ପାରାଦୀପ, ୨୬।୩(ସ୍ବ.ପ୍ର.): ସମୁଦ୍ରରେ ଆଗକୁ ଆଉ ଫାଶୀଜାଲ ଚଳିବ ନାହିଁ। ଏହା ବଦଳରେ ବର୍ଗାକାର ଜାଲ ବ୍ୟବହାର କରିବାକୁ କେନ୍ଦ୍ର ସରକାରଙ୍କ ବାଣିଜ୍ୟ ଓ ଶିଳ୍ପ ମନ୍ତ୍ରଣାଳୟ ଅଧୀନ ୨ ସଂସ୍ଥା ନେଟଫିଶ୍ (ନେଟୱର୍କ ଫର ଫିଶ କ୍ବାଲିଟି ମ୍ୟାନେଜମେଣ୍ଟ ଏଣ୍ଡ ସଷ୍ଟେନବଲ ଫିଶିଂ)ଏବଂ ଏମ୍ପିଇଡିଏ(ମେରାଇନ ପ୍ରଡକ୍ଟ ଏକ୍ସପୋର୍ଟ ଡେଭେଲପମେଣ୍ଟ ଅଥରିଟି) ପରାମର୍ଶ ଦେଇଛନ୍ତି। ଏନେଇ ପାରାଦୀପ ମାଛଧରା ବନ୍ଦର ପରିସରରେ ଥିବା ପରିଚାଳନା କମିଟି ଗୃହରେ ଗୁରୁବାର ବୈଠକ ଅନୁଷ୍ଠିତ ହୋଇଯାଇଛି। ନେଟଫିଶ୍ର ରାଜ୍ୟ ସଂଯୋଜକ ଶୁଭ୍ରକାନ୍ତ ମହାପାତ୍ର ଯୋଗଦେଇ କହିଛନ୍ତି, ପ୍ରଚଳିତ ଫାଶୀଜାଲ ଜରିଆରେ ସମୁଦ୍ରରେ ମାଛ ଧରିବାବେଳେ ୭୦ ପ୍ରତିଶତ ଯାଆଁଳା ନଷ୍ଟ ହୋଇଯାଉଛି। ୧୪ ରୁ ୧୮ ମିଲିମିଟର ସାଇଜ୍ ଠିକିରି ଭଳି ହୋଇଥିବା ଏହି ଜାଲ ପାଣିରେ ଟାଣିବାବେଳେ ଜାକି ହୋଇଯାଏ। ଏଥିଯୋଗୁ ମାଛ ଉତ୍ପାଦନ କ୍ଷମତା ହ୍ରାସ ପାଇବାରେ ଲାଗିଛି। ଏନେଇ ସଜାଗ ନ ହେଲେ ମତ୍ସ୍ୟଶିଳ୍ପ ଓ ମତ୍ସ୍ୟଜୀବୀ ଜୀବିକା ହରାଇବା ଆଶଙ୍କା ରହିଛି। ବୈଠକରେ ଏମପିଇଡିଏର ଆଞ୍ଚଳିକ ସଂଯୋଜକ ଗୟାଧର ଜେନା କହିଛନ୍ତି, ସରକାରୀ ଭାବେ ଜାଲର ଆକାର ୨୫ ମିମି କରାଯାଇଛି। ଏଥିସହ ବର୍ଗାକାର ଫାଶଥିବା ଜାଲ ବ୍ୟବହାର କଲେ ଯାଆଁଳ କ୍ଷତିଗ୍ରସ୍ତ ହେବେନାହିଁ। ଏଥିରେ ଓମ୍ଫା(ଓଡିଶା ସାମୁଦ୍ରିକ ମତ୍ସ୍ୟ ଉତ୍ପାଦକ ସଂଘ)ର ସଭାପତି ସୁମନ୍ତ କୁମାର ବିଶ୍ବାଳ ଯୋଗଦେଇ କହିଛନ୍ତି, ମତ୍ସ୍ୟଶିଳ୍ପ ଏବେ ଦୁର୍ଦ୍ଦିନରେ ଗତି କରୁଛି। ସରକାର ମତ୍ସ୍ୟଶିଳ୍ପ ପାଇଁ ସ୍ବତନ୍ତ୍ର ବ୍ୟବସ୍ଥା ନ କଲେ ଆଗାମୀ ଦିନରେ ରାଜ୍ୟର ୩୦ ଲକ୍ଷ ଲୋକ ବେକାରି ସମସ୍ୟାର ସମ୍ମୁଖୀନ କରିବେ। ତେବେ ପ୍ରସ୍ତାବିତ ବର୍ଗାକାର ଜାଲ ଆପଣେଇବାକୁ ମତ୍ସ୍ୟଜୀବୀ ପ୍ରସ୍ତୁତ ଅଛନ୍ତି ବୋଲି କହିଛନ୍ତି। ବୈଠକରେ ଜାଲ ନିର୍ମାଣକାରୀ କମ୍ପାନୀର ପ୍ରତିନିଧି ଓ କାରିଗରମାନେ ଉପସ୍ଥିତ ଥିଲେ।
