ଖଇରା,୨୯।୧୦ ଉତ୍କଳବନ୍ଧୁ ପଣ୍ଡା: ବାଲେଶ୍ୱର ଜିଲା ଖଇରା ବ୍ଲକ ଅଧୀନରେ ବିଭିନ୍ନ ସମସ୍ୟା ଯୋଗୁ ୯ବର୍ଷ ମଧ୍ୟରେ ୧୧୪ ନୂତନ ଅଙ୍ଗନୱାଡି କେନ୍ଦ୍ର ଗୃହ ଅସମ୍ପୂର୍ଣ୍ଣ ରହିଛି। ଆବଶ୍ୟକ ସରକାରୀ ଜାଗା ଉପଲବ୍ଧ ନ ହେବା, କାର୍ଯ୍ୟଗ୍ରାହୀମାନେ ଯଥା ସମୟରେ ବିଲ୍ ନ ପାଇବା, ଜାତୀୟ ନିଶ୍ଚିତ କର୍ମନିଯୁକ୍ତି ଯୋଜନାରେ ଅର୍ଥାଭାବ, ରାଜନୈତିକ ଗୋଷ୍ଠୀ ମଧ୍ୟରେ ବିବାଦ ଭଳି କାରଣ ଏହି ଅସମ୍ପୂର୍ଣ୍ଣ ଗୃହ ପାଇଁ ଦାୟୀ ବୋଲି କୁହାଯାଉଛି। ଏଭଳି ଅସମ୍ପୂର୍ଣ୍ଣ କାରଣ ପାଇଁ ବହୁ ସ୍ଥାନରେ ପିଲାମାନେ ଝାଟିମାଟି ଘରେ କିମ୍ବା ସ୍କୁଲ ବାରଣ୍ଡାରେ ଅସୁରକ୍ଷିତ ଭାବେ ବସିବାକୁ ବାଧ୍ୟ ହେଉଛନ୍ତି। ତୁରନ୍ତ ଛୋଟ ଛୋଟ ପିଲାଙ୍କ ଭବିଷ୍ୟତକୁ ଦୃଷ୍ଟିରେ ରଖି ପ୍ରଶାସନ ଏ ଦିଗରେ ପଦକ୍ଷେପ ନେବାକୁ ଖଇରା ବ୍ଲକର ୩୭ ପଞ୍ଚାୟତର ଜନସାଧାରଣ ଦାବି କରିଛନ୍ତି।
୨୦୧୧-୧୨ ମସିହା ପୂର୍ବରୁ ଅଙ୍ଗନୱାଡି କେନ୍ଦ୍ରଗୁଡ଼ିକ ଗ୍ରାମର ହରିହାଟ ଏବଂ କୋଠଘର, ବିଭିନ୍ନ ବିଦ୍ୟାଳୟ ଶ୍ରେଣୀ କକ୍ଷ, କର୍ମୀଙ୍କ ନିଜ ଘରେ ଚାଲୁଥିବା ବେଳେ ଏଥିପାଇଁ ଉଭୟ ପିଲା ଓ ଅଙ୍ଗନୱାଡି କେନ୍ଦ୍ରର କର୍ମୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିଲେ। ପରେ ସରକାର କେନ୍ଦ୍ର ପାଇଁ ପକ୍କା ଘର ଯୋଗାଇ ଦେବାକୁ ନିଷ୍ପତ୍ତି ନେଇଥିଲେ। ୨୦୧୧-୧୨ମସିହାରେ ୨ଟି, ୨୦୧୨-୧୩ରେ ୩୮ଟି, ୨୦୧୩-୧୪ରେ ୬୮ଟି, ୨୦୧୪-୧୫ରେ ୧୦ଟି, ୨୦୧୫-୧୬ରେ ୯ଟି, ୨୦୧୬-୧୭ରେ ୩୩ଟି, ୨୦୧୭-୧୮ରେ ୧୦ଟି, ୨୦୧୮-୧୯ରେ ୧୦୦ଟି, ୨୦୧୯-୨୦ରେ ୪୫ଟି ଘର ଖଇରା ବ୍ଲକକୁ ଯୋଗାଇ ଦିଆଯାଇଥିଲା। ୨୦୧୩-୧୪ରୁ ଘର ନିର୍ମାଣ ପାଇଁ ଏମ୍ଜିଏନ୍ଆର୍ଇଜିଏସ୍ରେ ଏହି ଅର୍ଥ ପ୍ରଦାନ କରାଯାଇଆସୁଛି। ବର୍ତ୍ତମାନ ସୁଦ୍ଧା ୨୦୧ ଘର ସମ୍ପୂର୍ଣ୍ଣ ହୋଇପାରିଥିବା ବେଳେ ଆବଶ୍ୟକ ଜାଗା ମିଳୁ ନ ଥିବାରୁ ୩୭ଟି ଘର ଓ ଅନ୍ୟାନ୍ୟ ବିବାଦ ପାଇଁ ୨୫ ଘର ନିର୍ମାଣ ଏ ପର୍ଯ୍ୟନ୍ତ ଆରମ୍ଭ ହୋଇପାରୁନାହିଁ। ୫୨ଟି ଗୃହର ନିର୍ମାଣ କାର୍ଯ୍ୟ ବିଭିନ୍ନ ପର୍ଯ୍ୟାୟରେ ଅଟକି ରହିଛି । ୨୦୧୮-୧୯ରେ ଆସିଥିବା ଘର ମଧ୍ୟରୁ ସର୍ବାଧିକ ୫୫ଟି ଗୃହ ନିର୍ମାଣ ଅସମ୍ପୂର୍ଣ୍ଣ ଅବସ୍ଥାରେ ରହିଛି । ଏଭଳି ଉଦ୍ବେଗଜନକ ସ୍ଥିତି ସମ୍ପର୍କରେ ଗତ ସେପ୍ଟେମ୍ବର ୨୩ ତାରିଖରେ ପଞ୍ଚାୟତ ସମିତିର ୪ର୍ଥ ଅଧିବେଶନ ଓ ପୂର୍ବବର୍ତ୍ତୀ ଅଧିବେଶନରେ ବହୁ ଲୋକପ୍ରତିନିଧି ଗୃହକୁ ଅବଗତ କରାଇବା ସହ ଏହାର ସମାଧାନ ପାଇଁ ଦାବି କରିଥିଲେ। ବର୍ତ୍ତମାନ ବଟେଶ୍ୱର ଭଳି କିଛି ଅସ୍ଥାୟୀ କେନ୍ଦ୍ରରେ ପିଲା ଅସ୍ବାସ୍ଥ୍ୟକର ପରିବେଶରେ ବସି ପାଠ ପଢୁଥିବା ବେଳେ ଏହି କେନ୍ଦ୍ର ପାଇଁ ଆସିଥିବା ନୂତନ ଘର ୩ବର୍ଷ ଧରି ଅସମ୍ପୂର୍ଣ୍ଣ ଅବସ୍ଥାରେ ରହିଛି ା ଠିକାଦାର ବିଲ୍ ନ ପାଇବା ଗୃହ ଅସମ୍ପୂର୍ଣ୍ଣର ମୁଖ୍ୟ କାରଣ ବୋଲି କୁହାଯାଉଥିବା ବେଳେ ତୁରନ୍ତ ଏହା ଶେଷ କରିବାକୁ ଗ୍ରାମର ଭୋଳାନାଥ ମହାପାତ୍ର ପ୍ରଶାସନକୁ ଅନୁରୋଧ କରିଛନ୍ତି। ଅନ୍ୟ ଯୋଜନାରେ ତୁରନ୍ତ ବିଲ୍ ପୈଠ କରାଯାଉଥିବା ବେଳେ ଏହି ଯୋଜନାରେ ବର୍ଷ ବର୍ଷ ଧରି ବିଲ୍ ପଡ଼ିରହିବା ଘର ଅସମ୍ପୂର୍ଣ୍ଣର ଅନ୍ୟତମ କାରଣ ବୋଲି ଚକ ଗ୍ରାମର ମାଧବାନନ୍ଦ ରାଉତ କହିଛନ୍ତି। ଶିଶୁମାନଙ୍କ ସୁରକ୍ଷାକୁ ଦୃଷ୍ଟିରେ ଘର ଗୁଡ଼ିକ ସମ୍ପୂର୍ଣ୍ଣ କରିବାକୁ ପ୍ରଶାସନ ଗୁରୁତର ସହ ବିଚାର କରିବା ଦରକାର ବୋଲି ଖଇରା ମଣ୍ଡଳ ଭାଜପା ସଭାପତି ରାଜେଶ କୁମାର ରାଉତ ଦାବି କରିଛନ୍ତି। ଏମ୍ଜିଏନ୍ଆର୍ଇଜିଏସରେ ଅର୍ଥ ଠିକ୍ ସମୟରେ ପହଞ୍ଚୁ ନ ଥିବାରୁ ଘର ନିର୍ମାଣରେ ବାଧା ସୃଷ୍ଟି ହେଉଥିଲା। ଏବେ ପଞ୍ଚାୟତ ଫଣ୍ଡରୁ ଆବଶ୍ୟକ ଅର୍ଥ ଦିଆଯାଇ ୧ମାସ ମଧ୍ୟରେ ୨୫ଟି ଘର ଶେଷ କରାଯାଇଛି। ୬ମାସ ମଧ୍ୟରେ ସମସ୍ତ ଘର ସମ୍ପୂର୍ଣ୍ଣ କରିବାକୁ ଉଦ୍ୟମ ଜାରି ରହିଥିବା ବିଡିଓ ପର୍ଶୁରାମ ପଣ୍ଡା କହିଛନ୍ତି।
