ଟୋକିଓ,୮।୭(ଏପି): ଅଲିମ୍ପିକ୍ସ ଆରମ୍ଭ ହେବାକୁ ଆଉ ମାତ୍ର ୨ ସପ୍ତାହ ବାକିଥିବା ବେଳେ ରାଜଧାନୀ ଟୋକିଓରେ କିନ୍ତୁ କରୋନା ସଂକ୍ରମଣ ବଢିବାରେ ଲାଗିଛି। ମେ’ ମାସ ମଧ୍ୟଭାଗଠାରୁ ଏହି ସଂକ୍ରମଣ ଶୀର୍ଷରେ ପହଞ୍ଚିଛି। ଏବେ ୯୨୦ଜଣ ସଂକ୍ରମିତଙ୍କୁ ଚିହ୍ନଟ କରାଯାଇଛି। ସଂକ୍ରମଣକୁ ନିୟନ୍ତ୍ରଣ କରିବାକୁ ବିଭିନ୍ନ ପଦକ୍ଷେପ ନେବା ପାଇଁ ପ୍ରଧାନମନ୍ତ୍ରୀ ୟୋଶିହାଇଡ୍ ସୁଗା ଏକ ବୈଠକ ଡାକି ଏ ନେଇ ଆଲୋଚନା କରିଛନ୍ତି। ସଂକ୍ରମଣକୁ ରୋକିବା ପାଇଁ ଯଥାସମ୍ଭବ କାର୍ଯ୍ୟ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ବିଶେଷଜ୍ଞଙ୍କ ସହ ଆଲୋଚନା କରି ସେ ଗୁରୁବାର ଲାଗୁ ହୋଇଥିବା ଷ୍ଟେଟ ଇମର୍ଜେନ୍ସିକୁ ବୃଦ୍ଧି କରିବା ସଂକ୍ରାନ୍ତରେ ନିଷ୍ପତ୍ତି ନେବେ।
ଇମର୍ଜେନ୍ସି ବା ଜରୁରିକାଳୀନ ସ୍ଥିତି ବୃଦ୍ଧି ହେଲେ ସ୍ବଳ୍ପ ସଂଖ୍ୟକ ସ୍ଥାନୀୟ ଦର୍ଶକଙ୍କ ଉପସ୍ଥିତିକୁ ମଧ୍ୟ ବାତିଲ କରିବାକୁ ପଡିବ। ଅଲିମ୍ପିକ୍ସ ପୂର୍ବରୁ ସବୁପ୍ରକାର ପଦକ୍ଷେପ ନେବା ଉପରେ ଗୁରୁତ୍ୱ ଦିଆଯାଇଛି। ଜୁଲାଇରୁ ସେପ୍ଟେମ୍ବର ମଧ୍ୟରେ ଥିବା ସମୟ କୋଭିଡ୍-୧୯ ଦୃଷ୍ଟିକୋଣରୁ ଜାପାନ ପାଇଁ ସବୁଠାରୁ ଅଧିକ ଗୁରୁତ୍ୱପୂର୍ଣ୍ଣ। ଜାପାନରେ କେବଳ ୧୫ ପ୍ରତିଶତ ଲୋକଙ୍କର ସମ୍ପୂର୍ଣ୍ଣ ଭାବେ ଟିକାକରଣ ହୋଇଛି। ଏ ପର୍ଯ୍ୟନ୍ତ ଜାପାନରେ ୮,୧୦,୦୦୦ ସଂକ୍ରମିତଙ୍କୁ ଚିହ୍ନଟ କରାଯାଇଥିତ୍ବା ବେଳେ ୧୪,୯୦୦ ଜଣଙ୍କ ମୃତ୍ୟୁ ହୋଇଛି।
