ଭୁବନେଶ୍ୱର, ୫ା୨(ବ୍ୟୁରୋ): ଓଡ଼ିଶା ବିଦ୍ୟୁତ୍ରେ ବଳକା ରାଜ୍ୟ ବୋଲି ଶକ୍ତିମନ୍ତ୍ରୀ ବିଭିନ୍ନ ସମୟରେ ବିଧାନସଭାରେ ବିଧାୟକଙ୍କ ପ୍ରଶ୍ନର ଉତ୍ତର ଦେଉଛନ୍ତି। ହେଲେ ବଳକା ରାଜ୍ୟ ହୋଇ ମଧ୍ୟ ରାଜ୍ୟର ବିଦ୍ୟୁତ୍ ଉପଭୋକ୍ତା ଚଢ଼ାଦର ଦେବାକୁ ବାଧ୍ୟ ହେଉଛନ୍ତି। ଗତ ୨୦ ବର୍ଷ ଧରି ରାଜ୍ୟବାସୀ ଘରୋଇ କମ୍ପାନୀ ଦ୍ୱାରା ଶୋଷଣର ଶିକାର ହେଉଛନ୍ତି ବୋଲି ଓଡ଼ିଶା ଜନଶକ୍ତି ମଞ୍ଚ ଅଭିଯୋଗ କରିଛି। ଏହାର ସମାଧାନ କରା ନ ଗଲେ ଜନଆନ୍ଦୋଳନ କରାଯିବ ବୋଲି ଶୁକ୍ରବାର ଭୁବନେଶ୍ୱରରେ ଆୟୋଜିତ ଖବରଦାତା ସମ୍ମିଳନୀରେ ମଞ୍ଚର ଆବାହକ ଅଶୋକ ନନ୍ଦ ଚେତାବନୀ ଦେଇଛନ୍ତି।
ଓଡ଼ିଶାରେ ୨୦୦ ୟୁନିଟ୍ରୁ କମ୍ ବିଦ୍ୟୁତ୍ ବ୍ୟବହାର କରୁଥିବା ଉପଭୋକ୍ତା ଅନ୍ୟ ରାଜ୍ୟ ତୁଳନାରେ ଅଧିକ ଶୁଳ୍କ ଦେଉଛନ୍ତି। ରାଜ୍ୟର ବିଦ୍ୟୁତ୍ ଗ୍ରାହକମାନେ ୨୦୦ ୟୁନିଟ୍କୁ ମାସିକ ହାରାହାରି ୯୪୫ ଟଙ୍କା ଦେଉଛନ୍ତି। ସମାନ ୟୁନିଟ୍ ପାଇଁ ଆନ୍ଧ୍ରପ୍ରଦେଶରେ ୬୨୦, ଛତିଶଗଡ଼ରେ ୮୬୧, ପଞ୍ଜାବରେ ୬୭୨ ଟଙ୍କା ନିଆଯାଉଛି। ଦିଲ୍ଲୀରେ ୨୦୦ ୟୁନିଟ୍ ଏବଂ ତାମିଲନାଡୁରେ ୧୦୦ ୟୁନିଟ୍ ଯାଏ ସମ୍ପୂର୍ଣ୍ଣ ଶୁଳ୍କ ମୁକ୍ତ କରାଯାଇଛି। ରାଜ୍ୟରେ ବିଦ୍ୟୁତ୍ ବଣ୍ଟନ କମ୍ପାନୀ ଦ୍ୱାରା ପ୍ରସ୍ତୁତ ଖର୍ଚ୍ଚ ଆକଳନ ଆଧାରରେ ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ (ଓଇଆରସି) ବିଦ୍ୟୁତ୍ ଶୁଳ୍କ ଧାର୍ଯ୍ୟ କରୁଥିବାରୁ ସାଧାରଣ ଉପଭୋକ୍ତାଙ୍କ ଉପରେ ବୋଝ ବଢ଼ି ଚାଲିଛି। ବଣ୍ଟନ କମ୍ପାନୀ ଦ୍ୱାରା ଦିଆଯାଉଥିବା ଖର୍ଚ୍ଚ ଓ କ୍ଷତିର କୌଣସି ସ୍ବତନ୍ତ୍ର ନିରପେକ୍ଷ ଅଡିଟ୍ ହେଉନାହିଁ। ଫଳରେ ମନଇଚ୍ଛା ଦର ବୃଦ୍ଧି କରାଯାଉଛି। ଦିଲ୍ଲୀରେ ନିରପେକ୍ଷ ଅଡିଟ୍ ହେବା ପରେ ସେଠାରେ ବିଦ୍ୟୁତ୍ ଶୁଳ୍କ ହ୍ରାସ ପାଇଛି। ଓଡ଼ିଶାରେ ମଧ୍ୟ ନିରପେକ୍ଷ ଅଡିଟ୍ କରିବାକୁ ନନ୍ଦ ଦାବି କରିଛନ୍ତି।
ଅନ୍ୟପକ୍ଷରେ ରାଜ୍ୟ ସରକାର ଚାଷୀ ଓ ଚାଷର ବିକାଶ ପାଇଁ ଡିଣ୍ଡିମ ପିଟୁଥିବା ବେଳେ ଗରିବ ଚାଷୀଙ୍କ ଉପରେ ବିଦ୍ୟୁତ୍ ବୋଝ ଲଦି ଦିଆଯାଉଛି। ଓଡ଼ିଶାର କୃଷି କ୍ଷେତ୍ରରେ ମାତ୍ର ୨% ବିଦ୍ୟୁତ୍ ଉପଯୋଗ ହେଉଛି। ପଞ୍ଜାବ, ହରିୟାଣା, କର୍ନାଟକ ଭଳି ରାଜ୍ୟରେ ୩୦ ପ୍ରତିଶତ ବିଦ୍ୟୁତ୍ କୃଷି କ୍ଷେତ୍ରକୁ ଯୋଗାଇ ଦିଆଯାଇଛି। ନିକଟରେ ରାଜ୍ୟର ବିଦ୍ୟୁତ୍ ବ୍ୟବସ୍ଥାକୁ ଟାଟା ପାଓ୍ବାର ହାତକୁ ଟେକି ଦିଆଯାଇଛି। ତେବେ ଘରୋଇ କମ୍ପାନୀ ସହ କରାଯାଇଥିବା ଚୁକ୍ତିରେ ରାଜ୍ୟ ସରକାର ବିଦ୍ୟୁତ୍ ଭିତ୍ତିଭୂମି ପାଇଁ ଖର୍ଚ୍ଚ କରିଥିବା ୨୦ ହଜାର କୋଟି ଟଙ୍କା ବିଷୟରେ କିଛି ଉଲ୍ଲେଖ କରାଯାଇ ନାହିଁ। କାହା ସ୍ବାର୍ଥରେ ରାଜ୍ୟ ସରକାର ବିଦ୍ୟୁତ୍ ଅଡିଟ୍ କରୁନାହାନ୍ତି ବୋଲି ନନ୍ଦ ପ୍ରଶ୍ନ କରିଛନ୍ତି। ଘରୋଇ କମ୍ପାନୀ ଓ ସରକାରୀ ଅଧିକାରୀଙ୍କ ମଧୁଚନ୍ଦ୍ରିକାରେ ବାରମ୍ବାର ଶୁଳ୍କବୃଦ୍ଧି କରାଯାଉଛି। ପୁନର୍ବାର ବିଦ୍ୟୁତ୍ ଶୁଳ୍କ ବୃଦ୍ଧି କରିବାକୁ ଗ୍ରୀଡ୍କୋ, ଓପିଟିସିଏଲ୍ ଏବଂ ବିଦ୍ୟୁତ୍ ବଣ୍ଟନ କମ୍ପାନୀଗୁଡ଼ିକ ଓଇଆରସି ନିକଟରେ ଆବେଦନ କରିଛନ୍ତି। ଏହା ବିରୋଧରେ ମଞ୍ଚ ପକ୍ଷରୁ ସମଗ୍ର ରାଜ୍ୟରେ ଜନସଚେତନତା କାର୍ଯ୍ୟକ୍ରମ କରାଯିବ ବୋଲି ଚେତାବନୀ ଦିଆଯାଇଛି। ଖବରଦାତା ସମ୍ମିଳନୀରେ ମଳୟ କୁମାର ସାମଲ, ଆନନ୍ଦ ମହାପାତ୍ର, ସୀତାବଲ୍ଲଭ ମହାପାତ୍ର, ତୁଷାର ରାୟ, ସରୋଜ ପ୍ରଧାନ ପ୍ରମୁଖ ଉପସ୍ଥିତ ଥିଲେ।
