ନୂଆଦିଲ୍ଲୀ, ୧୭ା୮: ଚାଇନା ପଟୁ ବଢ଼ୁଥିବା ଚ୍ୟାଲେଞ୍ଜକୁ ସାମ୍ନା କରିବା ପାଇଁ ଭାରତୀୟ ସେନା ଲଦାଖ ନିକଟରେ ସାମରିକ କ୍ଷମତା ବଢ଼ାଇଛି। ବାସ୍ତବ ନିୟନ୍ତ୍ରଣ ରେଖା (ଏଲ୍ଏସି) ନିକଟ ପ୍ୟାଙ୍ଗୋଙ୍ଗ୍ ହ୍ରଦରେ ଲ୍ୟାଣ୍ଡିଂ କ୍ରାଫ୍ଟ ଆସଲ୍ଟ (ଏଲ୍ସିଏ) ଯୁଦ୍ଧପୋତ ମୁତୟନ କରିଛି। ପୂର୍ବ ଲଦାଖରେ ଭାରତର ସାମରିକ ଗତିବିଧି ବଢ଼ାଇବାରେ ଏହି ଜାହାଜ ବେଶ୍ ଉପଯୋଗୀ ହେବ। ଲ୍ୟାଣ୍ଡିଂ କ୍ରାଫ୍ଟ ଆସଲ୍ଟ ଏକାଧିକ କାର୍ଯ୍ୟ କରିବାରେ ଦକ୍ଷ। ସ୍ବଦେଶୀ ଜ୍ଞାନକୌଶଳରେ ଆକ୍ୱାରିୟସ୍ ଶିପ୍ ୟାର୍ଡ ଲିମିଟେଡ୍, ଗୋଆ, ଦ୍ୱାରା ନିର୍ମିତ ଏଲ୍ସିଏର ବେଗ, ସହଜ ଅବତରଣ, ଅଧିକ ପରିବହନ କ୍ଷମତା ଆଦି ବଢ଼ାଯାଇଛି। ଏଥିରେ ଏକସଙ୍ଗରେ ୩୫ ସୈନ୍ୟ ଯାଇପାରିବେ ଏବଂ ବହୁତ କମ୍ ସମୟରେ ଏହା ହ୍ରଦର ଯେ କୌଣସି ସ୍ଥାନରେ ପହଞ୍ଚିବାକୁ ସକ୍ଷମ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଙ୍ଗଳବାର ସ୍ବଦେଶୀ ଜ୍ଞାନକୌଶଳରେ ନିର୍ମିତ ଏକାଧିକ ସାମରିକ ବ୍ୟବସ୍ଥା ସେନାକୁ ହସ୍ତାନ୍ତର କରିଛନ୍ତି। ସେଥିମଧ୍ୟରେ ଏଲ୍ସିଏ ସମେତ ମାନବରହିତ ଏରିଅଲ ସିଷ୍ଟମ, ଦ୍ରୁତ ପ୍ରତିକ୍ରିୟାଶୀଳ ଯୁଦ୍ଧବାହନ, ପାଟ୍ରୋଲ ବୋଟ୍, ସର୍ଭେଲାନ୍ସ ଉପକରଣ ଆଦି ପୂର୍ବ ଲଦାଖରେ ମୁତୟନ କରି ସେଠାରେ ଭାରତୀୟ ସେନାର ଗତିବିଧି ବଢ଼ାଇବା ଲକ୍ଷ୍ୟ ରହିଛି।
କିଲୋମିଟର ଦୀର୍ଘ ଏବଂ ପ୍ରାୟ ୧୩,୯୦୦ ଫୁଟ୍ ଉଚ୍ଚତାରେ ଥବା ପ୍ୟାଙ୍ଗୋଙ୍ଗ୍ ସୋ ହ୍ରଦ ରଣନୈତିକ ଦୃଷ୍ଟିକୋଣରୁ ଗୁରୁତ୍ୱପୂର୍ଣ୍ଣ ହୋଇଥିବାବେଳେ ଚାଇନା ଏହାର ଦୁଇ-ତୃତୀୟାଂଶ ଭାଗକୁ ନିୟନ୍ତ୍ରଣରେ ରଖିଛି। ଏହାକୁ ଦୃଷ୍ଟିରେ ରଖି ଭାରତୀୟ ସେନା ଗତ ବର୍ଷ ୧୨ଟି ଏଲ୍ସିଏ ଜାହାଜ ମଗାଇଥିଲା। ଉତ୍ତର ସୀମାରେ ମୁତୟନ ହୋଇଥିବା ସୈନ୍ୟଙ୍କୁ ସୁରକ୍ଷା ଯୋଗାଯିବା ସହ ସେଠାରେ ପାଟ୍ରୋଲିଂ ବୃଦ୍ଧି ନିମନ୍ତେ ଇନ୍ଫାଣ୍ଟ୍ରି ପ୍ରୋଟେକ୍ଟେଡ୍ ମୋବିଲିଟି ଭେହିକିଲ(ଆଇପିଏମ୍ଭି) ଏବଂ କୁଇକ୍ ରିଆକ୍ସନ ଫାଇଟିଂ ଭେହିକିଲ (କ୍ୟୁଆର୍ଏଫ୍ଭି) ମୁତୟନ କରାଯାଇଛି। ବାୟୁସେନା ବିମାନ, ହେରନ୍ ୟୁଏଭିଗୁଡ଼ିକ ନିର୍ଦ୍ଦିଷ୍ଟ ସ୍ତରରେ କାର୍ଯ୍ୟ କରିବା ପାଇଁ ସୀମିତ। ତେଣୁ ସର୍ଭେଲାନ୍ସ ଦକ୍ଷତା ବଢ଼ାଇବା ପାଇଁ ମିନି ରିମୋଟ୍ଲି ପାଇଲଟେଡ୍ ଏରିଆଲ୍ ସିଷ୍ଟମ (ଆର୍ପିଏଏସ୍)କୁ ନିୟୋଜିତ କରାଯାଇଛି। ସିଆଚେନ୍ ଭଳି ଅତ୍ୟଧିକ ଥଣ୍ଡା ସ୍ଥାନରେ ଭାରତୀୟ ସେନାର ଗତିବିଧି ମଜଭୁତ କରିବା ପାଇଁ ସେଠାରେ ସୌରଶକ୍ତି ପ୍ରକଳ୍ପ କାର୍ଯ୍ୟକ୍ଷମ ଯୋଜନା କରାଯାଇଛି। ଏଥିନିମନ୍ତେ ଏକ ସୋଲାର ଫଟୋ-ଭୋଲ୍ଟାଇକ୍ ପ୍ଲାଣ୍ଟ ସ୍ଥାପନ ହୋଇଛି। ଫ୍ୟୁଚର ଇନ୍ଫାଣ୍ଟ୍ରି ସୋଲ୍ଜର ଆଜ୍ ଏ ସିଷ୍ଟମ(ଏଫ୍-ଇନ୍ସାସ୍) ଅଧୀନରେ ସ୍ୟୈନିକଙ୍କୁ ଡେ-ନାଇଟ୍ ହୋଲୋଗ୍ରାଫିକ୍ ଏବଂ ରିଫ୍ଲେକ୍ସ ସାଇଟ୍ ସହ ଏକେ-୨୦୩ ରାଇଫଲ୍ ପ୍ରଦାନ କରାଯିବ ବୋଲି ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
