ନୂଆଦିଲ୍ଲୀ,୩୦।୫ : ଭାରତ ଚାଇନା ସୀମା ପ୍ରସଙ୍ଗରେ କଂଗ୍ରେସ ପୁଣି ଥରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛି। ଲାଇନ ଅଫ ଆକ୍ଟୁଆଲ କଣ୍ଟ୍ରୋଲ (ଏଲଏସି) ର ପରିସ୍ଥିତି ସମ୍ପର୍କରେ ସରକାର ଖୁବ ଶୀଘ୍ର ଏକ ଶ୍ୱେତପତ୍ର ଜାରି କରିବା ଉଚିତ ବୋଲି କଂଗ୍ରେସର ବରିଷ୍ଠ ନେତା ମନୀଷ ତିୱାରୀ ମଙ୍ଗଳବାର କହିଛନ୍ତି।
ପୂର୍ବତନ କେନ୍ଦ୍ର ମନ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ୯ ବର୍ଷ ପୂରଣ ହେବାକୁ ନେଇ କଡ଼ା ସମାଲୋଚନା କରିଛନ୍ତି। ସେ ସରକାରଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନ ଚିହ୍ନ ଲଗାଇଛନ୍ତି। ଖବରଦାତାମାନଙ୍କ ସହ କଥାବାର୍ତ୍ତା କରି ସେ କହିଛନ୍ତି ଏନଡିଏ ସରକାର ଏହି ସମୟ ମଧ୍ୟରେ କେବଳ ଲୋକଙ୍କୁ ମିଥ୍ୟା ପ୍ରତିଶ୍ରୁତି ଦେବା ସହିତ ଠକି ଚାଲିଛନ୍ତି।
କୌଣସି ସରକାରଙ୍କୁ ପାଞ୍ଚଟି ମାନଦଣ୍ଡ ଅନୁଯାୟୀ ଦେଶ ଶାସନ କରିବାକୁ ପଡିଥାଏ। ଏଗୁଡ଼ିକ ହେଉଛି ଭାରତର ବାହ୍ୟ ସୁରକ୍ଷା, ଅର୍ଥନୀତିର ସ୍ଥିତି, ସାମାଜିକ ସମନ୍ବୟ, ଆଭ୍ୟନ୍ତରୀଣ ସୁରକ୍ଷା ଏବଂ ବିଶ୍ୱ ସହିତ ଭାରତର ସମ୍ପର୍କ ଏବାଂ ଏହାର ବୈଦେଶିକ ନୀତି। ଗତ ନଅ ବର୍ଷ ମଧ୍ୟରେ ଏନଡିଏ ସରକାର ଏହି ସବୁ ଗୁରୁତ୍ୱପୂର୍ଣ୍ଣ ମାନଦଣ୍ଡକୁ ପାଳନ କରିବାରେ ପଛୁଆ ରହିଛନ୍ତି।
ଭାରତ ବହୁ ଦଶନ୍ଧି ଧରି ବାହ୍ୟ ସୁରକ୍ଷା ଚ୍ୟାଲେଞ୍ଜର ସମ୍ମୁଖୀନ ହୋଇଛି। ଆଜି ବି ସେଥିରେ କୌଣସି ଉନ୍ନତି ହୋଇନାହିଁ। ଗତ ତିନିବର୍ଷ ମଧ୍ୟରେ ଚାଇନାର ଆକ୍ରମଣ ବୃଦ୍ଧି ପାଇଛି।
ଦୁର୍ଭାଗ୍ୟବଶତଃ ଚାଇନା ଆକ୍ରମଣ ବିଷୟରେ ଦେଶକୁ ଖୋଲାଖୋଲି କହିବା ପରିବର୍ତ୍ତେ ସରକାର ସେପ୍ଟେମ୍ବର ୨୦୨୦ ପରଠାରୁ ସଂସଦରେ ଏହି ବିଷୟରେ କୌଣସି ଆଲୋଚନା କରିବାକୁ ଅନୁମତି ଦେଇ ନାହାଁନ୍ତି। ସଂସଦର ସଦସ୍ୟମାନେ ଉଠାଇଥିବା ସମସ୍ତ ପ୍ରଶ୍ନ, ଏପରିକି ଶାସକ ଦଳ ପକ୍ଷରୁ ମଧ୍ୟ ଜାତୀୟ ସୁରକ୍ଷା ଆଧାରରେ ବିଚାର କରାଯାଇ ନାହିଁ।
ଚାଇନ ସହିତ ଏଲଏସିରେ ଅବସ୍ଥା କ’ଣ, କେତେ ବଫର୍ ଜୋନ ସୃଷ୍ଟି ହୋଇଛି, ସେମାନଙ୍କ ମଧ୍ୟରୁ କେତେଜଣ ଭାରତୀୟ ଅଞ୍ଚଳରେ ଅଛନ୍ତି ଏନେଇ ସରକାର ତୁରନ୍ତ ଏକ ଶ୍ୱେତ ପତ୍ର ପ୍ରକାଶ କରନ୍ତୁ। ଆମେ ଅନେକ କ୍ଷେତ୍ର ଉପରେ ନିୟନ୍ତ୍ରଣ ହରାଇଛୁ। ଏ ସମ୍ପର୍କରେ ଏକ ସ୍ପଷ୍ଟ ବିବୃତ୍ତି ସରକାରଙ୍କ ପକ୍ଷରୁ ମଧ୍ୟ ଦିଆଯିବା ଉଚିତ।
