ନୂଆଦିଲ୍ଲୀ,୩୦ା୭: ମାଇକ୍ରୋବ୍ଲଗିଂ ସାଇଟ୍ ଟୁଇଟର୍ରେ ଖବରଦାତା ଓ ଗଣମାଧ୍ୟମ ସଂସ୍ଥାଗୁଡ଼ିକର ପୋଷ୍ଟ ହଟାଇବା ପାଇଁ ଦାବି କରିବାରେ ବିଶ୍ୱରେ ଭାରତ ସବୁଠୁ ଆଗରେ ରହିଛି। ସେହିପରି ଟୁଇଟର ଆକାଉଣ୍ଟ ସୂଚନା ମାଗିବାରେ ଆମେରିକା ପରେ ଭାରତ ହେଉଛି ଦ୍ୱିତୀୟ। ଟୁଇଟର କମ୍ପାନୀକୁ ଭାରତ ସରକାର ମାଗିଥିବା ଏହି ତଥ୍ୟ ମୋଟ ବୈଶ୍ୱିକ ଅନୁରୋଧର ୧୯% ବୋଲି ସଦ୍ୟ ପ୍ରକାଶିତ ଏକ ରିପୋର୍ଟରେ ପ୍ରଘଟ ହୋଇଛି।
ଟୁଇଟର୍ର ଟ୍ରାନ୍ସପରେନ୍ସି ରିପୋର୍ଟରେ ଦର୍ଶାଯାଇଛି ଯେ, ୨୦୨୧ ଜୁଲାଇରୁ ଡିସେମ୍ବର ମଧ୍ୟରେ ଭାରତ ସରକାର ଖବରଦାତା ଓ ଗଣମାଧ୍ୟମ ସଂସ୍ଥାଗୁଡ଼ିକ ପକ୍ଷରୁ କରାଯାଇଥିବା ଟୁଇଟ୍ଗୁଡ଼ିକୁ ହଟାଇବା ପାଇଁ ସର୍ବାଧିକ ଦାବି କରିଥିଲେ। ସବୁ ପ୍ରକାର ୟୁଜର୍ସଙ୍କ କଣ୍ଟେଣ୍ଟ ବ୍ଲକିଂ ପାଇଁ ଅର୍ଡର ଜାରି କରିଥିବା ୫ ରାଷ୍ଟ୍ର ମଧ୍ୟରେ ଭାରତର ସ୍ଥାନ ପ୍ରଥମରେ ରହିଛି। ସାରା ବିଶ୍ୱର ଖବରଦାତାଙ୍କ ଓ ନ୍ୟୁଜ୍ ଆଉଟ୍ଲେଟ୍ର ୩୪୯ ଭେରିଫାଏଡ୍ ଆକାଉଣ୍ଟ ବିରୋଧରେ ବିଭିନ୍ନ ରାଷ୍ଟ୍ର ଆପତ୍ତି ଉଠାଇଥିଲେ। ସେଗୁଡ଼ିକରୁ କରାଯାଇଥିବା ପୋଷ୍ଟ ହଟାଇବା ପାଇଁ ମୋଟ ୩୨୬ ଲିଗାଲ ଡିମାଣ୍ଡ (ଆଇନଗତ ଦାବି) କରାଯାଇଥିଲା। ୨୦୨୧ ଜାନୁୟାରୀରୁ ଜୁନ୍ ମଧ୍ୟରେ କରାଯାଇଥିବା ଦାବି ତୁଳନାରେ ଏଥିରେ ୧୦୩% ବୃଦ୍ଧି ଦେଖିବାକୁ ମିଳିଥିଲା। ଏହି କ୍ଷେତ୍ରରେ ସର୍ବାଧିକ ୧୧୪ ଦାବି କରିଥିବା ରାଷ୍ଟ୍ର ହେଉଛି ଭାରତ। ସେହିପରି ତୁର୍କୀ ୭୮, ରୁଷିଆ ୫୫ ଓ ପାକିସ୍ତାନ ପକ୍ଷରୁ ୪୮ ଥର ଅନୁରୂପ ଦାବି କରାଯାଇଥିବା ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି। ୨୦୨୧ ଜାନୁୟାରୀ-ଜୁନ୍ ତାଲିକାରେ ମଧ୍ୟ ଭାରତ ସର୍ବାଗ୍ରେ ରହିଛି। ଏହି ଅବଧି ମଧ୍ୟରେ ସୋସିଆଲ ମିଡିଆ ପ୍ଲାଟ୍ଫର୍ମ ନିକଟରେ ସାରା ବିଶ୍ୱରୁ ୨୩୧ ଦାବି କରାଯାଇଥିଲା, ଯହିଁରୁ ଭାରତର ଲିଗାଲ ଡିମାଣ୍ଡ ସଂଖ୍ୟା ହେଉଛି ୮୯। ଅଦାଲତଙ୍କ ରାୟ ସମେତ ଉଭୟ ସରକାରୀ ସଂସ୍ଥା ଓ ବ୍ୟକ୍ତିବିଶେଷଙ୍କ ପ୍ରତିନିଧିତ୍ୱ କରୁଥିବା ଓକିଲଙ୍କ ପରାମର୍ଶ ଏହି ଆଇନଗତ ଦାବିଗୁଡ଼ିକ ମଧ୍ୟରେ ଅନ୍ତର୍ଭୁକ୍ତ। ୨୦୨୧ ଜାନୁୟାରୀ-ଜୁନ୍ରେ ବିଶ୍ୱର ଖବରଦାତା ଓ ଗଣମାଧ୍ୟମ ସଂସ୍ଥାଗୁଡ଼ିକର ୧୧ ଟୁଇଟ୍ ହଟାଯାଇଥିବାବେଳେ ଦ୍ୱିତୀୟାର୍ଦ୍ଧରେ ଏହା ୧୭କୁ ବୃଦ୍ଧି ପାଇଥିଲା।
ଗତ ବର୍ଷ ବଳାତ୍କାର ଶିକାର ହୋଇଥିବା ଜଣେ ଦଳିତ ନାବାଳିକାଙ୍କ ଫଟୋକୁ କଂଗ୍ରେସ ନେତା ରାହୁଲ ଗାନ୍ଧୀ ଟୁଇଟ୍ କରିଥିଲେ। ଏହା ଉପରେ ଟୁଇଟର ପକ୍ଷରୁ କୁହାଯାଇଛି ଯେ, ଭାରତର ଜାତୀୟ ଶିଶୁ ଅଧିକାର ସୁରକ୍ଷା ଆୟୋଗ(ଏନ୍ସିପିସିଆର୍) ମଧ୍ୟ ଜଣେ ଶିଶୁଙ୍କ ପ୍ରିଭେସି ପ୍ରସଙ୍ଗ ସମ୍ପର୍କିତ ଏକ ଟୁଇଟ୍ ହଟାଇବାକୁ କମ୍ପାନୀ ନିକଟରେ ଲିଗାଲ ଡିମାଣ୍ଡ କରିଥିଲେ। ସେହିପରି ଟୁଇଟର ଆକାଉଣ୍ଟ ସମ୍ପର୍କିତ ସୂଚନା ମାଗିବାରେ ଆମେରିକା ପରେ ଭାରତ ହେଉଛି ଦ୍ୱିତୀୟ। ଆମେରିକା ଏଭଳି ୨୦% ସୂଚନା ମାଗିଥିବାବେଳେ ଭାରତ ୧୯% ତଥ୍ୟ ଦାବି କରିଥିଲା। ଏହି କ୍ଷେତ୍ରରେ ଜାପାନ, ଫ୍ରାନ୍ସ ଓ ଜର୍ମାନୀ ମଧ୍ୟ ଶୀର୍ଷ ୫ ରାଷ୍ଟ୍ର ମଧ୍ୟରେ ରହିଛନ୍ତି।
