ବେଙ୍ଗାଲୁରୁର କଲେଜ ଛାତ୍ରୀ ସିୟା ଗୋଡ଼ିକା ପୁରୁଣା ଚପଲକୁୁ ନୂଆ ରୂପ ଦେଇ (ଅପ୍ସାଇକ୍ଲିଂ) ସେଗୁଡ଼ିକୁ ଗରିବଙ୍କୁ ମାଗଣାରେ ଦେଉଛନ୍ତି। ‘ସୋଲ୍ ଓ୍ବାରିୟର’ ଏନ୍ଜିଓ ଗଠନ କରି ସେ ଏହି କାର୍ଯ୍ୟ କରୁଛନ୍ତି। ଏଥିରେ ଅନେକେ ସ୍ବେଚ୍ଛାକୃତ ଭାବେ ସାମିଲ ହୋଇ ସିୟାଙ୍କୁ ସହଯୋଗ କରୁଛନ୍ତି। ଏବେସୁଦ୍ଧା ସେମାନେ ୧୫,୦୦୦ ହଳ ଚପଳ ସଂଗ୍ରହ କରି ଅପସାଇକ୍ଲିଂ ସାରିଲେଣି। ସିୟା ରହନ୍ତି ବେଙ୍ଗାଲୁରୁର କୋରାମଙ୍ଗଳାରେ। ସେଠାରେ ଗରିବ ପିଲାମାନେ ଖାଲିପାଦରେ ଦୌଡ଼ିବା ଓ ଖେଳିବା ଦୃଶ୍ୟ ଦେଖିବା ପରେ ସେମାନଙ୍କୁ ଚପଲ ବା ଜୋତା ଯୋଗାଇ ଦେବାକୁ ସ୍ଥିର କରିଥିଲେ ଓ ପରେ ‘ସୋଲ୍ ଓ୍ବାରିୟର’ ଗଠନ କରିଥିଲେ। ତାଙ୍କର ଏହି ଅଭିଯାନର ସ୍ଲୋଗାନ ରଖିଛନ୍ତି ‘ଡୋନେଟ ଏ ସୋଲ୍, ସେଭ୍ ଏ ସାଉଲ’ ଅର୍ଥାତ୍ ଗୋଟିଏ ଚପଲ ଦାନ କରି ଗୋଟିଏ ଜୀବନ ରକ୍ଷା କର। ସେ ପ୍ରଥମେ ଏକ ହ୍ବାଟ୍ସଆପ ଗ୍ରୁପରେ ସ୍ବେଚ୍ଛାସେବୀଙ୍କୁ ସାମିଲ କରି ମାସକ ମଧ୍ୟରେ ୫୦୦ ହଳ ଚପଲ ଯୋଗାଡ଼ କରିପାରିଥିଲେ। ଏହା ପ୍ରଚାର ହେବା ପରେ ବହୁ ବ୍ୟକ୍ତି ଚପଲ ଦାନ କରୁଛନ୍ତି । ବେଙ୍ଗାଲୁରୁରେ ଏହା ସଫଳ ହେବା ପରେ ସିୟା ଏବେ ମୁମ୍ବାଇ ଓ ଚେନ୍ନାଇରେ ତାଙ୍କ ମିଶନକୁ ସମ୍ପ୍ରସାରିତ କରିଛନ୍ତି। ଏଭଳି ନିଆରା କାର୍ଯ୍ୟ ଲାଗି ତାଙ୍କୁ ଡାଏନା ଆଓ୍ବାର୍ଡ ପ୍ରଦାନ କରାଯାଇଛ ଓ ଏହା ପାଇବା ପରେ ସିୟା ତାଙ୍କ ଏନ୍ଜିଓ କାର୍ଯ୍ୟକୁ ଆମେରିକା ଓ ପଶ୍ଚିମ ଆଫ୍ରିକାକୁ ନେବା ଲାଗି ଯୋଜନା କରିଛନ୍ତି।
