ଜୁନାଗଡ଼ରେ ଏମିତି ଏକ କାଫେ ଅଛି, ଯେଉଁଠି ପୋଷକ ଖାଦ୍ୟ ଖାଇଲେ କିଛି ଦେୟ ଦେବାକୁ ପଡ଼ୁନାହିଁ। କାରଣ କ’ଣ ଜାଣନ୍ତି? ଏଠାରେ ପ୍ଲାଷ୍ଟିକ୍ ବର୍ଜ୍ୟ ଦେଲେ ମାଗଣାରେ ଖାଇବାକୁ ମିଳୁଛି। ଉକ୍ତ କାଫେର ନାମ ‘ପ୍ରକୃତି ପ୍ଲାଷ୍ଟିକ କାଫେ’। ବଡ଼ କଥା ହେଉଛି, ଏହି କାଫେକୁ ‘ଓମ୍ ଶାନ୍ତି’ ସ୍ବୟଂସହାୟିକା ଗୋଷ୍ଠୀର ସଦସ୍ୟାମାନେ ପରିଚଳାନା କରୁଛନ୍ତି। ଏହି ବ୍ୟବସ୍ଥାର ପ୍ରାୟୋଜକ ହେଉଛନ୍ତି ଜୁନାଗଡ଼ ଜିଲାପାଳ ରଚିତ ରାଜ ଓ ତାଙ୍କ ଟିମ୍। ସହରକୁ ସିଙ୍ଗଲ ୟୁଜ୍ଡ ପ୍ଲାଷ୍ଟିକ୍ ବା ଏକକ ବ୍ୟବହୃତ ପ୍ଲାଷ୍ଟିକମୁକ୍ତ ରଖିବା ଲାଗି ରାଜ୍ ଏଭଳି କାଫେ କରିଛନ୍ତି। କାଫେରେ ମିଲ୍ ପାଇଁ ଲୋକେ ଯେଉଁ ପ୍ଲାଷ୍ଟିକ ବର୍ଜ୍ୟ ଦାଖଲ କରୁଛନ୍ତି, ତାହାକୁ ‘ପ୍ଲାଷ୍ଟିକ ମନି’ କୁହାଯାଉଛି। ପ୍ଲାଷ୍ଟିକ୍ ମନି ଦେଇ ସେମାନେ ମନ ପସନ୍ଦ ଶାକାହାରୀ ଖାଦ୍ୟ ପାଉଛନ୍ତି। ସମସ୍ତ ଖାଦ୍ୟ ପ୍ରାକୃତିକ ପଦ୍ଧତିରେ ଉପତ୍ାଦିତ ପରିବାରେ ପ୍ରସ୍ତୁତ କରାଯାଉଛି। ଏଥିପାଇଁ ପ୍ରାକୃତିକ ପଦ୍ଧତିରେ ଚାଷ କରୁଥିବା କୃଷକମାନଙ୍କ ସହ ଚୁକ୍ତି କରାଯାଇଛି। ଅଧାକେଜି ପ୍ଲାଷ୍ଟିକ ଦେଲେ କାଫେରେ ଗୋଟିଏ ପାନୀୟ ମିଳୁଛି ଓ ୧ କେଜି ପ୍ଲାଷ୍ଟିିକ ବର୍ଜ୍ୟ ବଦଳରେ ମିଳୁଛି ଗୋଟିଏ ମିଲ୍। ୩୦ ଜୁନ୍ ୨୦୨୨ରେ ଏହି କାଫେ ଆରମ୍ଭ କରାଯାଇଥିଲା। ଏବେ ସୁଦ୍ଧା ଖାଉଟିଙ୍କଠାରୁ କାଫେ ୬୭୩ କେ.ଜି. ବର୍ଜ୍ୟ ସଂଗ୍ରହ କରିସାରିଲାଣି। ଏହି ବର୍ଜ୍ୟକୁ ରିସାଇକିଲିଂ ପାଇଁ ପଠାଯାଉଛି।
