ସାମ୍ପ୍ରତିକ ସ୍ଥିତିରେ ଭାରତ

ରୁଷିଆ- ୟୁକ୍ରେନ ଯୁଦ୍ଧର ଘନଘଟା ଭିତରେ ବିଶ୍ବ ଏକ ସଂକଟମୟ ସ୍ଥିତିରେ ଉପନିତ। ଏଭଳି ସ୍ଥିତିରେ ଆଉ ଏକ ମହାଯୁଦ୍ଧ ମୁହାଁ ହେଉଛି ବିଶ୍ବ। କାରଣ ୧୯୪୫ ଦ୍ବିତୀୟ ବିଶ୍ବଯୁଦ୍ଧ ପରେ ବିଶ୍ବରେ ସବୁଠୁ ଭୟଙ୍କର ଯୁଦ୍ଧ ଭାବେ ବର୍ତ୍ତମାନର ରୁଷିଆର ୟୁକ୍ରେନ ଯୁଦ୍ଧକୁ ବିବେଚନା କରାଯାଉଛି। ଉଭୟ ଦେଶର ଏହି ଯୁଦ୍ଧକୁ ପ୍ରଶମିତ କରିବାରେ ଜାତିସଂଘ ମଧ୍ୟ ବିଫଳ ହୋଇଛି। କେବଳ ଜାତିସଂଘ କାହିଁକି ବିଶ୍ବର ଶକ୍ତିଶାଳୀ ଆଉ କ୍ଷମତାଶାଳୀ ଦେଶ ସମୂହଙ୍କ ସଂଗଠନ ନାଟୋ, ୟୁରୋପୀୟ ସଂଘ, ଜି -୭, ଜି -୨୦, କ୍ବାର୍ଡ ଦେଶ ସମୂହ ଏକପ୍ରକାର ବିଫଳ। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କ ଯୁଦ୍ଧ ଜିଣିବାର ଉଗ୍ର ଅଭିପ୍ରାୟ, ୟୁକ୍ରେନ ରାଷ୍ଟ୍ରପତି ଭୋଲଡିମିର ଜେଲନ୍‌ସ୍କିଙ୍କ ଯୁଦ୍ଧ ନ ହାରିବାର ଦୃଢ଼ ପ୍ରତିଜ୍ଞା ଏହି ସମରକୁ ଅଧିକ ଖୋରାକ ଯୋଗାଇ ଚାଲିଛି। ଏପରି କି ୟୁକ୍ରେନ ପରେ ଏବେ ପୋଲାଣ୍ଡ, ଫିନ୍‌ଲାଣ୍ଡ ଭଳି ଦେଶ ଉପରେ ଆକ୍ରମଣ କରିବାକୁ ଚେତାବନୀ ମଧ୍ୟ ଦେଇଛି ରୁଷିଆ। ପୋଲାଣ୍ଡ ଓ ବୁଲଗେରିଆକୁ ଗ୍ୟାସ ଓ ତୈଳ ରପ୍ତାନି ବନ୍ଦ କରିସାରିଲାଣି ରୁଷିଆ। ଏପ୍ରିଲ ୨୫ରେ ଆମେରିକାର ବରିଷ୍ଠ ପ୍ରତିରକ୍ଷା ଅଧିକାରୀଙ୍କ ୟୁକ୍ରେନ ଗସ୍ତ ପରେ ରୁଷିଆ ଆମେରିକାକୁ ଚ୍ୟାଲେଞ୍ଜ ଦେବା ଛଳରେ ୟୁକ୍ରେନକୁ କୌଣସି ସହଯୋଗ ନ କରିବାକୁ ଚେତାବନୀ ଦେଇଛି। ରୁଷିଆ ବୈଦେଶିକ ମନ୍ତ୍ରୀ ସେର୍ଗୀ ଲାଭରଭ ମଧ୍ୟ ସିଧା ସିଧା ନାଟୋ ଦେଶକୁ ଆକ୍ଷେପ କରି କହିଛନ୍ତି ଯେ, ସେମାନେ ରୁଷିଆର ସବୁଠୁ ବଡ଼ ଶତ୍ରୁ। ଇଂଲଣ୍ଡ, ଫ୍ରାନ୍ସ, ଆମେରିକା ରୁଷିଆ ଉପରେ ଅନେକ କଡ଼ା ଆର୍ଥିକ ପ୍ରତିବନ୍ଧକ ଲଗାଇଛନ୍ତି। ଜାତିସଂଘର ମାନବାଧିକାର ସଂଗଠନ, ବିଶ୍ବ ପର୍ଯ୍ୟଟନ ସଂଘରୁ ରୁଷିଆକୁ ବହିସ୍କାର କରାଯାଇଛି। ଏତେ ସବୁ ପରେ ବି ରୁଷିଆ ୟୁକ୍ରେନ ଉପରେ ଆକ୍ରମଣ ବନ୍ଦ କରୁନାହିଁ।
ୟୁକ୍ରେନ ଉପରେ ରୁଷିଆ ଆକ୍ରମଣକୁ ନେଇ ଭାରତ କୌଣସି ଖୋଲା ମନ୍ତବ୍ୟ ଦେଇନି। କେବଳ ଯୁଦ୍ଧ ପାଇଁ ସୃଷ୍ଟି ହୋଇଥିବା ମାନବୀୟ ସଂକଟ ଓ ସାଧାରଣ ଲୋକଙ୍କ ଉପରେ ଆକ୍ରମଣକୁ ଭାରତ ନିନ୍ଦା କରିଛି। ସେହିପରି ସୁପର ପାୱାରର ନକଲି ଖୋଳପା ପିନ୍ଧିଥିବା ଯୁକ୍ତରାଷ୍ଟ୍ର ଆମେରିକା ଭାରତର ରୁଷିଆ ପ୍ରୀତିକୁ ନେଇ ବାରମ୍ବାର ସମାଲୋଚନା କରୁଛି। ରୁଷିଆରୁ ତୈଳ ଆମଦାନୀ ନ କରିବାକୁ ଭାରତକୁ ଚେତାବନୀ ଦେଇସାରିଛି ଆମେରିକା। ଅନ୍ୟପଟେ ନିଜର ୟୁରୋପୀୟ ବନ୍ଧୁରାଷ୍ଟ୍ରମାନଙ୍କୁ ରୁଷିଆରୁ ତୈଳ ଆମଦାନୀରୁ ନିବୃତ୍ତ ରହିବାକୁ ପରାମର୍ଶ ଦେଲେ ଭଲ ହେବ ବୋଲି ଆମେରିକାକୁ ସିଧା ଚେତାଇ ଦେଇଛି ଭାରତ। ରୁଷିଆ-ୟୁକ୍ରେନ ଯୁଦ୍ଧ ରୋକିବାରେ ଆମେରିକା କ’ଣ ରଣନୀତି ପ୍ରସ୍ତୁତ କରିଛି ତାହା ବିଶ୍ବକୁ ସ୍ପଷ୍ଟ କରିବାକୁ ଭାରତ ଆମେରିକାକୁ କହିଛି। ତାଲିବାନ ନିୟନ୍ତ୍ରିତ ଆଫଗାନିସ୍ତାନରେ ଗଣତନ୍ତ୍ର ପ୍ରତିଷ୍ଠା ପାଇଁ ନିଜଆଡୁ ମୁଣ୍ଡ ଖେଳାଇ ବିଫଳ ହୋଇ ଫେରିଥିବା ଆମେରିକା ପ୍ରଶାସନ ନିଜ ଦେଶର ସୈନ୍ୟଙ୍କୁ ଆଉ ସିଧାସଳଖ ରୁଷିଆ-ୟୁକ୍ରେନ ଯୁଦ୍ଧରେ ସାମିଲ କରି ଅପନିନ୍ଦା ନେବାକୁ ଚାହୁଁନି। ଏପରି କି ରାଷ୍ଟ୍ରପତି ଟ୍ରମ୍ପଙ୍କ ଶାସନକାଳରେ ଆମେରିକା ଫାଷ୍ଟ ନୀତିକୁ ବାଧ୍ୟ ହୋଇ ଆପଣେଇଛନ୍ତି ରାଷ୍ଟ୍ରପତି ବାଇଡେନ। ତେଣୁ ଅନ୍ୟଦେଶର ଆଭ୍ୟନ୍ତରୀଣ ମାମଲାରେ ଆଉ ହସ୍ତକ୍ଷେପ କରିବାକୁ ଚାହୁଁନି ଆମେରିକା। ୟୁକ୍ରେନ ରାଷ୍ଟ୍ରପତିଙ୍କୁ କେବଳ ମିଛ ପ୍ରତିଶ୍ରୁତି ଦେଇ କାଗଜ ବାଘର ଅଭିନୟ କରିଚାଲିଛି ଆମେରିକା। ସେପଟେ ବିଶ୍ବ କୂଟନୀତିରେ ଭାରତର ପ୍ରଭାବ ବୃଦ୍ଧି ଆମେରିକାକୁ ମଧ୍ୟ ହଜମ ହେଉନି।
ଚଳିତବର୍ଷ ଭାରତ ଗସ୍ତରେ ବିଶ୍ବର ପ୍ରାୟ ୧୮ଟି ଦେଶର ପ୍ରତିନିଧି ଆସିବା ସହ ଦ୍ବିପାକ୍ଷିକ ସମ୍ପର୍କ, ବିଶ୍ବ କୂଟନୀତିରେ ଭାରତର ପ୍ରାଧାନ୍ୟ ନେଇ ଆଲୋଚନା କରି ସକାରାତ୍ମକ ମନ୍ତବ୍ୟ ଦେଇ ଫେରିଛନ୍ତି। ମହାଯୁଦ୍ଧ ମୁହାଁ ହେଉଥିବା ବିଶ୍ବ ସଂକଟ ସ୍ଥିତିରେ ଥିବାବେଳେ ଭାରତର ବଳିଷ୍ଠ କୂଟନୀତି ଆଉ ନିରପେକ୍ଷତା ନୀତି ଆପଣାଇଛି। ଯୁଦ୍ଧଗ୍ରସ୍ତ ରୁଷିଆ ଭାରତ ଠାରୁ ସହଯୋଗ ସ୍ବରୂପ ଯୁଦ୍ଧାସ୍ତ୍ର ନୁହେଁ ବରଂ ଔଷଧ, ସ୍ବାସ୍ଥ୍ୟ ଉପକରଣର ସହଯୋଗ ଲୋଡିଛି। ଜାତିସଂଘରେ ରୁଷିଆ-ୟୁକ୍ରେନ ଯୁଦ୍ଧ ପ୍ରସଙ୍ଗରେ ଭାରତ ନିଜର ନିରପେକ୍ଷତା ସ୍ପଷ୍ଟ କରିଛି। ରୁଷିଆ ବିରୋଧରେ କଟକଣା ପାଇଁ ଜାତିସଂଘରେ ହୋଇଥିବା ଭୋଟିଂରୁ ଭାରତ ନିବୃତ୍ତ ରହିଛି। ରୁଷିଆ ୟୁକ୍ରେନ ଯୁଦ୍ଧ, କରୋନା ପରର ଅର୍ଥନୀତି ଓ ଅଶାନ୍ତ ଏସିଆ ମହାଦେଶର ଅସ୍ଥିରତାକୁ ଦେଖି ଭାରତ ନିଜର ବାହ୍ୟ ଓ ଆଭ୍ୟନ୍ତରୀଣ ସୁରକ୍ଷା, ଅର୍ଥନୈତିକ ଅଭିବୃଦ୍ଧିକୁ ନୂଆ ଦିଶା ଦେବାରେ ପ୍ରୟାସ ଜାରି ରଖିଛି। ମହାମାରୀ କରୋନା ମୁକାବିଲାରେ ଆମେ ବିଶ୍ବପାଇଁ ଏକ ବଡ଼ ଉଦାହରଣ ପାଲଟିଛୁ। ବର୍ତ୍ତମାନର ଶ୍ରୀଲଙ୍କାରେ ରାଜନୈତିକ ଅସ୍ଥିରତା, ଦେବାଳିଆ ସ୍ଥିତି, ପାକିସ୍ତାନ ରାଜନୈତିକ ଘମାସାନ ଓ ନେତୃତ୍ୱ ପରିବର୍ତ୍ତନ, ଆଫଗାନିସ୍ତାନରେ ଆତଙ୍କୀ ତାଲିବାନୀଙ୍କ ଶାସନ, ଚାଇନାର ବିସ୍ତାରବାଦ ନୀତି ଓ ମ୍ୟାନ୍‌ମାରର ଅସ୍ଥିରତା ଉପରେ ଭାରତ ମଧ୍ୟ ତୀକ୍ଷ୍ଣ ନଜର ରଖିଛି। ଦେବାଳିଆ ଶ୍ରୀଲଙ୍କାକୁ ମାନବୀୟ ସହାୟତା ସ୍ବରୂପ ଲକ୍ଷଲକ୍ଷ ଟନ ଖାଦ୍ୟ ଶସ୍ୟ ଶ୍ରୀଲଙ୍କାରେ ପହଞ୍ଚାଇ ନିଜର ମହାନତାର ପରିଚୟ ଦେଇଛି ଭାରତ। ୟୁକ୍ରେନ-ରୁଷିଆ ଯୁଦ୍ଧ ଟାଳିବାରେ ଭାରତର ମଧ୍ୟସ୍ଥତା ସମସ୍ତଙ୍କୁ ଗ୍ରହଣୀୟ ବୋଲି ନିଜେ ରୁଷିଆ ବୈଦେଶିକ ମନ୍ତ୍ରୀ ସେର୍ଗୀ ଲାଭରଭ ଭାରତ ଗସ୍ତ ବେଳେ କହି ଯାଇଛନ୍ତି। ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ ମଧ୍ୟ ଭାରତ ଗସ୍ତରେ ଆସି ଭାରତ-ବ୍ରିଟେନ ଦ୍ବିପାକ୍ଷିକ ସମ୍ପର୍କ, ବାଣିଜି୍ୟକ ସମ୍ପର୍କ ବୃଦ୍ଧି ନେଇ ରାଜିନାମା ସ୍ବାକ୍ଷର କରି ଫେରିଛନ୍ତି। ଆମେରିକା ହ୍ବାଇଟ ହାଉସଠାରୁ ଆରମ୍ଭ କରି ସୂଚନା ପ୍ରଯୁକ୍ତି ବିଦ୍ୟାର ନାଭିକେନ୍ଦ୍ର ସିଲିକନ ଭ୍ୟାଲି ଯାଏ ସବୁଠି ଭାରତୀୟ ପ୍ରତିଭା ସେମାନଙ୍କ ଗୁରୁତ୍ୱ ଜାହିର କରିଛନ୍ତି। ନିକଟ ଅତୀତରେ ଚାଇନାର ବୈଦେଶିକ ମନ୍ତ୍ରୀ ଭାରତ ଗସ୍ତରେ ଆସି ଦୁଇ ଦେଶ ମଧ୍ୟରେ ସମ୍ପର୍କ ସୁଧାର ନେଇ କଥା ହୋଇ ଫେରିଛନ୍ତି। ଶେଷରେ ଏତିକି କୁହାଯାଇ ପାରେ ଯେ ବିଶ୍ବକୁ ଠିକ ଦିଶାରେ ନେଇ ଶାନ୍ତି ପ୍ରତିଷ୍ଠା ପାଇଁ ଭାରତକୁ ଗୁଣାମତ୍କ ପଦକ୍ଷେପ ନେବାର ଆବଶ୍ୟକତା ରହିଛି।

– ଲଳିତେନ୍ଦୁ ପଲାଉରୀ
ବାଲିପନ୍ତାଳ,ନଗର, ଅସ୍ତରଙ୍ଗ, ପୁରୀ
ମୋ. -୯୭୭୮୬୯୭୦୩୬


Enter your email to get our daily news in your inbox.

All Right Reserved By Dharitri.Com

ଏଇ ଭାରତରେ

ଖରାଦିନ ଆରମ୍ଭରୁ ବେଙ୍ଗାଲୁରୁ ଜଳ ସଙ୍କଟ ଏବେ ଚିନ୍ତାର ବିଷୟ ହୋଇଛି। ପରିସ୍ଥିତି ଏମିତି ଯେ ସେଠାରେ ଲୋକେ ସହର ଛାଡ଼ିବାକୁ ବାଧ୍ୟ ହେଉଛନ୍ତି। ଏହି...

ଅଦୃଶ୍ୟ ଶତ୍ରୁ

ମାୟାଧର ନାୟକ   ସତ୍ୟ, ତ୍ରେତୟା, ଦ୍ୱାପର, କଳିକାଳରେ ଯେତେ ଯୁଦ୍ଧ ହୋଇଯାଇଛି- ଶତ୍ରୁକୁ ଜାଣି ହେଉଥିଲା- କିନ୍ତୁ ଏ ମହାକଳିକାଳରେ ଅଜଣା ରୋଗ ଓ...

ଚୋରକୁ ବୁଦ୍ଧି

ଅଲେଖ ଚନ୍ଦ୍ର ମିଶ୍ର   ‘ଚୋରକୁ ବୁଦ୍ଧି ଶିଖେଇବା’ ଆପ୍ତବାଣୀଟି ଯେଉଁ ପୃଷ୍ଠଭୂମି ଉପରେ ଆଧାରିତ ତାହା ଥିଲା ଏକ ବାସ୍ତବଧର୍ମୀ କାହାଣୀ, ଯାହାର ମର୍ମ...

ଅପ୍ରକାଶ୍ୟ ଋଣ ସମସ୍ୟା

ଗତ କିଛି ବର୍ଷ ମଧ୍ୟରେ କୋଭିଡ୍‌-୧୯ ମହାମାରୀଠାରୁ ଆରମ୍ଭକରି ଉନ୍ନତ-ଅର୍ଥ ବ୍ୟବସ୍ଥାର ସୁଧ ହାର ବୃଦ୍ଧି ଭଳି ଘଟଣା ଭିନ୍ନ ସ୍ଥିତି ସୃଷ୍ଟି କରିଛି। ଏଥିରେ...

ଏଇ ଭାରତରେ

ଦେଶ ଗଠନରେ ଯୁବ ପ୍ରଶାସକଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଅନୁଭବ କରିଛନ୍ତି ୨୦୧୧ ବ୍ୟାଚ୍‌ ଭାରତୀୟ ରାଜସ୍ବ ସେବା(ଆଇଆର୍‌ଏସ୍‌) ଅଧିକାରୀ ରବି କପୁର। ସେ...

ରାମ ରାଜ୍ୟ ସମ୍ଭବ କି

ବୈକୁଣ୍ଠନାଥ ମିଶ୍ର   ଆଜିକାଲି ‘ଜୟ ଶ୍ରୀରାମ’ ଉଚ୍ଚାରଣ କରି ବନ୍ଧୁଙ୍କୁ ପ୍ରଥମ ସାକ୍ଷାତରେ ସମ୍ଭାଷିତ କରିବାର ଅଭିନବ ପରମ୍ପରା ସର୍ବତ୍ର ପରିଦୃଷ୍ଟ। ବନ୍ଧୁଙ୍କୁ ସମ୍ଭାଷଣ...

ମତଦାତାଙ୍କ ବୁଦ୍ଧି ବିମୂଢ଼ତା

ଡ.ଛାୟାକାନ୍ତ ଷଡ଼ଙ୍ଗୀ   ସମ୍ପ୍ରତି ଭାରତ ତଥା ବିଭିନ୍ନ ପ୍ରଦେଶରେ ରାଜନୀତିର ବିଚିତ୍ର ଗତି ଦେଖି ମତଦାତାମାନେ ଉଇଲିଅମ ଜେମ୍‌ସଙ୍କ ଭଳି ସମସ୍ୟାର ସମ୍ମୁଖୀନ ହେଲେଣି।...

ବୁଝିହେଉଛି

ଆମ୍‌ ଆଦ୍‌ମୀ ପାର୍ଟି (ଆପ୍‌) ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ୍‌ କେଜ୍‌ରିଓ୍ବାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରି ଆସନ୍ତା ୨୮ ତାରିଖ ପର୍ଯ୍ୟନ୍ତ...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri