କେନ୍ଦୁଝର,୨୯ା୫(ସ୍ବ.ପ୍ର.): କେନ୍ଦୁଝର ଜିଲା ଉପାନ୍ତ ଯୋଡ଼ା-ବଡ଼ବିଲ ଖଣି ଅଞ୍ଚଳରେ ଓଡ଼ିଆ ଭାଷାକୁ ଅଣଦେଖା କରାଯାଉଛି। ସରକାରଙ୍କ ତାଗିଦା ସତ୍ତ୍ୱେ ଓଡ଼ିଆରେ ନାମଫଳକ ବା ସୂଚନା ଫଳକ ଲେଖାଯାଉନାହିଁ। ବିଶେଷ କରି ବିଭିନ୍ନ ସରକାରୀ କମ୍ପାନୀ, ଘରୋଇ ଖଣି ସଂସ୍ଥାରେ କାମ କରୁଥିବା ଅଣ ଓଡ଼ିଆ ବାବୁମାନଙ୍କ ମନମୁଖି କାମ ଯୋଗୁ ଏଭଳି ପରିସ୍ଥିତି ଉପୁଜୁଥିବା ଅଭିଯୋଗ ହେଉଛି। ଏ ନେଇ ପ୍ରଶାସନ ପକ୍ଷରୁ ଚଢ଼ାଉ କରି ପଦକ୍ଷେପ ନିଆଯାଉ ନ ଥିବାରୁ ଅସନ୍ତୋଷ ବଢୁଛି।
ଅନୁଯାୟୀ, ଓଡ଼ିଶା ଓ ଝାଡ଼ଖଣ୍ଡ ସୀମାନ୍ତ କେନ୍ଦୁଝର ଜିଲା ବଲାଣୀ ଖଣି ଅଞ୍ଚଳରେ ଏକ ଠିକା ସଂସ୍ଥା ପକ୍ଷରୁ ବଲାଣି ଲୌହ ଖଣିର ଟାଉନଶିପ୍ରେ ରାସ୍ତା ଓ ଅନ୍ୟାନ୍ୟ ନିର୍ମାଣ କାର୍ଯ୍ୟ ଚାଲିଛି। ନିର୍ମାଣାଧୀନ ରାସ୍ତା କଡ଼ରେ ଡାକଘର, କ୍ଲବ୍, ଡାକ୍ତରଖାନା, ବ୍ୟାଙ୍କ ଆଦିର ନାମ ହିନ୍ଦୀ, ଇଂରାଜୀ ଭାଷାରେ ଲେଖାଯାଇଛି। ଓଡ଼ିଆରେ ଲେଖିବାକୁ ନିବେଦନ କଲେ କାମ କରୁଥିବା ସଂସ୍ଥା ପକ୍ଷରୁ ଧମକ ମିଳୁଥିବା ସ୍ଥାନୀୟ ବାସିନ୍ଦା ଦେବାଶିଷ ନନ୍ଦ ଅଭିଯୋଗ କରିଛନ୍ତି। ଏ ନେଇ ତାଙ୍କ ସହ ସଂସ୍ଥାର କର୍ମଚାରୀ ଗଣ୍ଡଗୋଳ କରିଥିବା ରବିବାର ବଲାଣୀ ଥାନାରେ ଲିଖିତ ଅଭିଯୋଗ କରିଛନ୍ତି। ଘଟଣାରେ ତୁରନ୍ତ ପଦକ୍ଷେପ ନେବା ସହ ଓଡ଼ିଆ ଭାଷାର ସୁରକ୍ଷା ଦେବାକୁ ପୋଲିସ ନିକଟରେ ନିବେଦନ କରିଛନ୍ତି। ବଲାଣୀ ଥାନା ଅଧିକାରୀ ବିଦେଶୀ ବାଗ କହିଛନ୍ତି, ଗଣ୍ଡଗୋଳକୁ ନେଇ ପୃଥକ୍ ଅଭିଯୋଗ ମିଳିଛି। ଉଭୟ ପକ୍ଷଙ୍କୁ ଡାକି ପଚରାଉଚରା କରାଯାଉଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
