ବ୍ରିସ୍ବେନ୍,୧୯।୧: ଭାରତ ଓ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ଚତୁର୍ଥ ତଥା ଅନ୍ତିମ ଟେଷ୍ଟ ଭାରତ ଐତିହାସିକ ବିଜୟ ହାସଲ କରିଛି। ଶୁବମନ ଗିଲଙ୍କ ୯୧ ରନ୍ ପରେ ରିଷଭ ପନ୍ତଙ୍କ ଧୈର୍ଯ୍ୟପୂର୍ଣ୍ଣ ବ୍ୟାଟିଂ ଯୋଗୁ ଭାରତ ସିରିଜ୍ ୨-୧ରେ ଜିତିଛି। ଅନେକ ଖେଳାଳିଙ୍କ ଆଘାତ ସତ୍ତ୍ୱେ ଭାରତୀୟ ଦଳ ଅଷ୍ଟ୍ରେଲିଆ ଗସ୍ତରେ ନିଜର ନିଷ୍ଠା ଏବଂ ଉତ୍ସାହ ଦେଖାଇଛି। ଚତୁର୍ଥ ତଥା ଅନ୍ତିମ ଟେଷ୍ଟ ମ୍ୟାଚରେ ଭାରତ ସେମାନଙ୍କର ଅଗ୍ରଣୀ ଦ୍ରୁତ ବୋଲର, ଅଧିନାୟକ ବିରାଟ କୋହଲି ଏବଂ କିଛି ବିଶେଷଜ୍ଞ ବ୍ୟାଟ୍ସମ୍ୟାନଙ୍କ ବିନା ଖେଳୁଥିଲା। ତଥାପି ଯୁବ କ୍ରିକେଟର୍ଙ୍କ ନିଷ୍ଠା ଯୋଗୁ ଭାରତ ସିରିଜ୍ ଜିତିବାରେ ସକ୍ଷମ ହୋଇଛି। ମ୍ୟାଚର ଚତୁର୍ଥ ଦିବସ ଖେଳ ଶେଷ ସୁଦ୍ଧା ଅଷ୍ଟ୍ରେଲିଆ ୨ୟ ଇନିଂସରେ ୨୯୪ ରନରେ ଅଲଆଉଟ ହୋଇଥିଲା ଏବଂ ଭାରତ ଆଗରେ ୩୨୮ ରନର ଟାର୍ଗେଟ ଛିଡା କରିଥିଲା। ଭାରତ ୭ ଉଇକେଟ୍ ହରାଇ ଲକ୍ଷ ସ୍ଥଳରେ ପହଞ୍ଚିଥିଲା। ନିଜ ଘରେ ଟେଷ୍ଟ ସିରିଜରେ ଭାରତ ଦ୍ୱିତୀୟ ଥର ପାଇଁ ଅଷ୍ଟ୍ରେଲିଆକୁ ପରାସ୍ତ କରିଛି। ଶେଷ ଥର ପାଇଁ ଭାରତ ନିଜ ଘରେ ୨୦୧୮-୧୯ ଟେଷ୍ଟ ସିରିଜରେ ଅଷ୍ଟ୍ରେଲିଆକୁ ୨-୧ରେ ପରାସ୍ତ କରିଥିଲା । ଭାରତୀୟ ଦଳ କ୍ରମାଗତ ତୃତୀୟ ଥର ପାଇଁ ବର୍ଡର-ଗାଭାସ୍କର ଟ୍ରଫିରେ ବିଜୟର ହ୍ୟାଟ୍ରିକ ଜିତିିଛି। ଏହାପୂର୍ବରୁ ଭାରତ ଶେଷ ଦୁଇଟି ସିରିଜ ଜିତି ବର୍ଡର-ଗାଭାସ୍କର ଟ୍ରଫିକୁ କବଜା କରିଥିଲା। ୨୦୧୮-୧୯ରେ ଅଷ୍ଟ୍ରେଲିଆ ଗସ୍ତରେ ଭାରତ ୨-୧ ଜିତିଥିଲା ଏବଂ ଏହାପୂର୍ବରୁ ୨୦୧୬-୧୭ରେ ଭାରତ ଅଷ୍ଟ୍ରେଲିଆକୁ ନିଜ ଘରେ ସମାନ ବ୍ୟବଧାନରେ ପରାସ୍ତ କରିଥିଲା।
