ପରିବେଶକୁ ପ୍ରଦୂଷଣମୁକ୍ତ କରିବା ଲାଗି ଆଠ ମାସରେ ୭୦ ଟନ୍ ବର୍ଜ୍ୟବସ୍ତୁ ସଂଗ୍ରହ କରିବା କିଛି କମ୍ କଥା ନୁହେଁ। ଏମିତି କାର୍ଯ୍ୟରେ ଲାଗିଛନ୍ତି ପୁଣେର ବିବେକ ଗୌରବ । ସେ ପ୍ଲଗିଂ (ଜଗିଂବେଳେ କିଛି ଗୋଟାଇବା କାର୍ଯ୍ୟ) ସମୟରେ ବର୍ଜ୍ୟବସ୍ତୁ ଗୋଟାଉଛନ୍ତି। ତାଙ୍କୁ ଏବେ ବୟସ ୨୪। ତାଙ୍କ ଜନ୍ମ ମହାରାଷ୍ଟ୍ରର ଜୟସିଂପୁର ସହରରେ। ୨୦୧୫ରେ ସଫ୍ଟଓ୍ବେର ଇଞ୍ଜିନିୟରିଂ ଛାତ୍ର ଥିବାବେଳେ ସେ ଇନ୍ଦ୍ରାଣୀ ନଦୀକୁ ପୋଷ୍ୟ ଭାବେ ଗ୍ରହଣ କରି ତାହାକୁ ସଫା କରିବାରେ ଲାଗିଥିଲେ। ଏହି ଅଭିଯାନରେ ସେ ନଦୀରୁ ୪୦ଟନ୍ ପ୍ଲାଷ୍ଟିକ ବର୍ଜ୍ୟବସ୍ତୁ ସଂଗ୍ରହ କରିଥିଲେ। ପରେ ଜଣେ ସଫ୍ଟଓ୍ବେର ଇଞ୍ଜିନିୟର ଭାବେ ୨୦୧୯ରେ ପୁଣେ ପ୍ଲଗର୍ସ ଗଠନ କରିଥିଲେ। ସକାଳ ୬ଟାରୁ ଜଗିଂ ଲାଗି ବାହାରିଯାଇ ରାସ୍ତାରୁ ବର୍ଜ୍ୟବସ୍ତୁ ଗୋଟାଇବା ଆରମ୍ଭ କରିଥିଲେ ଗୌରବ। ଜଣେ ବରିଷ୍ଠ ନାଗରିକ ଏହାକୁ ରେକର୍ଡିଂ କରି ସୋସିଆଲ ମିଡିଆରେ ପୋଷ୍ଟ କରିବା ପରେ ପୁଣେ ପ୍ଲଗର୍ସର ସଦସ୍ୟ ସଂଖ୍ୟା ବଢ଼ି ଏବେ ୫୦୦ରେ ପହଞ୍ଚିଛି। ଏମାନେ ଜଗିଂ କରିବା ସମୟରେ ସର୍ବସାଧାରଣ ସ୍ଥାନ ତଥା ପର୍ଯ୍ୟଟନ କ୍ଷେତ୍ରରୁ ପ୍ରାୟ ୭୦ଟନ୍ ବର୍ଜ୍ୟବସ୍ତୁ ସଂଗ୍ରହ କରିସାରିଲେଣି। କେବଳ ଏତିକି ନୁହେଁ, ସେମାନେ ସଂଗ୍ରହ କରୁଥିବା ପ୍ଲାଷ୍ଟିକ ବର୍ଜ୍ୟବସ୍ତୁରୁ ଇକୋବ୍ରିକ୍ସ ବା ପରିବେଶ ଉପଯୋଗୀ ଇଟା ତିଆରି କରୁଛନ୍ତି। ଗୌରବ ଜୁଲାଇ ଶେଷସୁଦ୍ଧା ୨୫,୦୦୦ ଇକୋବ୍ରିକ୍ସ ତିଆରି କରିବାକୁ ଲକ୍ଷ୍ୟ ରଖିଛନ୍ତି। ଏହାକୁ ଗଛ ଲଗାଉଥିବା ଏନଜିଓଗୁଡିକୁ କିମ୍ବା ବସ୍ତିବାସିନ୍ଦାଙ୍କୁ ଘର କରିବା ଲାଗି ବାଣ୍ଟିବାକୁ ଯୋଜନା କରିଛନ୍ତି। ବସ୍ତିବସିନ୍ଦାଙ୍କୁ ଏହି ଇଟା ମାଗଣାରେ ଯୋଗାଇ ଦେବାକୁ କହିଛନ୍ତି ଗୌରବ। ବର୍ଜ୍ୟବସ୍ତୁକୁ ବି ରିସାଇକ୍ଲିଂ ପାଇଁ ପଠାଉଛନ୍ତି। କାଚଜାତୀୟ ବର୍ଜ୍ୟସାମଗ୍ରୀକୁ ଅପ୍ସାଇକ୍ଲିଂ ଲାଗି ସ୍ବୟଂସହାୟିକା ଗୋଷ୍ଠୀଗୁଡିକୁ ଦେଉଛନ୍ତି। ପୁଣେ ମ୍ୟୁନିସିପାଲ କର୍ପୋରେଶନ ସହଭାଗିତାରେ ପୁଣେ ପ୍ଲଗର୍ସ ଏକ ପ୍ଲଗାଥନ (ପ୍ଲଗିଂମାରାଥନ) ଆୟୋଜିତ କରି ୩୦ ଟନ୍ ବର୍ଜ୍ୟବସ୍ତୁ ସଂଗ୍ରହ କରିପାରିଛନ୍ତି।
