ରାଜକନିକା,୧୨।୮(ସଞ୍ଜୟ କୁମାର ଦାଶ): କେନ୍ଦ୍ରାପଡ଼ା ଜିଲା ରାଜକନିକା ଥାନା ସଦର କାଜୁବଗିଚାଠାରେ ନୂତନଭାବେ ଖୋଲାଯାଇଥିବା ଏକ ଠିପିବନ୍ଦ ମଦ ଦୋକାନରେ ଅବକାରୀ ଅଧିକାରୀ ପରିଚୟ ଦେଇ କାଗଜପତ୍ର ଯାଞ୍ଚ ଆଳରେ ଟଙ୍କା ମାଗିବା ଜଣେ ଯୁବକଙ୍କୁ ମହଙ୍ଗା ପଡିଛି। ମଦ ଦୋକାନ ମ୍ୟାନେଜରଙ୍କ ଅଭିଯୋଗ ଆଧାରରେ ରାଜକନିକା ପୋଲିସ ଜଣେ ଯୁବକଙ୍କୁ ଗିରଫ କରିଛି। ସମ୍ପୃକ୍ତ ଯୁବକ ଜଣକ ଯାଜପୁର ଜିଲା ଛତିଆ ଅଞ୍ଚଳର ପ୍ରଭାସ କୁମାର ବଳ। ଦଫା ୨୦୪, ୩୧୮(୨), ୩୧୯ ବିଏନ୍ଏସ୍ ଆକ୍ଟରେ ଏକ ମାମଲା(ନଂ. ୫୪୫/୨୬) ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ସଞ୍ଜୟ କୁମାର ମଲ୍ଲିକ ସୂଚନା ଦେଇଛନ୍ତି।
ମଦ ଦୋକାନ ମ୍ୟାନେଜର ନିରଞ୍ଜନ ନାୟକଙ୍କ ଅଭିଯୋଗ ଅନୁଯାୟୀ ମଙ୍ଗଳବାର ପୂର୍ବାହ୍ନ ପ୍ରାୟ ୧୧ଟାବେଳେ ପ୍ରଭାସ କୁମାର ବଳ ତାଙ୍କ ଦୋକାନକୁ ଆସିଥିଲେ। ନିଜକୁ ଅବକାରୀ ବିଭାଗ ଅଧିକାରୀ ବୋଲି ପରିଚୟ ଦେଇ ଦୋକାନର କାଗଜପତ୍ର ଦେଖିବା ସହ ୫ହଜାର ଟଙ୍କା ମାଗିଥିଲେ। ଟଙ୍କା ଓ କାଗଜପତ୍ର ନ ଦେଲେ ଦୋକାନ ସିଲ୍ କରାଯିବ ବୋଲି କହିଥିଲେ। ହେଲେ ତାଙ୍କର ସନ୍ଦେହ ହେବାରୁ ସେ ତାଙ୍କୁ ବିଭାଗୀୟ ପରିଚୟପତ୍ର ଦେଖାଇବାକୁ କହିଥିଲେ। ହେଲେ ପରିଚୟପତ୍ର ଘରେ ଛାଡ଼ି ଆସିଛି ବୋଲି ସେ କହିଥିଲେ। ଏହାପରେ ଦୋକାନରେ ଥିବା ଖାତାପତ୍ରର ଫଟୋ ଉଠାଇଥିଲେ। ସନ୍ଦେହ ଘନୀଭୂତ ହେବାରୁ ରାଜକନିକା ପୋଲିସକୁ ଖବର ଦିଆଯାଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ଯୁବକଙ୍କୁ ପଚରାଉଚରା କରିଥିଲା। ଯୁବକ ଜଣକ ଏକ ପରିଚୟପତ୍ର ଦେଖାଇଥିଲେ, ଯାହା ଅବକାରୀ ବିଭାଗ ସହ ମେଳ ଖାଇ ନ ଥିଲା। ତାଙ୍କ ଘର ପଟିଆ ଭୁବନେଶ୍ୱର ଓ ପରେ ଛତିଆ ବୋଲି କହିଥିଲେ। ଏହାପରେ ପୋଲିସ ତାଙ୍କୁ ଥାନାକୁ ନେଇଥିଲା।
