ଡ୍ରମ, ଟାୟାର ଓ ଟ୍ୟୁବ୍ ପୁନଃ ଉପଯୋଗ କରି ବର୍ଷକୁ ୧ କୋଟି ଟଙ୍କା ରୋଜଗାର କରିବା ଆଶ୍ଚର୍ଯ୍ୟ ଲାଗୁଥିଲେ ବି ସତ। ମହାରାଷ୍ଟ୍ରର ପ୍ରମୋଦ ସୁସାରେଙ୍କ ଦ୍ୱାରା ଏହା ସମ୍ଭବ ହୋଇପାରିଛି। ପ୍ରମୋଦ ପେସାରେ ଜଣେ ମେକାନିକାଲ ଇଞ୍ଜିନିୟର। ସେ ଏକ କମ୍ପାନୀରେ ଭଲ ଦରମାରେ ଚାକିରି କରିଥିଲେ। ହେଲେ ତାହାକୁ ଛାଡ଼ି ୨୦୧୮ରୁ ଏହି କାର୍ଯ୍ୟରେ ଲାଗିଛନ୍ତି। ପି୨-ଏସ୍ ଇଣ୍ଟର୍ନ୍ୟାଶନାଲ କମ୍ପାନୀ ପ୍ରତିଷ୍ଠା କରି ପରିବେଶ ପ୍ରଦୂଷଣ ରୋକିବା ସହ ଅନେକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିଛନ୍ତି। ବ୍ୟବହୃତ ଡ୍ରମ ଏବଂ ଅଦରକାରୀ ଟାୟାର ଓ ଟ୍ୟୁବ୍ରୁ ବିଭିନ୍ନ ଆକର୍ଷଣୀୟ ଜିନିଷ ପ୍ରସ୍ତୁତ କରୁଛନ୍ତି। ଏହାକୁ ପ୍ରଥମେ ପୁଣେସ୍ଥିତ ଏକ କାଫେ ପସନ୍ଦ କରିବା ପରେ ତାହାର ଚାହିଦା ବୃଦ୍ଧି ପାଇଥିତ୍ଲା। ପରେ ଠାଣେର ଏକ ପ୍ରୋଜେକ୍ଟରୁ ୫.୫ ଲକ୍ଷ ଟଙ୍କା ରୋଜଗାର କରିବା ପରେ ସେ ଆଉ ପଛକୁ ଫେରିନାହାନ୍ତି। ଏବେ ବର୍ଷକୁ ୧ କୋଟି ଟଙ୍କାରୁ ବେଶି ଆୟ କରୁଛନ୍ତି। ଏହି କାର୍ଯ୍ୟରେ ୧୪ ଜଣ ଆର୍ଟିଷ୍ଟ ଓ ଷ୍ଟାଫ୍ଙ୍କୁୁ ନିଯୁକ୍ତି ଦେଇଛନ୍ତି। ଜିନିଷ ଲାଗି ପଞ୍ଜାବ, ହରିୟାଣା, ବେଙ୍ଗାଲୁରୁ, ଗୋଆ ଓ ଚେନ୍ନାଇରୁ ଅର୍ଡର ପାଉଛନ୍ତି। ୨୦୨୨ରେ ପୁଣେ ଓ ଠାଣେରେ ଆଉଟ୍ଲେଟ ଖୋଲିବାର ଯୋଜନା କରିଛନ୍ତି ପ୍ରମୋଦ।
