ନୂଆଦିଲ୍ଲୀ, ୩୦।୫ : ଦେଶରେ ୫-ଜି ସ୍ପେକ୍ଟ୍ରମର ନିଲାମ ନେଇ କାର୍ଯ୍ୟ ଆରମ୍ଭ ହୋଇଛି। ଏହାର ସେବା ଚଳିତ ବର୍ଷ ଆରମ୍ଭ ହୋଇପାରିବାର ଆଶା ରହିଛି। ଟେଲି ଯୋଗାଯୋଗ କ୍ଷେତ୍ରରେ ଭାରତ ବିଶ୍ୱର ଦ୍ୱିତୀୟ ବୃହତ୍ତମ ଦେଶ । ଏହା ମାଧ୍ୟମରେ ବହୁ ସଂଖ୍ୟକ ଚାକିରି ମଧ୍ୟ ସୃଷ୍ଟି ହେବାର ସମ୍ଭାବନା ରହିଛି।
୨୦୨୫ ସୁଦ୍ଧା, ୫-ଜି ଟେକ୍ନୋଲୋଜି ପାଇଁ ୨.୨ କୋଟି ଦକ୍ଷ କର୍ମଚାରୀ ଆବଶ୍ୟକ ହେବେ। କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଏହି ସେବା ଦେଶରେ ଷ୍ଟାର୍ଟଅପ ଇକୋସିଷ୍ଟମକୁ ତ୍ୱରାନ୍ବିତ କରିବାରେ, ଶାସନକୁ ସୁଦୃଢ଼ କରିବାରେ ତଥା ଜୀବନକୁ ସହଜ କରିବାରେ ସାହାଯ୍ୟ କରିବ ଏବଂ ବ୍ୟବସାୟରେ ମଧ୍ୟ ସହାୟତା ଯୋଗାଇ ଦେବ।
୨୦୨୨ ସୁଦ୍ଧା ଭାରତ ୨୫ ଲକ୍ଷ କିଲୋମିଟର ଅପ୍ଟିକାଲ ଫାଇବରରେ ପହଞ୍ଚିବାକୁ ଯୋଜନା କରୁଛି। ଇଣ୍ଡିଆ ବ୍ରାଣ୍ଡ ଇକ୍ୱିଟି ଫାଉଣ୍ଡେସନ ଅନୁଯାୟୀ, ୨୦୨୬ ସୁଦ୍ଧା ଭାରତରେ ୩୫ କୋଟି ୫-ଜି ଗ୍ରାହକ ସୃଷ୍ଟି ହୋଇପାରିବେ, ଯାହା ମୋଟ ମୋବାଇଲ ଫୋନ ଗ୍ରାହକଙ୍କ ସଂଖ୍ୟାର ୨୭ ପ୍ରତିଶତ ହେବ।
ଟେଲିକମ ସଚିବ କେ ରାଜାରାମନ କିଛି ଦିନ ପୂର୍ବରୁ କହିଥିଲେ ଯେ ନେଟ ଠାରୁ ସ୍ପେସ ଯୋଗାଯୋଗ ଏବଂ ୫-ଜି ଫିକ୍ସଡ ଲାଇନ ବ୍ରଡବ୍ୟାଣ୍ଡ ସେବା ପର୍ଯ୍ୟନ୍ତ ଭାରତରେ ବହୁ ସଂଖ୍ୟକ ନିଯୁକ୍ତି ସୃଷ୍ଟି ହେବ। ସେହି କ୍ଷେତ୍ରରେ ଅଧିକ ନିଯୁକ୍ତି ସୃଷ୍ଟି ହେବ, ଯାହାକି ଏପର୍ଯ୍ୟନ୍ତ ଏହି କ୍ଷେତ୍ରରେ ବହୁତ କମ ରହିଛି। ଶୀଘ୍ର ଆମେ ନୀତି ପ୍ରତିବନ୍ଧକ ହଟାଇବାକୁ ପ୍ରୟାସ କରୁଛୁ।
ଟେଲିକମ ସେକ୍ଟର ସ୍କିଲ କାଉନସିଲ କହିଛି ଯେ ୫-ଜି, କ୍ଲାଉଡ କମ୍ପ୍ୟୁଟିଂ, ଆଟିଫିସିଆଲ ଇଣ୍ଟେଲିଜେନ୍ସ, ବୃହତ୍ ଡାଟା ଆନାଲିସିସ ଭଳି ନୂତନ ଟେକ୍ନୋଲୋଜି କ୍ଷେତ୍ରରେ ୧.୫ ଲକ୍ଷରୁ ଅଧିକ ପ୍ରଫେସନାଲଙ୍କ ଚାହିଦା ରହିଛି। ଏହି କ୍ଷେତ୍ରର ଚାହିଦା ଏବଂ ଯୋଗାଣ ମଧ୍ୟରେ ୨୮ ପ୍ରତିଶତ ବ୍ୟବଧାନ ଅଛି, ଯାହା ପରବର୍ତ୍ତୀ ସମୟରେ ବୃଦ୍ଧି ପାଇବ। ପରିଷଦ ପକ୍ଷରୁ ୫-ଜି ସେବା ପାଇଁ ୩ ବର୍ଷରେ ଏକ ଲକ୍ଷ ଲୋକଙ୍କୁ ତାଲିମ ପ୍ରଦାନ କରାଯିବାର ଳକ୍ଷ୍ୟ ଧାର୍ଯ୍ୟ କରାଯାଇଛି।
