ଇଚ୍ଛାଶକ୍ତି ଓ ନିଷ୍ଠାପର ପ୍ରୟାସରେ ସଫଳତା ଆପେ ଆପେ ଆସେ, ଯାହା ପ୍ରମାଣ କରିଛନ୍ତି ଜଣେ ଦିବ୍ୟାଙ୍ଗ। ଡି. ଇନ୍ଦ୍ରା ଚାଲିପାରନ୍ତି ନାହିଁ, କିନ୍ତୁ ହ୍ବିଲ ଚେୟାରରେ ବସି ସବୁକିଛି ପରିଚାଳନା କରୁଛନ୍ତି। ରହୁଛନ୍ତି ତାମିଲନାଡୁର ସିରୁନାଲୁର୍ ଗଁାରେ। ସେ ପ୍ରେମ୍ ଇଲମ୍ ଆଶ୍ରୟସ୍ଥଳୀ ଚଳାଉଛନ୍ତି। ବହୁ ଦିବ୍ୟାଙ୍ଗ ପିଲାଙ୍କର ରହିବା, ଖାଇବା ଓ ପଢ଼ିବାର ବ୍ୟବସ୍ଥା କରୁଛନ୍ତି। କହିବାକୁ ଗଲେ ପ୍ରେମ୍ ଇଲମ୍ରେ ରହୁଥିବା ୩୦ ଜଣ ଦିବ୍ୟାଙ୍ଗ ଝିଅଙ୍କ ମା’ ପାଲଟି ଯାଇଛନ୍ତି ଇନ୍ଦ୍ରା। ବହୁ ଘାତ ପ୍ରତିଘାତ ମଧ୍ୟରେ ସେ ସ୍ନାତକୋତ୍ତର ଡିଗ୍ରୀ ହାସଲ କରିବା ପରେ ଦିବ୍ୟାଙ୍ଗ ଝିଅମାନେ କିପରି ସମାଜର ମୁଖ୍ୟ ସ୍ରୋତକୁ ଆସିପାରିବେ, ସେଥିପାଇଁ ଏହି ସଂସ୍ଥା ଖୋଲିଛନ୍ତି। ତାଙ୍କୁ ଚାକିରି ମିଳିଥିଲେ ବି ସେ ଏଭଳି କାର୍ଯ୍ୟ ପାଇଁ ନିଜକୁ ଉତ୍ସର୍ଗ କରିଛନ୍ତି। ସବୁଠୁ ବଡ଼ କଥା ହେଉଛି, ସେ ପିଲାମାନଙ୍କ ଖାଦ୍ୟ ପାଇଁ ଜୈବିକ ଧାନ ଓ ଫଳଚାଷ କରୁଛନ୍ତି। ଏହା ସହ ପିଲାମାନଙ୍କୁ ବି ସ୍ବାବଲମ୍ବୀ କରିବାକୁ ପ୍ରୟାସ ଜାରି ରଖିଛନ୍ତି।
