ଦିଗପହଣ୍ଡି,୭।୧୧(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଗଡ ଗୋବିନ୍ଦପୁର ପଞ୍ଚାୟତ ଧାନ୍ୟରାଶି ଗ୍ରାମ ନିକଟରେ ପ୍ରବାହିତ ବାହୁଦା ନଦୀରୁ ବେଆଇନ ବାଲି ଉତ୍ତୋଳନ କରାଯାଉଛି। ନଦୀ କୂଳହୁଡ଼ା ଭାଙ୍ଗି ଟ୍ରାକ୍ଟର, ଟିପର୍ ଦ୍ୱାରା ବାଲି ଚୋରା ଚାଲାଣ କରାଯାଉଥିବା କାରଣରୁ ବର୍ଷା ଦିନରେ ଗାଁରେ ନଦୀ ବଢ଼ି ପାଣି ପଶିଯିବା ଆଶଙ୍କାରେ ନଦୀରୁ ବାଲି ଉତ୍ତୋଳନକୁ ଗ୍ରାମବାସୀ ବିରୋଧ କରିଛନ୍ତି। ନଦୀରୁ ବାଲି ଉତ୍ତୋଳନକୁ ବିରୋଧ କରିବାରୁ ସମ୍ପୃକ୍ତ ବାଲି ମାଫିଆମାନେ ବିଭିନ୍ନ ମାରଣାସ୍ତ୍ରରେ ସଜ୍ଜିତ ହୋଇ ଗ୍ରାମବାସୀଙ୍କୁ ଧମକ ଦେଉଛନ୍ତି।ତୁମେ ଯାହାକୁ କହୁଛ କୁହ। ଆମେ ନଦୀରୁ ବାଲି ନେବୁ।ବିରୋଧ କଲେ ଗାଁ ରେ ରଖାଇ ଦେବୁ ନାହିଁ। ଗ୍ରାମବାସୀଙ୍କୁ ଜୀବନରେ ମାରିଦେବୁ କହି ବାଲି ମାଫିଆମାନେ ସଂଘଟିତ ହୋଇ ଧମକ ଦେଉଛନ୍ତି। ଏନେଇ ଗଞ୍ଜାମ ଜିଲାପାଳଙ୍କୁ ଗ୍ରାମବାସୀ ଦସ୍ତଖତ ସମ୍ବଳିତ ସ୍ମାରକପତ୍ର ପ୍ରଦାନ କରିଥିବା ଗ୍ରାମର ପ୍ରମୋଦ କୁମାର ପାଢ଼ୀ,ମିଟୁ ପାଢ଼ୀ, ସଦାନନ୍ଦ ପାଢୀ, ପ୍ରମୋଦ କୁମାର ପାତ୍ର,ମନୋରଞ୍ଜନ ପାଢ଼ୀ,ଶ୍ରୀହରି ପ୍ରଧାନ,ରାଜେଶ କୁମାର ପ୍ରଧାନ ଜଣାଇଛନ୍ତି। ଖଣି ବିଭାଗ ପକ୍ଷରୁ ଲିଜ ହୋଇ ନ ଥିବା ବାଲି ଘାଟରୁ ଜେସିବି ମେସିନ ଦ୍ବାରା ବାଲି ମାଫିଆ ମାନେ ବାଲି ଉତ୍ତୋଳନ କରି ପ୍ରତିଦିନ ଶହ ଶହ ସଂଖ୍ୟାରେ ଟ୍ରାକ୍ଟର, ଟିପର ଗାଡ଼ି ରେ ବିଭିନ୍ନ ଗ୍ରାମାଞ୍ଚଳ ଓ ଆନ୍ଧ୍ରକୁ ବାଲି ଚୋରା ଚାଲାଣ କରାଯାଉଛି।ଖଣି ବିଭାଗ ଅଧିକାରୀ ଓ ପୋଲିସ ସବୁ ଜାଣି ନିଦା ବିଷ୍ଣୁ ସାଜି ଥିବା ଗ୍ରାମବାସୀ ଅଭିଯୋଗ କରିଛନ୍ତି।ବାରମ୍ବାର ଅଭିଯୋଗ କରାଗଲେ ମଧ୍ୟ ଖଣି ବିଭାଗ ଅଧିକାରୀ ମାନେ ଏଥିପ୍ରତି କର୍ଣ୍ଣପାତ କରୁନାହାନ୍ତି। ଖଣି ବିଭାଗ ଅଧିକାରୀ ବିଜୟ କୁମାର ପ୍ରଧାନଙ୍କୁ ଯୋଗାଯୋଗ ପାଇଁ ଉଦ୍ୟମ କରାଯାଇଥିଲେ ମଧ୍ୟ ତାହା ସମ୍ଭବପର ହୋଇନାହିଁ।
