ମେଡିକାଲ କ୍ୟାରିୟରକୁ ପଛରେ ପକାଇ ଆଇପିଏସ୍ ହେବା ପରେ ଡ. ସଂଗ୍ରାମ ପାଟିଲ ରୋଗୀ ସେବାକୁ ଭୁଲିପାରିନାହାନ୍ତି। ମହାରାଷ୍ଟ୍ରରେ ରହନ୍ତି ସଂଗ୍ରାମଙ୍କ ପରିବାର । ୧୮ ଜଣ ଡାକ୍ତର ତାଙ୍କ ପରିବାରରେ ଅଛନ୍ତି। ସଂଗ୍ରାମ ୨୦୧୫ରେ ଆଇପିଏସ୍ ପାଇଥିଲେ। ଏହାପରେ ସେ ତେଲଙ୍ଗାନାର ମୁଲୁଗୁ ଏବଂ ଜୟଶଙ୍କର ଭୁପାଲପାଲ୍ଲୀ ଜିଲାର ସୁପରିଣ୍ଟେଣ୍ଡେଣ୍ଟ ଅଫ୍ ପୋଲିସ (ଏସ୍ପି) ଭାବେ ଦାୟିତ୍ୱ ନିର୍ବାହ କରୁଛନ୍ତି। ନିଜର ଦାୟିତ୍ୱ ତୁଲାଇବା ସହ ସେ ଜିଲାର ଦୁର୍ଗମ ଅଞ୍ଚଳରେ ରହୁଥିବା ୧୦୦ଟି ପଡ଼ାଗ୍ରାମର ୫,୦୦୦ ଗୋତିକୋୟା ଆଦିବାସୀଙ୍କୁ ଚିକିତ୍ସା ସୁବିଧା ଯୋଗାଇ ଦେଉଛନ୍ତି। ସେ ମଧ୍ୟ ଆଦିବାସୀଙ୍କ ଚିକିତ୍ସା ପାଇଁ ଆବଶ୍ୟକ ଓ୍ୟଷଧ ଓ ଅନ୍ୟାନ୍ୟ ଉପକରଣ ବାବଦରେ ୭ ଲକ୍ଷ ଟଙ୍କା ବ୍ୟୟ କରିସାରିଲେଣି। ସଂଗ୍ରାମଙ୍କ ବୟସ ୩୬। ସେ ଏସ୍ପି ଭାବେ ବିଭିନ୍ନ ଅଞ୍ଚଳକୁ ଯିବା ଅବସରରେ ଆଦିବାସୀଙ୍କ ଚିକିତ୍ସା ଅଭାବ ସମ୍ପର୍କରେ ଜାଣିବାକୁ ପାଇବା ପରେ ଏହି ଅଭିଯାନ ଆରମ୍ଭ କରିଥିତ୍ଲେ। ଏହି ଅଭିଯାନରେ ସେ ୨୦ ଜଣ ଡାକ୍ତରଙ୍କୁ ମଧ୍ୟ ଯୋଡ଼ିଛନ୍ତି। ନିୟମିତ ବ୍ୟବଧାନରେ ସେହି ସବୁ ଅଞ୍ଚଳରେ ମେଡିକାଲ କ୍ୟାମ୍ପ କରୁଛନ୍ତି। କେବଳ ଏତିକି ନୁହେଁ, ଅଧାରୁ ପାଠ ଛାଡ଼ିଥିବା ନବମ ଏବଂ ଦଶମ ଶ୍ରେଣୀର ପ୍ରାୟ ୧,୦୦୦ ପିଲାଙ୍କୁ ପୁଣି ସ୍କୁଲକୁ ଆଣିପାରିଛନ୍ତି।
