ଭୁବନେଶ୍ୱର,୨୫।୯ (ବ୍ୟୁରୋ):‘ଏକାମ୍ର କ୍ଷେତ୍ର ଆମେନିଟିଜ୍ ଆଣ୍ଡ ମନୁମେଣ୍ଟ୍ସ ରିଭାଇଭାଲ୍ ଆକ୍ସନ ପ୍ଲାନ’ ଯୋଜନାରେ ବିଏମ୍ସି ଉପଯୁକ୍ତ କ୍ଷତିପୂରଣ ନ ଦେଇ ଘରୋଇ ଜମି ଅଧିଗ୍ରହଣ କରିବାକୁ ବିରୋଧ କରି ହାଇକୋର୍ଟରେ ଆଗତ ୨ଟି ମାମଲାର ରାୟ ପ୍ରକାଶ ପାଇଛି। ମୁଖ୍ୟ ବିଚାରପତି ଏସ୍. ମୁରଲୀଧର ଏବଂ ବିଚାରପତି ବି.ପି. ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ଉକ୍ତ ମାମଲାର ଶୁଣାଣି କରିି ଆବେଦନକାରୀଙ୍କୁ ଆସନ୍ତା ନଭେମ୍ବର ୧ ତାରିଖ ମଧ୍ୟରେ ଜାଗା ଖାଲି କରିବା ସହ ଭୁବନେଶ୍ୱର ମହାନଗର ନିଗମ (ବିଏମ୍ସି)ଠାରୁ ଧାର୍ଯ୍ୟ କ୍ଷତିପୂରଣ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ନ ହେଲେ ବିଏମ୍ସି ଆଇନ ଅନୁଯାୟୀ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଏଥିସହିତ ଡବ୍ଲ୍ୟୁପି(ସି) ୨୪୨୧୧ରେ ୫ ଅକ୍ଟୋବର ୨୦୨୦ରେ ଦିଆଯାଇଥିବା ସ୍ଥଗିତାଦେଶକୁ ଉଠାଇ ଦିଆଯାଇଛି ବୋଲି ଖଣ୍ଡପୀଠ ରାୟରେ ଉଲ୍ଲେଖ କରିଛନ୍ତି।
ସୂଚନାଯୋଗ୍ୟ, ଏକାମ୍ର କ୍ଷେତ୍ର ଯୋଜନାରେ ଜମି ଅଧିଗ୍ରହଣ ଏବଂ କ୍ଷତିପୂରଣକୁ ବିରୋଧ କରି ଶ୍ରୀବତ୍ସ ପଣ୍ଡା, ତାଙ୍କ ଝିଅ ମିତୁଶ୍ରୀ ପଣ୍ଡା ଏବଂ ଶ୍ରୀପତି ପୂଜାପଣ୍ଡା ୨୦୨୦ରେ ରାଜ୍ୟ ସରକାରଙ୍କ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ, ଖୋର୍ଦ୍ଧା ଜିଲାପାଳ, ବିଏମ୍ସି ଏବଂ ତହସିଲଦାରଙ୍କୁ ପକ୍ଷଭୁକ୍ତ କରି ହାଇକୋର୍ଟରେ ୨ଟି ରିଟ୍ ଆବେଦନ କରିଥିଲେ। ଉଚ୍ଚ ଅଦାଲତ ଉକ୍ତ ଆବେଦନର ଶୁଣାଣି କରି ଅକ୍ଟୋବର ୫ରେ ଏକ ଅନ୍ତରୀଣ ରହିତାଦେଶ ଜାରି କରିବା ସହ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ସ୍ଥିତାବସ୍ଥା ଜାରି କରିଥିଲେ। ଅପରପକ୍ଷରେ ନଭେମ୍ବର ୧୮ରେ ବିଏମ୍ସି ପକ୍ଷରୁ ହାଇକୋର୍ଟରେ କାଉଣ୍ଟର ଆଫିଡେଭିଟ୍ ଫାଇଲ ହୋଇଥିଲା।
