ବହୁ ସମୟରେ ଲୋକଶକ୍ତି ବଳରେ ଅନେକ ପରିବେଶ ଉପଯୋଗୀ କାର୍ଯ୍ୟ କରାଯାଇଥାଏ। ଏମିତି ଏକ କାର୍ଯ୍ୟ କରିଛନ୍ତି ଗୁଜରାଟର ୮,୨୦୦ ଜନସଂଖ୍ୟାବିଶିଷ୍ଟ କୁକ୍ମା ଗାଁର ଲୋକେ। ଓ୍ବେଷ୍ଟଓ୍ବାଟର ବା ମଇଳାପାଣିକୁ ଫିଲ୍ଟର କରି ଗଛରେ ଦେଇ ବିରାଟ ଜଙ୍ଗଲ ସୃଷ୍ଟି କରିଛନ୍ତି। କୁକ୍ମାର ସରପଞ୍ଚ କଙ୍କୁବେନ୍ଙ୍କ ଉଦ୍ୟମରେ ଏହି କାର୍ଯ୍ୟ କରାଯାଇପାରିଛି। ଜଙ୍ଗଲରେ ୭,୦୦୦ ଗଛ ଲଗାଯାଇଛି ଓ ପ୍ରତିଦିନ ୧୦,୦୦୦ ଲିଟର ଓ୍ବେଷ୍ଟଓ୍ବାଟର ଫିଲ୍ଟର କରାଯାଇ ଗଛରେ ଦିଆଯାଉଛି। କଚ୍ଛରେ ଫ୍ୟାକ୍ଟ୍ରିରୁ ନିଷ୍କାସିତ କେମିକାଲ ମିଶ୍ରିତ ବିଷାକ୍ତ ପାଣିକୁ ଆର୍ଓ ପ୍ଲାଣ୍ଟ ଦ୍ୱାରା ଫିଲ୍ଟର କରାଯାଉଛି। ଗାଁର ପାଖାପାଖି ୪୦ ଜଣ ଯୁବକ ସ୍ବେଚ୍ଛାକୃତ ଭାବେ ଗଛ ଲଗାଇବାରେ ସାହାଯ୍ୟ କରିଛନ୍ତି। ବିଷାକ୍ତ ତଥା ମଇଳା ପାଣିର ପୁନଃ ଉପଯୋଗ ହେବା ଯୋଗୁ ପରିବେଶ ପ୍ରଦୂଷଣ ଦୂର ହୋଇଛି। ଅନ୍ୟ ପକ୍ଷରେ ଗାଁର ଭୂତଳ ଜଳ ସ୍ତର ମଧ୍ୟ ବଢ଼ିଛି। ଜଙ୍ଗଲର ରକ୍ଷଣାବେକ୍ଷଣ ପାଇଁ ୧୦ ଜଣ ମହିଳାଙ୍କୁ ମଧ୍ୟ ନିଯୁକ୍ତି ଦିଆଯାଇଛି। କୁକ୍ମା ଗାଁର ଜଙ୍ଗଲକୁ ଆଖପାଖ ଗ୍ରାମଗୁଡ଼ିକରୁ ଲୋକେ ଦେଖିବାକୁ ଆସୁଛନ୍ତି ଓ ଏଭଳି ଜଙ୍ଗଲ କରିବା ଲାଗି ଆଗ୍ରହ ପ୍ରକାଶ କରିଛନ୍ତି ବୋଲି କହନ୍ତି ସରପଞ୍ଚ କଙ୍କୁବେନ୍। ମଇଳା ପାଣି ଫିଲ୍ଟର ହେବା ପରେ ଚାଷଜମିର ପ୍ରଦୂଷଣ କମିଛିି ଓ ଫସଲ ଉପତ୍ାଦନ ବୃଦ୍ଧି ପାଉଛି। ଲୋକମାନଙ୍କ ସହଯୋଗରେ ଏକ ଅର୍ଗାନିକ ଗାର୍ଡେନ କରିବା ଲକ୍ଷ୍ୟ ରଖିଛନ୍ତି କଙ୍କୁବେନ୍।
