କଥାରେ କୁହନ୍ତି, କୋଲକାତା ସହରରେ ତୁମେ କେବେ ବି ଭୋକିଲା ରହିବନି। ଏହାର ଯଥାର୍ଥତା ପ୍ରତିପାଦନ କରୁଛି ସେଠାକାର ଆଇକନିକ ପାଇସ୍ ହୋଟେଲ। ଏଠାରେ ଭୋକିଲା, ପ୍ରବାସୀ ଶ୍ରମିକ ଓ ଜୀବିକା ଅନ୍ବେଷଣରେ ଆସୁଥିତ୍ବା ଲୋକ କିମ୍ବା ବ୍ୟାଚେଲର୍ମାନଙ୍କୁ ୩ ଟଙ୍କାରେ ସ୍ବାଦିଷ୍ଟ ବେଙ୍ଗଲି ଖାଦ୍ୟ ଦିଆଯାଉଛି। ପାଇସ୍ ହେଟେଲ କୋଲ୍କାତାର ବିଭିନ୍ନ ସ୍ଥାନରେ ଖୋଲାଯାଇଛି। ଏହା ଇଂରେଜ ଶାସନ ସମୟରେ ୧୯୦୦ ମସିହାରେ ପ୍ରଥମେ ଖୋଲାଯାଇଥିଲା। ‘ପଇସା’ ଭାରତୀୟ ମୁଦ୍ରାର ସର୍ବନିମ୍ନ ମୂଲ୍ୟକୁ ଦର୍ଶାଏ ଓ ତାହାକୁ ଦୃଷ୍ଟିରେ ରଖି ଏହି ହୋଟେଲର ନାମ ପାଇସ୍ ରଖାଯାଇଥିଲା। ଇଂରେଜ କାଳରେ ମୁଦ୍ରା ୟୁନିଟ୍ ପାଇସ୍ର ମୂଲ୍ୟ ଥିଲା ଏକ ଅଣାର ୪ ଭାଗରୁ ଭାଗେ। ଖାଦ୍ୟରେ ମାଛ ଭଜା, ମାଛ ତରକାରି, କଖାରୁଫୁଲ ଭଜା, ଆଳୁ ପୋସ୍ତ ଆଦି ଆଇଟମ୍ ମଧ୍ୟ ରହୁଛି। ସବୁଠୁ ବଡ଼ କଥା ହେଉଛି, ପାଇସ୍ ହୋଟେଲରେ ଖାଦ୍ୟ କଦଳୀ ପତ୍ରରେ ପରଷା ଯାଉଛି। ଗରାଖମାନେ ତଳେ ଆସନରେ ବସି ଖାଉଛନ୍ତି । ପରିବେଶ ସୁରକ୍ଷାକୁ ଏହି ହୋଟେଲ ମଧ୍ୟ ଗୁରୁତ୍ୱ ଦିଏ। ହୋଟେଲରେ କୌଣସି ପ୍ଲାଷ୍ଟିକ ଜିନିଷ ବ୍ୟବହାର କରାଯାଉ ନାହିଁ। ପ୍ରତିଦିନ ହୋଟେଲରେ ମେନ୍ୟୁ ପରିବର୍ତ୍ତନ କରାଯାଏ। ଏହାକୁ ବ୍ଲାକ୍ ବୋର୍ଡରେ ଲେଖା ଯାଇଥାଏ।
