ମାନିଲା,୫।୩ : ଫିଲିପାଇନ୍ସରେ କେତେକ ଲୋକ ଆଖିବୁଜା ଗୁଳି ଚଳାଇଛନ୍ତି। ଯେଉଁଥିରେ କେନ୍ଦ୍ରୀୟ ଫିଲିପାଇନ୍ସର ପ୍ରାଦେଶିକ ରାଜ୍ୟପାଳ ରୋଏଲ ଡାଗାମୋ ଏବଂ ନୀରିହ ଗ୍ରାମବାସୀଙ୍କ ସମେତ ୮ ଜଣଙ୍କର ମୃତ୍ୟୁ ଘଟିଛି। ରବିବାର ଅଧିକାରୀ ମାନେ କହିଛନ୍ତି ଯେ ପୋଲିସ ଜଣେ ସନ୍ଦିଗ୍ଧଙ୍କୁ ହତ୍ୟା କରି ଅନ୍ୟ ତିନି ଜଣଙ୍କୁ ଗିରଫ କରିଛି। ଆକ୍ରମଣକାରୀ ରାଇଫଲରେ ସଜ୍ଜିତ ହୋଇଥିଲେ। ୬ ଜଣ ବ୍ୟକ୍ତି ବୁଲେଟ ପ୍ରୁଫ ଜ୍ୟାକେଟ ପିନ୍ଧି ଏଭଳି କାଣ୍ଡ ଭିଆଇଥିଲେ।
ପୋଲିସର ସୂଚନାନୁସାରେ, କେନ୍ଦ୍ରୀୟ ଫିଲିପାଇନ୍ସର ତାଙ୍କ ଘରେ ପ୍ରାଦେଶିକ ନେତା ଗ୍ରାମବାସୀଙ୍କ ସହ ସାକ୍ଷାତ କରୁଥିବାବେଳେ ବନ୍ଧୁକଧାରୀମାନେ ଗୁଳି ଚଳାଇଥିଲେ।
ଗୁଳି କାଣ୍ଡରେ ଡାକ୍ତର ଏବଂ ଦୁଇ ସେନା କର୍ମଚାରୀଙ୍କ ସମେତ ଅନ୍ୟ ୧୭ ଜଣ ଆହତ ହୋଇଛନ୍ତି ବୋଲି ପୋଲିସ କହିଛି। ପୋଲିସ ତୁରନ୍ତ ସଡକ ଯାଞ୍ଚ ପଏଣ୍ଟ ସ୍ଥାପନ କରିଥିଲା। ଅଭିଯୁକ୍ତଙ୍କ ନିକଟରୁ ଅନେକ ରାଇଫଲ ଏବଂ ପିସ୍ତଲ ଜବତ କରାଯାଇଥିବା ପୋଲିସ କହିଛି।
