ନୂଆଦିଲ୍ଲୀ,୭।୧୨: ଦେଶରେ କରୋନାର ନୂତନ ଭାରିଆଣ୍ଟ୍ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା ଇତିମଧ୍ୟରେ ବଢ଼ିବାରେ ଲାଗିଛି। ଏପରିସ୍ଥଳେ ପାର୍ସୀ ସମ୍ପ୍ରଦାୟ ପକ୍ଷରୁ ‘ସ୍କାଏ ବୁରିଆଲ୍’ ପରମ୍ପରାରେ କରୋନା ମୃତକଙ୍କ ଅନ୍ତିମ ସଂସ୍କାର କରିବା ଲାଗି ଅନୁମତି ଲୋଡ଼ା ଯାଇଥିଲା। ଏନେଇ ସୁପ୍ରିମ୍କୋର୍ଟ ନୋଟିସ୍ ଜାରି କରିଛନ୍ତି।
କରୋନା ମହାମାରୀରେ ମୃତଦେହ ପରିଚାଳନା ପାଇଁ କବର ଏବଂ ଦାହ କରିବାକୁ ନିର୍ଦ୍ଦେଶ ଜାରି କରାଯାଇଥିଲା। ତେବେ ପାର୍ସୀ ପରମ୍ପରା ଅନୁସାରେ ଦୋଖମାସ୍ରେ କରାଯାଉଥିବା ଦୋଖମେନାଶିନୀକୁ ସଂକ୍ରମଣ ବ୍ୟାପିବାକୁ ଦୃଷ୍ଟିରେ ରଖି ବାରଣ କରାଯାଇଥିଲା। ଏହି ପରମ୍ପରା ଅନୁସାରେ ମୃତ ଦେହକୁ ଉଚ୍ଚ ଟାଓ୍ବାର ଅବା ନିର୍ମିତ ହୋଇଥିବା କୂଅରେ ଖୋଲା ରଖାଯାଇ ଥାଏ। ଏହାକୁ ଜୀବଜନ୍ତୁ ଅବା ପକ୍ଷୀମାନେ ଭକ୍ଷଣ କରିଥାନ୍ତି।
ଭାରତୀୟ ସମ୍ବିଧାନ ପାର୍ସୀ ସମ୍ପ୍ରଦାୟଙ୍କ ଏଭଳି ଅନ୍ତିମ ସଂସ୍କାର ପରମ୍ପରାକୁ ସ୍ବୀକୃତି ଦେଇଛନ୍ତି। ତେବେ କରୋନା ମହାମାରୀ ଯୋଗୁ ‘ସ୍କାଏ ବୁରିଆଲ୍’ ଧାର୍ମିକ ପରମ୍ପରା ଉପରେ ରୋକ ଲଗାଯାଇଥିଲା। ସୁପ୍ରିମକୋର୍ଟ ସୁରଟ ପାର୍ସୀ ପଞ୍ଚାୟତ ବୋର୍ଡର ଏକ ଆବେଦନ ଉପରେ ନୋଟିସ ଜାରି କରିଛନ୍ତି।
ଗୁଜୁରାଟ ହାଇକୋର୍ଟଙ୍କ ରାୟ ଉପରେ ଗତ ଜୁଲାଇରେ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଏ.ଏସ୍.ବୋପାନ୍ନାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଶୁଣାଣି କରି କେନ୍ଦ୍ରୀୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା କରୋନା ଆକ୍ରାନ୍ତଙ୍କ ମୃତ ଦେହ ପରିଚାଳନା ସାମ୍ବିଧାନିକ ଧାରା ୧୪,୧୯, ୨୧, ୨୫, ୨୬,୨୯ର ବିପରୀତ ବୋଲି କରାଯାଇଥିବା ଆବେଦନକୁ ଖାରଜ କରିଦେଇଥିଲେ।
କରୋନା ଆକ୍ରାନ୍ତଙ୍କ ମୃତଦେହ ପରିଚାଳନା ଲାଗି କେନ୍ଦ୍ରୀୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ନିର୍ଦ୍ଦେଶନାମା କୌଣସି ସାମ୍ବିଧାନିକ ମୌଳିକ ଅଧିକାରର ଉଲ୍ଲଂଘନ କରୁନାହିଁ ବୋଲି ଖଣ୍ଡପୀଠ କହିଥିଲେ। ଏହା ଦ୍ୱାରା ପାର୍ସୀ ସମ୍ପ୍ରଦାୟ ଅନୁସରଣ କରୁଥିବା ଧାର୍ମିକ ପ୍ରଥା ପ୍ରତି ଅବମାନନା କରାଯାଉ ନାହିଁ ଅବା ସ୍ବାସ୍ଥ୍ୟ ମନ୍ତ୍ରଣାଳୟର ପଦକ୍ଷେପ ଧର୍ମ ବିରୋଧୀ ନୁହେଁ ବୋଲି ଖଣ୍ଡପୀଠ କହିଥିଲେ। ଦୋକମେନାଶିନୀ ଧାର୍ମିକ ପ୍ରଥା ଭାରତରେ ପ୍ରଚଳିତ। ଏହି ପରମ୍ପରାରେ ମୃତ ଦେହକୁ ନୀରବତାର କୂଅ / ଟାୱାର (ସାଇଲେଣ୍ଟ୍ ଟାଓ୍ବାର/ଓ୍ବେଲ୍) ନାମକ ଏକ ସଂରଚନାରେ ଉଚ୍ଚତାରେ ରଖାଯାଇଥାଏ। ମୃତଦେବଗୁଡିକ ଶାଗୁଣା ଦ୍ୱାରା ଖିଆଯାଏ ଏବଂ ସୂର୍ଯ୍ୟ ତାପରେ ଅବଶିଷ୍ଟାଂଶ ନଷ୍ଟ ହୋଇଯାଇଥାଏ।
ଏହା ଏକ ନିଛାଟିଆ ସ୍ଥାନରେ ଅବସ୍ଥିତ ଏବଂ ମୃତ ଦେହକୁ କୂଅରେ ଥିବା “ନାଶେଶଲାର”ରେ ରଖାଯାଇଥାଏ। ପାର୍ସୀଙ୍କୁ ସେମାନଙ୍କର ଧାର୍ମିକ ବିଶ୍ୱାସ ଅନୁଯାୟୀ ଶେଷ ରୀତିନୀତି କରିବାକୁ ଅନୁମତି ଦିଆଯାଇଛି। ତେଣୁ ଏହାକୁ ପୁଣି ଲାଗୁ କରିବାକୁ ଆବେଦନକାରୀଙ୍କ ପକ୍ଷରୁ ହାଜର ହୋଇଥିବା ବରିଷ୍ଠ ଆଡଭୋକେଟ ଫାଲି ଏସ ନରିମାନ ଖଣ୍ଡପୀଠଙ୍କ ସମ୍ମୁଖରେ ଯୁକ୍ତି ଉପସ୍ଥାପନ କରିଥିଲେ।
ଖଣ୍ଡପୀଠ ଏନେଇ ନୋଟିସ୍ ଜାରି କରିବା ସହିତ ଏହାର ପରବର୍ତ୍ତୀ ଶୁଣାଣି ୨୦୨୨ ଜାନୁୟାରୀ ୧୦ରେ କରାଯିବ ବୋଲି ସୂଚନା ପ୍ରଦାନ କରିଛନ୍ତି।
