ଆଗାମୀ ପିଢ଼ି ଲାଗି ଯଦି କିଛି ସର୍ବଶ୍ରେଷ୍ଠ ଉପହାର ଥାଏ, ତେବେ ତାହା ହେଉଛି ପାଣି-ଏହା ଉପଲବ୍ଧି କରିଛନ୍ତି ଗୁଜରାଟର ଡେଥାଲି ଗାଁ। ଏହି ମରୁଡ଼ି ପ୍ରବଣ ଗାଁରେ ଏବେ ପର୍ଯ୍ୟାପ୍ତ ଜଳ ଉପଲବ୍ଧ ହେବା ସହ ପକ୍ଷୀଙ୍କ ସ୍ବର୍ଗ ପାଲଟିଛି। ମେଶାନା ଜିଲା ଅନ୍ତର୍ଗତ ବହୁଚାରାଜି ମନ୍ଦିର ନିକଟରେ ଥିବା ଏହି ପଡ଼ା ଗାଁର ଲୋକସଂଖ୍ୟା ୧୩୦୦। ଏଠାରେ ୩୦ ଏକର ପରିମିତ ଜମ୍ବୁବନ ହ୍ରଦ ଜବରଦଖଲରେ ରହିଥିଲା ଓ ବର୍ଜ୍ୟ ଠୁଳ କରାଯାଉଥିଲା। ଉକ୍ତ ଗାଁର ସୋମଚାନ୍ଦ ଶାହାଙ୍କ ତତ୍ତ୍ୱାବଧାନରେ ଗ୍ରାମବାସୀ ହ୍ରଦର ପୁନରୁଦ୍ଧାର କାର୍ଯ୍ୟ ଆରମ୍ଭ କରିଥିଲେ। ହ୍ରଦରୁ ମାଟି ବାହାର କରାଯାଇ ରାସ୍ତା ନିର୍ମାଣ କରାଯାଇଛି। ହ୍ରଦରେ ୯ କୋଟି ଲିଟର ପାଣି ରହୁଛି। କେବଳ ଏତିକି ନୁହେଁ, ଗାଁର ଚାରି ପାଖରେ ଆହୁରି ଛୋଟ ଛୋଟ ୧୭ଟି ଜଳାଶୟ କରାଯାଇଛି। ଏବେ ହ୍ରଦରେ ହଜାର ହଜାର ଦେଶୀ ବିଦେଶୀ ପକ୍ଷୀ ବସାବାନ୍ଧି ରହିଛନ୍ତି। ପକ୍ଷୀଙ୍କ ସୁରକ୍ଷା କରାଯାଉଛି ବୋଲି କହିଛନ୍ତି ପରିବେଶ ବିଶେଷଜ୍ଞ ତଥା ସୋମଚାନ୍ଦଙ୍କ ପୁତ୍ର ମୟୂର ଶାହା। ଏହା ଏକ ଗୋଷ୍ଠୀଗତ ପରିବେଶଗତ କାର୍ଯ୍ୟ; ଯେଉଁଥିତ୍ରେ ଜୈବବିବିଧତା ସୁରକ୍ଷା ହୋଇପାରିଛି। ଏହି ହ୍ରଦର ସମ୍ମୁଖଭାଗର ସୌନ୍ଦର୍ଯ୍ୟ ବୃଦ୍ଧି କରାଯାଇ ପର୍ଯ୍ୟଟକଙ୍କୁ ଆକୃଷ୍ଟ କରାଯିବାର ଯୋଜନା ରହିଛି ବୋଲି କହନ୍ତି ସ୍ଥାନୀୟ ସରପଞ୍ଚ ଭିକାଭାଇ ପଟେଲ।
