ଭୁବନେଶ୍ୱର,୨।୨ (ତପନ ସ୍ବାଇଁ):ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟ ପରିସରରେ ଚାଲିଥିବା ଅନ୍ତର୍ଜାତୀୟ ଗ୍ରାଣ୍ଡମାଷ୍ଟର୍ସ ଚେସ୍ର ୭ମ ରାଉଣ୍ଡ ଖେଳ ଗୁରୁବାର ଶେଷ ହୋଇଛି। ସପ୍ତମ ରାଉଣ୍ଡ ଶେଷରେ ତେଲେଙ୍ଗାନାର ବିଗ୍ନେଶ ଭେମୁଲା ୬ ପଏଣ୍ଟ ପାଇ ଏକକ ଅଗ୍ରଣୀ ଲାଭ କରିଛନ୍ତି। ଓଡ଼ିଶା ଅନ୍ତର୍ଜାତୀୟ ମାଷ୍ଟର (ଆଇଏମ୍) ସମ୍ବିତ ପଣ୍ଡାଙ୍କ ସହ
ଇରାନ ଆଇଏମ୍ ତହବାଜ ଅରଶ, ଜମ୍ମୁ-କଶ୍ମୀର କ୍ୟାଣ୍ଡିଡେଟ ମାଷ୍ଟର ସୋହମ କୋମତ୍ରା ଓ ପଶ୍ଚିମବଙ୍ଗ ଗ୍ରାଣ୍ଡମାଷ୍ଟର ସାୟନ୍ତନ ଦାସ ୫.୫ ପଏଣ୍ଟ ଲେଖାଏ ପାଇ ମିଳିତ ଦ୍ୱିତୀୟ ସ୍ଥାନରେ ରହିଛନ୍ତି। ସମ୍ବିତ ପ୍ରଭାବୀ ପ୍ରଦର୍ଶନ କରି ଉଭୟ ୬ଷ୍ଠ ଓ ୭ମ ରାଉଣ୍ଡରେ ବିଜୟୀ ହୋଇଛନ୍ତି। ୬ଷ୍ଠ ରାଉଣ୍ଡରେ ସେ ପଶ୍ଚିମବଙ୍ଗ ଗ୍ରାଣ୍ଡମାଷ୍ଟର ସପ୍ତଶ୍ରୀ ରୟ ଚୌଧୁରୀଙ୍କୁ ଧଳା ଗୋଟିରେ ଏବଂ ୭ମ ରାଉଣ୍ଡରେ ମହାରାଷ୍ଟ୍ର ଆଇଏମ୍ ସମିଦ ଜୟକୁମାର ଶେଟେଙ୍କୁ କଳା ଦାନରେ ପରାସ୍ତ କରିଛନ୍ତି। ୯ ଜଣ ଖେଳାଳି ୫ ପଏଣ୍ଟ ଲେଖାଏ ପାଇଛନ୍ତି। ପ୍ରତିଯୋଗିତାର ୧୬୦୦ ରେଟିଂରୁ କମ୍ ବର୍ଗ ଚେସ୍ ଗୁରୁବାର ଆରମ୍ଭ ହୋଇଛି। ଏଥିରେ ୨୦ ରାଜ୍ୟରୁ ୩୬୬ ପ୍ରତିଯୋଗୀ ଅଂଶଗ୍ରହଣ କରିଛନ୍ତି। ଏହା ମଧ୍ୟରେ ୧୬୯ ଅନ୍ତର୍ଜାତୀୟ ରେଟେଡ ଖେଳାଳି ରହିଛନ୍ତି। ଏଥିରେ ମୋଟ ୯ ରାଉଣ୍ଡ ଖେଳ ହେବ।
