ନୂଆଦିଲ୍ଲୀ, ୨।୧୧: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ୫ ମ୍ୟାଚ ବିଶିଷ୍ଟ ଦିନିକିଆ ସିରିଜ ଖେଳାଯିବ। ନଭେମ୍ବର ୪ ତାରିଖରେ ଅକଲାଣ୍ଡର ଇଡେନ ପାର୍କରେ ପ୍ରଥମ ମ୍ୟାଚ ଖେଳାଯିବ। ସମସ୍ତଙ୍କ ନଜର ରହିଛି ରୋହିତ ଶର୍ମା ଓ ବିରାଟ କୋହଲିଙ୍କ ଉପରେ। ଉଭୟ ଖେଳାଳି ଜବରଦସ୍ତ ଫର୍ମରେ ଫେରିବା ସହ ୫ଟି ଯାକ ମ୍ୟାଚରେ ଧମାକାଦାର ପ୍ରଦର୍ଶନ କରିବେ ବୋଲି ଆଶା ରହିଛି। ନ୍ୟୁଜିଲାଣ୍ଡ ମାଟିରେ ବିରାଟଙ୍କ ରେକର୍ଡ ମଧ୍ୟ ବେଶ ଭଲ ରହିଛି। ସେହିପରି ରୋହିତ ମଧ୍ୟ ଜବରଦସ୍ତ ଫର୍ମରେ ଅଛନ୍ତି।
ତେବେ ସିରିଜ ଆରମ୍ଭ ହେବା ପୂର୍ବରୁ ଭାରତର ପୂର୍ବତନ କ୍ରିକେଟର ଚେତେଶ୍ୱର ପୂଜାରା ଏକ ବଡ଼ ଭବିଷ୍ୟବାଣୀ କରିଛନ୍ତି। ରୋହିତ ଓ ବିରାଟଙ୍କ ମଧ୍ୟରୁ ନ୍ୟୁଜିଲାଣ୍ଡ ମାଟିରେ କିଏ ଅଧିକ ଶତକ ହାସଲ କରିବେ, ସେନେଇ ସେ ନିଜର ମତ ରଖିଛନ୍ତି।
ଜିଓଷ୍ଟାରରେ ଭାରତ-ନ୍ୟୁଜିଲାଣ୍ଡ ସିରିଜକୁ ନେଇ ଆଲୋଚନା କରିବା ସମୟରେ ପୂଜାରା ବିରାଟ କୋହଲି ଓ ରୋହିତ ଶର୍ମାଙ୍କ ପ୍ରଦର୍ଶନ ସମ୍ପର୍କରେ ମତ ଦେଇଥିଲେ। ତାଙ୍କ କହିବା ଅନୁସାରେ, ରୋହିତଙ୍କ ତୁଳନାରେ ବିରାଟ ଅଧିକ ଶତକ ହାସଲ କରିପାରନ୍ତି।
ପୂଜାରା କହିଛନ୍ତି, ପାୱାରପ୍ଲେରେ ଦଳକୁ ଭଲ ଆରମ୍ଭ ଦେବାର ଦାୟିତ୍ୱ ରୋହିତ ଶର୍ମାଙ୍କ ଉପରେ ରହିଥାଏ। ଯଦି ନ୍ୟୁଜିଲାଣ୍ଡରେ ତାଙ୍କର ଏହି ଭୂମିକାରେ ପରିବର୍ତ୍ତନ ହୁଏ, ତେବେ ସେ ଶତକ ହାସଲ କରିପାରିବେ। କିନ୍ତୁ ବିରାଟ କୋହଲିଙ୍କ ପାଖରେ ଶତକ ମାରିବାର ସମ୍ଭାବନା ଟିକେ ଅଧିକ ରହିଛି। ସେ ୩ ନମ୍ବରରେ ବ୍ୟାଟିଂ କରନ୍ତି। ଇନିଂସକୁ ମଜଭୁତ କରିବା ତାଙ୍କର ଦାୟିତ୍ୱ। ଦିନିକିଆରେ ୩ ନମ୍ବରରେ ବ୍ୟାଟିଂ କରୁଥିବା ଖେଳାଳିଙ୍କ ପାଖରେ ଶତକ ହାସଲ କରିବାର ପୂରା ସୁଯୋଗ ରହିଥାଏ। ସେମାନଙ୍କ ପାଇଁ ପରିସ୍ଥିତି ମଧ୍ୟ ଟିକେ ସହଜ ରହେ। ମୋ ମତରେ ନ୍ୟୁଜିଲାଣ୍ଡରେ ରୋହିତଙ୍କ ତୁଳନାରେ ବିରାଟ ଅଧିକ ଶତକ ହାସଲ କରିବାର ସମ୍ଭାବନା ରହିଛି।
ଏହି ଦିନିକିଆ ସିରିଜରେ ଫଳାଫଳକୁ ନେଇ ମଧ୍ୟ ପୂଜାରା ଭବିଷ୍ୟବାଣୀ କରିଛନ୍ତି। ତାଙ୍କ ମତରେ, ୫ ମ୍ୟାଚ ବିଶିଷ୍ଟ ସିରିଜ ୨-୨ରେ ରହିପାରେ। ଏହା ସହ ବର୍ଷା ଯୋଗୁ ଗୋଟିଏ ମ୍ୟାଚ ବାତିଲ ହେବାର ମଧ୍ୟ ସମ୍ଭାବନା ରହିଛି।
ପୂଜାରା କହିଛନ୍ତି, ଦିନିକିଆ ସିରିଜ ୨-୨ରେ ରହିପାରେ। ଭାରତ ଦୁଇଟି ଭିନ୍ନ ଦଳ ସହ ଖେଳିବ। ପ୍ରଥମ ୩ଟି ମ୍ୟାଚରେ ଦଳ ଅଲଗା ରହିବ। ଏହାପରେ ଶେଷ ୨ଟି ମ୍ୟାଚରେ ମଧ୍ୟ ପରିବର୍ତ୍ତନ ହେବ। ମୋ ମତରେ ଏହା ନ୍ୟୁଜିଲାଣ୍ଡକୁ ଫାଇଦା ଦେବ। ପ୍ରଥମ ୩ଟି ମ୍ୟାଚରେ ଭାରତର ଦବଦବା ଦେଖିବାକୁ ମିଳିବ। କିନ୍ତୁ ଶେଷ ୨ଟି ମ୍ୟାଚରେ ଟିମ ଇଣ୍ଡିଆକୁ ଚ୍ୟାଲେଞ୍ଜର ସାମ୍ନା କରିବାକୁ ପଡ଼ିପାରେ। ନ୍ୟୁଜିଲାଣ୍ଡରେ ଯେକୌଣସି ସମୟରେ ବର୍ଷା ହୋଇପାରେ। ତେଣୁ ଗୋଟିଏ ମ୍ୟାଚ ବାତିଲ ହେବାର ସମ୍ଭାବନା ମଧ୍ୟ ରହିଛି।
