ନିମାପଡ଼ା, ୨।୧୦(ଡି.ଏନ୍.ଏ.): ନିମାପଡ଼ା ବଡ଼ବଜାର, ଥାନା ଛକ, ବ୍ଳକ, ତହସିଲ ଅଫିସ ଛକ, ଦୋଳବେଦୀ ଛକ, ଟାଉନ କ୍ଲବ ଛକ ଦୀର୍ଘଦିନ ଧରି ବୁଲା ଗୋରୁ, ଷଣ୍ଢଙ୍କ ନିରାପଦ ଆଶ୍ରୟସ୍ଥଳ ପାଲଟିଛି। ଏହି ଛକଗୁଡ଼ିକର ମୁଖ୍ୟରାସ୍ତାରେ ଗୋରୁ ଦିନତମାମ ଶୋଇ ରହୁଥିବାରୁ ସାଧାରଣ ଯାତାୟାତ ଓ ଯାନବାହନ ଚଳାଚଳରେ ଗୁରୁତର ସମସ୍ୟା ସୃଷ୍ଟି ହେଉଛି। ଏପରିକି ଉକ୍ତ ରାସ୍ତା ଦେଇ ରୋଗୀଙ୍କୁ ନେଇ ବିଭିନ୍ନ ମେଡିକାଲକୁ ଯାଉଥିବା ଆମ୍ବୁଲାନ୍ସ ଓ ଅଗ୍ନିଶମ ସେବା ସଂସ୍ଥାର ଦମକଳ ଗାଡ଼ିକୁ ଏଥିପାଇଁ କିଛି ସମୟ ଅଟକିବାକୁ ପଡୁଛି। ଏହି ଗୋରୁଙ୍କ ପାଇଁ ବିଭିନ୍ନ ସମୟରେ ଛୋଟ, ବଡ଼ ଦୁର୍ଘଟଣାମାନ ଘଟିଚାଲିଛି। ବିଭିନ୍ନ ସମୟରେ ଛକ ବଜାରରରେ ଷଣ୍ଢ ଲଢ଼େଇ ଯୋଗୁ ରାସ୍ତାରେ ଯାତାୟାତ କରୁଥିବା ଲୋକ ଓ ବାଇକ୍ ଚାଳକମାନେ ଖଣ୍ଡିଆଖାବରା ହୋଇ ଆହତ ହେଉଥିବା ଦେଖାଯାଉଛି। ଦୋଳବେଦୀ ଛକ ଟ୍ରାଫିକ ପୋଷ୍ଟ ନିକଟରେ ଦୈନିକ ସନ୍ଧ୍ୟା ସମୟରେ ବହୁ ପରିମାଣରେ ଗୋରୁ ଶୋଇ ରହୁଥିବାରୁ ଯାତ୍ରୀବାହୀ ବସ୍, ଟ୍ୟାକ୍ସି, ଅଟୋ, ଟ୍ରକ ସମେତ ବଡ଼ ବଡ଼ ଯାନବାହନ ଚଳାଚଳରେ ବାଧାପ୍ରାପ୍ତ ହେଉଛି। ହେଲେ ଏ ଦିଗ ପ୍ରତି ନିମାପଡ଼ା ଏନ୍ଏସି କର୍ତ୍ତୃପକ୍ଷଙ୍କ ଆଦୌ ଦୃଷ୍ଟି ପଡୁ ନାହିଁ। ଦୀର୍ଘ ୨୦ ବର୍ଷରୁ ଊର୍ଦ୍ଧ୍ୱ ସମୟ ହେବ ଏହି ଗୋରୁଙ୍କୁ ରଖାଯିବା ପାଇଁ କାଞ୍ଜିଆହୁଦାର ବ୍ୟବସ୍ଥା ନାହିଁ। ଏହି ଗୋରୁଙ୍କ ଯୋଗୁ ସାଧାରଣ ଲୋକ ଓ ଗାଡ଼ି ଚାଳକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ମୁଖ୍ୟରାସ୍ତା, ମୁଖ୍ୟ ବଜାର, ବିଭିନ୍ନ ଛକରୁ ଏନ୍ଏସି ପକ୍ଷରୁ ବୁଲା ଗୋରୁ, ଷଣ୍ଢଙ୍କୁ ହଟାଯିବାର ବ୍ୟବସ୍ଥା କରାଯିବାକୁ ପୌରବାସୀଙ୍କ ପକ୍ଷରୁ ଦାବି ହେଉଛି। ଏ ନେଇ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଦାୟିତ୍ୱରେ ଥିବା ଏମ୍.ଶ୍ରୀନିବାସ ଓ ପରିମଳ ଅଧିକାରୀ ବିଜୟ କୁମାର ଗ୍ରହାଚାର୍ଯ୍ୟଙ୍କୁ ପଚାରିବାରେ ମୁଖ୍ୟ ବଜାର, ଛକ, ରାସ୍ତା ଉପରୁ ଗୋରୁଙ୍କ ହଟାଇବା ପାଇଁ ଏନ୍ଏସି ପକ୍ଷରୁ ୪ଜଣ ଚତୁର୍ଥ ଶ୍ରେଣୀ କର୍ମଚାରୀଙ୍କୁ ନିୟୋଜିତ କରାଯାଇଛି। ଏଥିସହ ଗୋରୁଙ୍କୁ ବେଶି ସମୟ ବାହାରକୁ ନ ଛାଡ଼ିବା ପାଇଁ କୁହାଯାଇଛି। ସେହିଭଳି ଏନ୍ଏସି ପକ୍ଷରୁ ଡେଙ୍ଗୁରା ବଜାଯାଇ ଓ ଡାକବାଜି ଯନ୍ତ୍ର ଦ୍ୱାରା ପ୍ରଚାର କରାଯାଇ ଜନସାଧାରଣଙ୍କୁ ବିଭିନ୍ନ ସମୟରେ ଅବଗତ କରାଯାଉଥିବା ଅଧିକାରୀଦ୍ୱୟ କହିଛନ୍ତି।
