ବେଜିଂ,୮ା୨: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଚାଇନା ଗସ୍ତକରି ରାଷ୍ଟ୍ରପତି ଶି ଜିନ୍ପିଙ୍ଗଙ୍କୁ ଭେଟିଛନ୍ତି। ଏହି ଅବସରରେ ଇମ୍ରାନ କଶ୍ମୀର ପ୍ରସଙ୍ଗ ଉଠାଇଛନ୍ତି। ଏ ନେଇ ଚାଇନା ଏବଂ ପାକିସ୍ତାନ ପକ୍ଷରୁ ଏକ ମିଳିତ ବିବୃତି ଜାରି କରାଯାଇଛି। କଶ୍ମୀର ପ୍ରସଙ୍ଗକୁ ଶାନ୍ତିପୂର୍ଣ୍ଣ ସମାଧାନ କରିବାକୁ ଚାଇନା କହିବା ସହ ପରିସ୍ଥିତିକୁ ଜଟିଳ କରୁଥିବା ଏକପାଖିଆ କାର୍ଯ୍ୟକୁ ବିରୋଧ କରିଛି। ପାକ୍ ଓ ଚାଇନାର ଏଭଳି ବିବୃତି ଏବଂ ଆଲୋଚନାକୁ ପୂର୍ବରୁ ଭାରତ ବିରୋଧ କରିଆସିଛି। ଜମ୍ମୁ-କଶ୍ମୀର ସର୍ବଦା ଭାରତର ଅବିଚ୍ଛେଦ୍ୟ ଅଙ୍ଗ ବୋଲି ଭାରତ ପକ୍ଷରୁ କୁହାଯାଇଛି।
ଇମ୍ରାନଙ୍କ ୪ ଦିନିଆ ଗସ୍ତର ଶେଷ ଦିନରେ ଉଭୟ ପକ୍ଷ ମଧ୍ୟରେ ଚାଇନା-ପାକିସ୍ତାନ ଇକୋନୋମିକ୍ କରିଡର (ସିପିଇସି)ର ମନ୍ଥର ଗତି ଓ ପାକିସ୍ତାନରେ ବିଭିନ୍ନ ପ୍ରକଳ୍ପ ପାଇଁ କାର୍ଯ୍ୟ କରୁଥିବା ଚାଇନା କର୍ମଚାରୀଙ୍କୁ ଆକ୍ରମଣ ଭଳି ପ୍ରସଙ୍ଗରେ ଆଲୋଚନା ହୋଇଛି।
