ଇସ୍ଲାମାବାଦ୍,୨୦।୨: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କୁ ବଡ଼ ଆଶ୍ୱସ୍ତି ମିଳିଛି। ସୋମବାର ଲାହୋର କୋର୍ଟରୁ ଇମ୍ରାନଙ୍କୁ ଜାମିନ ମିଳିଛି। ଶୁଣାଣି ପାଇଁ ଇମ୍ରାନ ସନ୍ଧ୍ୟା ୫ଟା ୩୦ରେ ନିଜେ କୋର୍ଟରେ ହାଜର ହୋଇଥିଲେ। ଏହାପରେ ତାଙ୍କର ଶୁଣାଣି ଆରମ୍ଭ ହୋଇଥିଲା। ଯେଉଁଥିରେ କୋର୍ଟ ଇମ୍ରାନଙ୍କ ବିରୋଧରେ ରୁଜୁ ହୋଇଥିବା ଆତଙ୍କବାଦୀ ମାମଲାରେ ତାଙ୍କୁ ଆଶ୍ୱସ୍ତି ପ୍ରଦାନ କରି ମାର୍ଚ୍ଚ ୩ଯାଏ ଅନ୍ତରୀଣ ଜାମିନ ପ୍ରଦାନ କରିଛନ୍ତି। ଏହି ସମୟରେ ପ୍ରବଳ ସଂଖ୍ୟାରେ ତାଙ୍କର ସମର୍ଥକ କୋର୍ଟ ପରିସରରେ ଉପସ୍ଥିତ ରହିଥିଲେ। ସୂଚନା ମୁତାବକ, ପାକିସ୍ତାନର ତେହେରିକ-ଇ-ଇନ୍ସାଫ ପାର୍ଟି (ପିଟିଆଇ)ର ମୁଖ୍ୟ ଇମ୍ରାନ ଖାନ୍ କୋର୍ଟରେ ହାଜର ହେବା ପୂର୍ବରୁ କହିଥିଲେ ଯେ, ସେ କୋର୍ଟର ସମ୍ମୁଖୀନ ହେବାକୁ ଚାହୁଁଛନ୍ତି ଏବଂ କିଛି ସମୟରେ ପରେ ସେ ହାଜର ମଧ୍ୟ ହେବେ। ସୂଚନାଯୋଗ୍ୟ, ପାକିସ୍ତାନର ନିର୍ବାଚନ ଆୟୋଗଙ୍କ ପକ୍ଷରୁ ଅଯୋଗ୍ୟ ଦର୍ଶାଯିବା ପରେ ଇମ୍ରାନଙ୍କ ସମର୍ଥକ ଇସ୍ଲାମାବାଦରେ ବିରୋଧ ପ୍ରଦର୍ଶନ କରି ଭଙ୍ଗାରୁଜା କରିଥିଲେ। ଏହାକୁ ନେଇ ମାମଲା ରୁଜୁ କରାଯାଇଥିଲା।
