳ ଏହାକୁ ବିରୋଧ କରି ଭାଜପାର ନେତୃତ୍ୱାଧୀନ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ନିର୍ବାଚନ ପୂର୍ବରୁ ସମାଜକୁ ବିଭାଜନ କରିବା ପାଇଁ ଶାସକ ଭାଜପାର ଏହା ଏକ ଷଡଯନ୍ତ୍ର ବୋଲି ଆରଜେଡି କହିଛି। ଜେଡିୟୁ ନେତା ତଥା ଏମ୍.ଏଲ୍.ସି ଖାଲିଦ୍ ଅନୱାର୍ ସିଏଏ ବିଷୟରେ ଭୁଲ ଧାରଣା ଦୂର କରିବାକୁ ଦାବି କରିଛନ୍ତି। ସିଏଏ ହେଉଛି ନିର୍ଦ୍ଧିଷ୍ଟ ପ୍ରକାରର ଲୋକଙ୍କୁ ନାଗରିକତା ଦେବା। ଏହି ନିୟମ ହେତୁ କେହି ନାଗରିକତ୍ୱ ହରାଉ ନାହାଁନ୍ତି ବୋଲି ସେ କହିଛନ୍ତି।
