ନୂଆଦିଲ୍ଲୀ,୨।୮: ଦିଲ୍ଲୀରେ ମଙ୍ଗଳବାର ହୋଇଥିବା ଶିଖର ସମ୍ମିଳନୀ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମାଳଦ୍ୱୀପ ରାଷ୍ଟ୍ରପତି ଇବ୍ରାହିମ ସୋଲିହଙ୍କ ମଧ୍ୟରେ ଦୁଇ ଦେଶ ୬ଟି ଚୁକ୍ତିନାମା ସ୍ବାକ୍ଷର କରିଛନ୍ତି। ନିର୍ମାଣ କ୍ଷମତା, ସାଇବର ସୁରକ୍ଷା, ଗୃହ, ବିପର୍ଯ୍ୟୟ ପରିଚାଳନା ଏବଂ ଭିତ୍ତିଭୂମି କ୍ଷେତ୍ରରେ ସହଯୋଗ ବୃଦ୍ଧି ପାଇଁ ଦୁଇ ଦେଶ ମଧ୍ୟରେ ଚୁକ୍ତିନାମା ସ୍ବାକ୍ଷରିତ ହୋଇଛି। ଶିଖର ସମ୍ମିଳନୀ ପରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ମାଳଦ୍ୱୀପକୁ ୧୦୦ମିଲିୟନ ଡଲାରର ଅତିରିକ୍ତ ଋଣ ସୁବିଧା ପ୍ରଦାନ କରିବାକୁ ନିଷ୍ପତ୍ତି ନିଆଯାଇଛି। ଯାହା ଦ୍ୱାରା ସମସ୍ତ ପ୍ରକଳ୍ପଗୁଡ଼ିକ ଠିକ୍ ସମୟରେ ଶେଷ ହୋଇପାରିବ। ଏଥିସହ ସେ କହିଛନ୍ତି, ଭାରତ ମହାସାଗରରେ ଅନ୍ତର୍ଜାତୀୟ ଅପରାଧ, ଆତଙ୍କବାଦ ଏବଂ ଡ୍ରଗ କାରବାର ବିପଦ ରହିଛି। ତେଣୁ ଶାନ୍ତି ପାଇଁ ଭାରତ-ମାଳଦ୍ୱୀପ ମଧ୍ୟରେ ଘନିଷ୍ଠ ସମ୍ପର୍କ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି। ଅନ୍ୟପଟେ
ମାଳଦ୍ୱୀପ ରାଷ୍ଟ୍ରପତି ସୋଲିହ କହିଛନ୍ତି, ଆତଙ୍କବାଦର ମୁକାବିଲା ପାଇଁ ଆମେ ଆମର ଦୃଢ଼ ପ୍ରତିବଦ୍ଧତାକୁ ଦୋହରାଇଛୁ। ସେ କହିଛନ୍ତି, ମାଳଦ୍ୱୀପ ସର୍ବଦା ଭାରତର ପ୍ରକୃତ ବନ୍ଧୁ ହୋଇ ରହିବ। ସୂଚନାଯୋଗ୍ୟ, ଏକ ଉଚ୍ଚ ସ୍ତରୀୟ ପ୍ରତିନିଧୀଙ୍କ ସହ ଚାରି ଦିନିଆ ଭାରତ ଗସ୍ତରେ ସୋଲିହ ସୋମବାର ଦିଲ୍ଲୀରେ ପହଞ୍ଚିଛନ୍ତି।
